1. Die Jaarlikse Nasionale Assesserings (JNA's) sal geskryf word van 10 tot 13 September 2013, soos bepaal in Assesseringsbestuursminuut 17 van 2013.
2. Voor die aanvang van die toetsing moet skole verseker dat alle leerders korrek geregistreer word op die Sentrale Onderwysbestuurstelsel (SOBIS).
3. Soos aangedui in die bogenoemde minuut, is skole verantwoordelik vir die interne nasien en moderering van alle graad 1- tot 6- en 9-JNA's.
4. Die punteblaaie vir die JNA's sal nie aan skole voorsien word nie. Skole moet hierdie punteblaaie van die SOBIS uitdruk. 'n Taal- en Wiskunde-punteblad vir elke klas in die betrokke grade moet gedruk word voor 6 September 2013. Enige probleem wat met die drukwerk opduik, moet aan die distrik se assesseringskoördineerder gerapporteer word.
5. Na moderering by die skool, moet onderwysers die leerders se punte vir die toetse met die hand op die gedrukte punteblaaie inskryf. Sodra al die leerders se punte volgens klas, graad en vak op rekord geplaas is, moet die punte as korrek geverifieer en afgeteken word op die punteblad deur die graadhoof en die prinsipaal.
6. Die prinsipaal moet 'n datavaslegger aanstel om alle geverifieerde JNA-punte van die voltooide punteblaaie op die SOBIS in te sleutel. Die puntevasleggingsfunksie kan op die SOBIS onder "Assessments" gevind word.
7. Die JNA-datavaslegger sal ooreenkomstig die nasionale norm vir die vaslegging van 2000 punte per dag vergoed word. Besonderhede van die punte wat per skool ingesleutel moet word en die bedrag wat aan die datavaslegger betaal moet word, sal op SOBIS vertoon word. Die skoolhoof kan die datavaslegger uit skoolfondse betaal, en die WKOD sal dan die skool vergoed ooreenkomstig die voorgeskrewe tarief soos aangedui op die SOBIS.
8. Elektroniese vaslegging van die punte moet voltooi word tussen 10 en 30 September 2013, en skoolhoofde moet alle vasgelegde punteblaaie op die SOBIS elektronies afgeteken voor die provinsiale uitslae op die nasionale databasis in Oktober 2013 gelaai word.
9. Die oorspronklike punteblaaie vir graad 3, 6 en 9 moet saam met die steekproefskrifte aan die gesentraliseerde nasiensentrum voorgelê word. Die skool moet afskrifte hou van al die afgetekende punteblaaie, wat benodig sal word deur die distrikskantoor.
10. Bring asseblief die inhoud van hierdie minuut onder die aandag van alle belanghebbendes.


GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2013:09:03