1. Agtergrond
1.1 Hierdie minuut verskaf die toepaslike prosedure vir eksamenkonsessies vir leerders wat leerhindernisse ervaar.

2. Verskillende tipe Konsessies
2.1 Konsessies ten opsigte van Tale en Wiskunde

Die volgende konsessies ten opsigte van Tale en Wiskunde kan van toepassing wees op kandidate wat hindernisse ervaar wat verband hou met doofheid, afasie, disleksie en diskalkulie:

  1. Dowe kandidate kan slegs een (1) amptelike taal aanbied op Eerste Addisionele Vlak, op voorwaarde dat 'n ander vak uit Groep B aangebied word in die plek van die een amptelike taal wat nie aangebied word nie. (Die aangewese lys van vakke is aangeheg as Bylae A).

  2. Afasie- en disleksiese kandidate kan slegs een (1) amptelike taal aanbied op Eerste Addisionele Vlak, op voorwaarde dat 'n ander vak uit Groep B aangebied word in die plek van die een amptelike taal wat nie aangebied word nie.

  3. Kandidate wat ly aan 'n wiskundige versteuring, soos diskalkulie, kan vrygestel word daarvan om Wiskundige Geletterdheid of Wiskunde aan te bied, op voorwaarde dat 'n ander vak uit groep A of B aangebied word in die plek van Wiskundige Geletterdheid of Wiskunde.

Aansoeke ten opsigte van die bogenoemde moet duidelik gespesifiseer word op die aansoekvorm.

2.2 Aanpassing van Vraestelle

Die WKOD sal die volgende aanpassing van vraestelle vir blinde kandidate, kandidate met gedeeltelike sig en dowe kandidate voorsien:

  1. Blinde leerders sal vraestelle ontvang wat na Braille oorgesit is. In geval 'n vraag op diagramme, prente of foto.s gebaseer is, sal daardie vraag deur 'n geskikte alternatiewe vraag vervang word.

  2. Leerders met gedeeltelike sig sal 'n vraestel ontvang waarin die fontgrootte vermeerder is tot Arial 16 op A4 papier, terwyl die diagramme vergroot sal word en in 'n addendum sal verskyn. Elke diagram sal egter steeds in die vraestel voorkom in sy oorspronklike grootte en posisie om die leerder by te staan.

  3. In geval 'n blindeleerder of een met gedeeltelike sig nie 'n eksamen kan aflê nie as gevolg van 'n bykomende versteuring, mag 'n amanuensis aangestel word.

  4. Oudiobande of CD.s sal ook verskaf word aan blinde leerders en leerders met gedeeltelike sig wat addisionele hulp benodig.

  5. Leerders wat gehoorgestremd is sal 'n aangepaste vraestel ontvang.

Die aangehegte vorm (Bylae B) moet voltooi en na die Direktoraat: Eksamenadministrasie aangestuur word, gemerk "Vir Aandag me B Calvert" teen 31 Julie 2012.


3. Die Geëndosseerde Nasionale Senior Sertifikaat

'n Geëndosseerde NSS mag uitgereik word aan leerders met spesiale behoeftes wat nie aan die program- en bevorderingsvereistes van die NSS kan voldoen nie as gevolg van enige van die volgende hindernisse:

  1. Leerders met neurologiese hindernisse t.o.v. leer, lees, spel, disgrafie, wiskundige berekenings en gesyferdheidsvaardighede en die verstaan van die geskrewe woord.

  2. Leerders (doof en hardhorend) wie se gehoorgestremdhede ernstige leer-hindernisse veroorsaak en wat sal baat vind van toelating tot 'n spesiale skool.

  3. Leerders met ernstige visuele leerhindernisse (blind en met gedeeltelike sig) aan wie se behoeftes nie in hoofstroomskole aangespreek kan word nie, veral hulle behoeftes ten opsigte van spesiale onderrigmetodes (gebruik van die medium van Braille en groot druk en die implementering van gespesialiseerde apparate nie [Braille-toerusting] vergroting, kameras en GKTV in klaskamers, skerm-leesprogrammatuur, vergrotingsagteware, ens.).

  4. Leerders met fisiese leerhindernisse indien daardie leerders nie in staat is om by hoofstroomonderwys te baat nie. Dit kan die gevolg wees van verskeie faktore, soos uiters beperkte fisiese bewegings, afhanklikheid van sekere apparate (bv. rolstoel), mediese toestande en ontoeganklike skoolgeboue. Die term "fisiese gestremdheid" dek 'n verskeidenheid toestande van oorerflike onvermoeëns tot abnormaliteite verkry as gevolg van siekte, waarvan die algemeenste is spinale bifida, kinderverlamming, spierdistrofie, hemofilie, kardiovaskulêre en long-kondisies.

