1. Hierdie minuut adviseer prinsipale van skole, skoolbeheerliggame (SBL'e) en distriksbeamptes aangaande die proses van vroeë inskrywing van leerders vir die 2013-skooljaar. Dit raak hoofsaaklik daardie kinders wat vir die eerste keer skool toe of na 'n hoërskool toe gaan en diegene wat van skool verander. (Sien asseblief die WKOD Beleid vir die Toelating en Registrasie van Leerders by Gewone Openbare Skole, Omsendbrief 0026/2010.)

2. Die Wes-Kaap Onderwysdepartement (WKOD) beskou vroeë inskrywing as 'n prioriteit vir die begin van 'n suksevolle jaar van onderrig en leer. Die optimale gebruik van onderrigtyd in 'n akademiese jaar is noodsaaklik vir verbeterde prestasie en daarom is dit belangrik dat leerders lank voor die einde van 2012 inskryf.

3. Ouers en voogde word aangemoedig om hulle regte en verantwoordelikhede by die inskrywing van hulle kinders vir skool uit te oefen.

  1. Dit is in die eerste plek die verantwoordelikheid van ouers en voogde om kinders vir die volgende skooljaar in te skryf as hulle na graad 1 gaan, van skool verander (soos na graad 8 of 9 gaan) of as hulle na 'n ander gebied verhuis het.

  2. Ouers en voogde moet 'n onderskeid tref tussen die "inskrywing" of "op die waglys plaas" van 'n kind. Om op ‘n waglys geplaas te word is nog geen waarborg dat die kind by daardie skool ingeskryf sal word nie.

  3. Ingevolge artikel 3(1) van die Suid-Afrikaanse Skolewet (Wet 84 van 1994), is skoolbywoning verpligtend vir alle leerders vanaf die eerste skooldag van die jaar waarin die leerder die ouderdom van sewe jaar bereik.

  4. Artikel 5(4)(a) van die Wet bepaal dat ‘n leerder se toelatingsouderdom tot 'n openbare skool as volg is:
    1. graad R: vier jaar, word vyf teen 30 Junie in die jaar van toelating, en
    2. graad 1: vyf jaar, word ses teen 30 Junie in die jaar van toelating.

      Hierdie moet gesien word as MINIMUM ouderdomme waarteen toelating toegeken mag word.

  5. Ouers en voogde moet eerstens direk met die skool onderhandel waar hulle die kind wil inskryf. Indien hulle egter moeilikheid ondervind met die inskrywing van hulle kinders by ‘n skool vir 2013, kan hulle hulle plaaslike onderwysdistrikskantoor skakel om bystand. Kontakbesonderhede kan van die skool verkry word.

  6. Daar word aanvaar dat 'n leerder wat tans by 'n skool ingeskryf is, sal voortgaan om daardie skool by te woon totdat die uitgangsgraad bereik word. Sommige skole vereis van ouers en/of voogde om te bevestig dat die leerder daardie skool in die volgende jaar sal bywoon. In hierdie geval moet die prinsipaal en die SBL die ouers en/of voogde in kennis stel van hierdie ooreenkoms.
4. Prinsipale en SBL'e moet ouers en voogde in kennis stel dat inskrywing vir 2013 uit twee fases sal bestaan:

  1. Die eerste fase begin op 1 Maart en eindig op 30 Junie 2012. Sommige skole mag verkies om vroeër met hierdie proses te begin.

  2. Die tweede vind plaas in die derde kwartaal, beginnende op die laaste Maandag in Julie en eindigend op die laaste skoolweek in September.
5. Skole word daaraan herinner dat hulle teen 30 Junie 2012 reeds op alle eerstefase aansoeke moes geantwoord het sodat ouers en voogde genoeg tyd kan hê om na alternatiewe skole te soek om hulle kinders in te skryf.

6. Prinsipale en SBL'e word versoek om die inhoud van hierdie minuut besikbaar te stel aan alle opvoeders, ouers en voogde.


GETEKEN: JH LYNERS
ADJUNK-DIREKTEUR-GENERAAL: INRIGTINGSONTWIKKELING EN -KOÖRDINNERING
DATUM: 2012:03:06