1. Die nasionale Departement van Basiese Onderwys nooi, in samewerking met South African History Online alle skole uit om deel te neem aan die Nasionale Mondelingegeskiedenis-kompetisie vir Skole, en mee te ding om die Nkosi Albert Luthuli-toekenning vir Jong Geskiedkundiges wat in 2005 van stapel gestuur is. Hierdie kompetisie vorm deel van die Departement se bydrae tot die versterking van die onderrig en studie van Geskiedenis op skool. Die nasionale Departement beplan ‘n nasionale gebeurtenis wat sal volg op provinsiale kompetisies oor spesifieke onderwerpe.

2. Dit is ook deel van die Departement se voortgesette inisiatief om alle leerders aan te moedig om nie net 'n begrip te vorm van die breë geskiedenis van Suid-Afrika nie, maar ook van die rykdom van die geskiedenis van hulle plaaslike gemeenskappe. Dit is 'n geleentheid vir die jong leerders om ondervinding op te doen in die ontwikkeling van belangrike navorsingsvaardighede.

3. Die kompetisie is oop vir alle leerders van graad 8 tot graad 11 en alle Geskiedenisen Sosiale Wetenskappe-onderwysers van sekondêre skole.

4. Leerders en onderwysers word uitgenooi om die South African History Online webtuiste by www.sahistory.org.za te besoek vir inligting oor mondelingegeskiedenisnavorsing en die Suid-Afrikaanse Geskiedenisargief-webtuiste by. www.saha.org.za

5. KOMPETISIE VIR LEERDERS

Daar sal van leerders verwag word om navorsing te doen en 'n voorlegging of 'n dokumentêre film of video voor te berei oor een van die volgende onderwerpe:
5.1 Onbesonge helde en heldinne/Lewens van moed en dapperheid: Die rol van gewone mans en vroue in die stryd om vryheid en demokrasie of van mense wat ‘n verskil maak deur verandering te bring deur gemeenskaps-opheffingsprojekte of ontwikkeling. Leerders moet op daardie mans/vroue fokus wat nooit in die openbaar erken is nie. Leerders moet mense kies wat aktief was voor of na 1994.
5.2 Die geskiedenis van die vryheidstryd in Suid-Afrika: Leerders kan die geskiedskrywing van die vryheidstryd opteken, dit terugneem na die vroeë koloniale oorwinnings, die formasie van die South African Native National Congress en ander politieke partye wat daarop gevolg het wat 'n rol gespeel het in die vryheidstryd. Leerders kan kies om te fokus op die rol van die vakbondbeweging in die vryheidstryd of die rol wat gespeel is deur vroue en jeugdiges in die vryheidstryd.
5.3 Leerders kan die geskiedenis van hulle gemeenskap bestudeer, wat kan insluit die geskiedenis van sleutelterreine, geboue en inrigtings. Dit kan skole, godsdienstige inrigtings, begraafplase, monumente en standbeelde insluit.
5.4 Die geskiedenis van my skool: Daar word van die leerder verwag om ondehoude te voer met lede van die gemeenskap wat betrokke was by die oprigting van die skool. Hulle kan ook vorige leerlinge van die skool ondervra en vasstel hoe die skool met die plaaslike geskiedenis inskakel.

6. LET ASSEBLIEF OP DIE VOLGENDE:
6.1 Die projek moet op mondelingegeskiedenis-navorsing gebaseer wees.
6.2 Leerders moet gehelp word met hulle keuse van persone met wie onderhoude gevoer gaan word en moet sterk aanbeveel word om 'n persoon of persone uit hulle plaaslike gemeenskap te kies.
6.3 Leerders moet aangeraai word om onderhoude met ten minste 2 tot 3 persone te voer.
6.4 Beoordeling sal hoofsaaklik geskied op grond van die navorsing wat gedoen is.
6.5 Leerders mag hulle projek in enige van die amptelike tale aanbied.
6.6 Leerders moet ‘n portefeulje voorlê waarin al hulle navorsing gedokumenteer is.