  5. Leerders met geringe tot ernstige intellektuele leerhindernisse aan wie se spesifieke onderwysbehoeftes nie in hoofstroomskole voldoen kan word nie, maar slegs deur akkommodasie in spesiale skole.

  6. Leerders met veelvuldige leerhindernisse.

  7. Leerders met ernstige gedrags- en emosionele leerhindernisse.

  8. Leerders met enige medies geassesseerde spesiale behoefte wat nie onder bogenoemde kategorieë val nie.

Leerders met spesiale behoeftes moet voldoen aan die interne en eksterne assesseringsvereistes in nie minder nie as vyf (5) vakke. Aansoeke om te registreer vir die geëndosseerde NSS moet ook voorgelê word op Bylae C.


4. Prosesse en Prosedures

  1. 'n Gedetailleerde professionele verslag (nie ouer as 3 jaar nie) van 'n mediese praktisyn, of sielkundige, sowel as ander ondersteunende bewyse (toets-resultate, eksamenresultate, ens.) moet die gepaste aansoekvorm (Bylae C) vergesel.

  2. 'n Gesertifiseerde fotokopie van die kandidaat se identiteitsdokument moet alle aansoeke vergesel.

  3. In gevalle waar aansoek gedoen word dat 'n kandidaat se swak spelvermoë of handskrifprobleem onder die aandag van die nasiener gebring word moet voorbeelde van die kandidaat se skriftelike werk wat die probleem duidelik illustreer ook voorgelê word.

  4. 'n Duidelike verduideliking van die kandidaat se probleem soos in die klaskamer geobserveer is, moet gegee word. Indien dit 'n ernstige probleem is, moet vorige konsessies wat tydens die kandidaat se skoolloopbaan toegestaan is (bv. ekstra tyd, spelkonsessies) aangedui word. In sulke gevalle moet presiese inligting verskaf word oor die omvang van die vorige konsessie wat toegelaat is, bv. die aantal addisionele minute toegelaat per uur.

  5. Aansoeke om addisionele eksamenskryftyd a.g.v. onvoorsiene omstandighede, soos die breek van 'n arm of vinger wat na die bogenoemde sluitingsdatum gebeur, moet ook voorgelê word op die voorgeskrewe vorm. In so 'n situasie kan die aansoekvorm, mediese sertifikate en ander ondersteunende dokumentasie na die Departement gefaks word na nommer 021 461 5637. Die oorspronklike dokumente kan dan per pos gestuur word op 'n later datum.

  6. Die Departement se besluit t.o.v. 'n aansoek om addisionele tyd, sowel as ander aanpassings, sal na die hoof van die inrigting versend word en, tensy anders verklaar word, geldig bly vir die 2012 November NSS-eksamen en die 2013 Februarie-Maart NSS aanvullende eksamens. Die hoof van die inrigting moet die opsiener en die leerder skriftelik in kennis stel van die besluit deur aan hulle 'n afskrif van die goedkeuringsbrief te verskaf.

  7. Let asseblief daarop dat verlof tot addisionele tyd vir alle interne eksamens, tot en met September Graad 12-eksamen, kan slegs deur die betrokke kringspanbestuurder toegestaan word. Inrigtings moet rekord hou van sodanige konsessies.

  8. Alle aansoeke moet aanbeveel en onderteken word deur die hoof van die inrigting.
5. Alle aansoeke moet by die WKOD se Direktoraat: Eksamenadministrasie ingedien word voor 31 Julie 2012 vir die huidige groep graad 12 leerders en daarna voor 31 Maart jaarliks.

6. Bring asseblief die inhoud van hierdie minuut onder die aandag van alle betrokkenes.


GETEKEN: BK SCHREUDER
ADJUNK-DIREKEUR-GENERAAL: KURRIKULUM-EN ASSESSERINGSBESTUUR
DATUM: 2012:07:04

Bylae A: "Nationally approved subjects"  (grootte: 47 KB)
Bylae B: Statistieke per sentrum t.o.v. visueel gestremde leerders  (grootte: 10 KB)
Bylae C: Aansoek om alternatiewe eksamineringsmetode  (grootte: 49 KB)