| 1. |
ISebe leMfundo leNtshona Koloni (iSebe iWCED) liyaqhubeka nokusebenzisana kwalo neYunivesithi yaseStellenbosch ukusasaza ngqo izifundo ngomabonakude kwizikolo ezikhethiweyo eziyi-146. |
| 2. |
Ngasinye kwezi zikolo ziyi-146 siya kufumana izinto zokuxhasa abafundi ekufundeni. (Funda ilisti yezikolo kwisiHlomelo A esiqhotyoshelwe apha.) |
| 3. |
Asiyonjongo yokufundisa nge-Telematics ukuthatha indawo yokufundisa kwesiqhelo. Endaweni yoko, eyona njongo yako kukudala imeko enika indawo yokufundela exhasa yaye ikhuthaze ukufunda kumaBakala 11 no-12. |
| 4. |
Ezi zifundo zilandelayo ziya kusasazwa ngamaxesha athile: iMathematika, iFizikhali Sayensi, iiSayensi zoBomi, i-Akhawuntingi, isiNgesi uLwimi lokuQala oLongezelelweyo, isi-Afrikansi uLwimi lokuQala oLongezelelweyo noLwimi lwaseKhaya kunye neJografi. (Funda ithayimthebhile yokusasaza kwisiHlomelo B esiqhotyoshelwe apha.) |
| 5. |
Abafundi nootitshala bamaBakala 11 no-12 kwezi zikolo ziyi-146 baya kuthi, ngexesha losasazo, babe nako ukuqhagamshelana nomqhubi-nkqubo (presenter) estudiyo kusetyenziswa i-Intanethi okanye iselula. Abafundi baya kuba nako kubuza imibuzo kumqhubi-nkqubo emva kosasazo. Bonke abathathi-nxaxheba baya kuba nako ukuva imibuzo neempendulo. |
| 6. |
Abaqhubi-nkqubo ngootitshala abaphambili beSebe iWCED abakhethwe ngenxa yobungcali babo kwizifundo zabo. |
| 7. |
Kuya kulindeleka ukuba ootitshala bezifundo kwisikolo ngasinye balawule, babeke esweni yaye baququzelele ukufunda ngamaxesha apho izifundo zibukelwa kumabonakude ngabafundi emva kwesikolo. |
| 8. |
Ngenxa yokuba izifundo zisenziwa emva kweeyure zesikolo apha evekini nangeeCawa, kubalulekile ukuba iinqununu zixoxe ngamalungiselelo nabazali babafundi bamaBakala 11 no-12, kunye namabhunga olawulo ezikolo zazo. |
| 9. |
Akuyi kuba ngabafundi kuphela abaya kuzuza lukhulu kule program. Ukuba le program ilawulwa kakuhle, isikolo nabahlali baya kuzuza nabo kuyo. |
| 10. |
Le program iya kubekwa esweni qho nguNdlunkulu nangamagosa ee-ofisi zezithili zemfundo. |
| 11. |
Kuya kulindeleka ukuba Iinqununu zinike ingxelo qho ngeveki ngokuza kwabafundi, kwakunye nempumelelo okanye ubunzima ababufumanayo malunga nale nkqubo. |
| 12. |
li-DVD zokusasaza ziya kuthunyelwa ezikolweni ukuhlaziya ulwazi phambi kweemviwo. |
| 13. |
Ukuba ninayo nayiphi na imibuzo ngeli phulo, kucelwa ukuba niqhagamshelane ngokukhululekileyo noWalter Mercuur, kule nombolo yefoni 021 467 2630 okanye ngale dilesi ye-imeyili Walter.Mercuur@pgwc.gov.za |
| 14. |
Sijonge ngethemba lokuqhuba le projekthi enika umdla kunye nani. |
| 15. |
Kucelwa iinqununu zazise okukule ngcaciso imfutshane ootitshala abachaphazelekayo, abafundi bamaBakala 11 no-12 nabazali babo okanye nabagcini babo. |
ISAYINWE: NGU-SM NAICKER
OBAMBELEYO USEKELA MLAWULI JIKELELE WOLAWULO LWEKHARITYHULAM NOVAVANYO
UMHLA: 2012:04:02
|
 |