1. Die Wes-Kaap Onderwysdepartement is verbind daartoe om te verseker dat die maksimum gebruik van onderrig- en leertyd gemaak word.

2. Alle skool- en onderwysdistrikskantoorpersoneellede word versoek om op die volgende te let:
2.1 Dit is die verantwoordelikheid van elke skool om sy skoolprogram tydens en na die eksamen tot op die laaste dag van die skoolkwartaal te beplan, en om alle leerders, ouers en distrikskantore ooreenkomstig in te lig.
2.2 Skole wat graad 4 tot 11 aanbied word daaraan herinner dat geen eksamens voor 4 Junie 2012 en 12 November 2012 mag begin nie. Van alle leerders word verwag om die skool by te woon deur die hele eksamenperiode, met die uitsondering van graad 12- leerders, wat geregtig is op 5 studiedae voor die aanvang van die Nasionale Senior Sertifikaat-eindeksamen.
2.3 Primêre skole mag nie ‘n eksamenperiode afblok nie, en alle assesserings en eksamens moet afgelê word as deel van die normale skoolprogram. Primêre skole word dus nie toegelaat om tydens hierdie periodes vroeër te sluit nie.
2.4 Skole mag leerders nie onder die indruk bring dat dit die leerders se eie besluit is of hulle, na die einde van die eksamen vir die kwartaal, of wanneer hulle nie toetse of eksamen skryf nie, skool toe gaan kom of nie.
2.5 Alle onderwysers moet elke dag by die skool wees vir die volle skooldag tydens hierdie tydperk (35 uur per week) ongeag of hulle toesigdiens het of nie.
2.6 Onderwysdistriksbeamptes sal die implementering van hierdie direktiewe moniteer. Prinsipale en skoolbeheerliggame word versoek om spesiale aandag te gee aan die ontwikkeling van hulle programme vir die periodes waarna verwys is, sodat waardevolle tyd vir leer nie verlore sal gaan nie.


GETEKEN: L.J. ROSE
HOOF: ONDERWYS
DATUM: 2012:05:03