7. KRITERIA

Daar sal van leerders verwag word om TWEE dinge te doen:
7.1 Gee ‘n mondelinge aanbieding of dokumentêre video van sy/haar mondelinge navorsing voor ‘n paneel van beoordelaars. (Dit is nie bedoel om 'n dramatiese voorlegging of poësie te wees nie.)
7.2 Berei ‘n portefeulje in geskrewe vorm voor wat die volgende moet insluit:
7.2.1 Portefeuljes moet bewyse van navorsing bevat. Leerders moet met lede van die gemeenskap onderhoude voer en moet bewyse kan voorlê van die onderhoude, byvoorbeeld briewe aan onderhoudpersone, transkripsies van onderhoude of bandopnames, insluitend die lys vrae wat aan die onderhoudpersoon gestel is en die response daarop. Dit kan in ‘n geskrewe vorm of as bandopname ingehandig word.
7.2.2 Onderhoude mag in enige van die amptelike tale gevoer en opgeneem word.
7.2.3 Portefeuljes moet ook bewyse lewer van nadenke en moet aandag gee aan die volgende:
7.2.3.1 Leerders moet verduidelik hoekom hulle die persone vir onderhoude gekies het, moet 'n duidelike begrip toon van die historiese konteks waarin die individu gewerk het en hoe die inligting uit die onderhoud verband hou met die historiese konteks of hoe dit ons help om die gebeure uit 'n persoonlike perspektief te begryp.
7.2.3.2 Leerders moet ‘n persoonlike weergawe gee van wat hulle geleer het aangaande die moontlikhede vir individue om verandering in die samelewing mee te bring, en oor wat hulle persoonlik gedurende die mondelinge navorsing geleer het en oor die waarde van mondelinge geskiedenisnavorsing om ons te help om ons verlede te verstaan.
7.2.3.3 Leerders moet alle bronne wat in die portefeuljes gebruik is, erken. Biografieë moet ingesluit word. Plagiaat sal swaar gepenaliseer word.

8. ASSESSERINGSKRITERIA VIR MONDELINGEGESKIEDENISNAVORSINGSPROJEKTE (AANGEPAS UIT DIE NKV VOO- GESKIEDENISVAKASSESSERINGSRIGLYNE)

Omvang van die mondelingegeskiedenis-projek

Mondelingegeskiedenis-projekte in die VOO het 'n aantal komponente:

  • Sleutelvrae wat die navorsing rig
  • Agtergrondnavorsing wat die onderhoude binne 'n konteks plaas
  • Die onderhoude en transkripsies van die onderhoude
  • 'n Geskrewe bespreking van hoe die inligting uit die onderhoude verband hou met die tydperk
  • 'n Evaluering van die onderhoude as bronne oor die verlede
  • Eie, nadenkende bydrae aan die einde: Nabetragting om te bepaal wat hierdie projek vir my (die leerder) beteken het ingevolge persoonlike groei en kennis en begrip van die tydperk.

(Dit kan ook fokus op meer direkte vrae, veral in graad 10, soos: Wat is die belangrikste ding wat jy uit die mondelingegeskiedenis geleer het? Waarvan sou jy meer wou weet, noudat jy hierdie projek gedoen het? )

L.W. Kernassesseringskriteria vir navorsingskomponent: Gebruik die kriteria vir elke graad soos uiteengesit in die navorsingstaak. (Kriteria kan bygevoeg word om die kernkriteria meer toepaslik vir spesifieke take te maak.)
Kriterium 1
Formuleer vrae vir die projek
Kriterium 2
Identifiseer en verkry toegang tot 'n verskeidenheid inligtingsbronne
Kriterium 3
Kennis en begrip van die tydperk
Kriterium 4
Geskiedkundige navraag en kommunikasie
Kriterium 5
Aanbieding

Kriteria vir die assessering van 'n mondelingegeskiedenis-projek
Kriterium 1
Vrae vir die onderhoud

  • Die vrae is oop
  • Die vrae was toepaslik en het inligting bekom wat toepaslik is op die oorkoepelende vraag
  • Daar was voldoende vrae
Kriterium 2
Ondervraagdes

  • Die persoon/persone met wie die onderhoud gevoer is, was geskik.

Die biografiese besonderhede van die onderhoudpersoon/-persone is gegee.
Kriterium 3
Voorbereiding en beplanning

  • Daar is bewyse van noukeurige voorbereiding vir die onderhoude.
  • Daar is bewyse van projekbeplanning.

Alle aantekeninge ter voorbereiding en beplanning is by die projek ingesluit.
Kriterium 4
Aanbieding van die inligting uit die onderhoude

  • Die ondervraagde(s) is in 'n historiese konteks geplaas.
  • Die konteks vir die verstaan van die onderhoud(e) is gegee.
  • Die inligting uit die onderhoude is in 'n historiese konteks geplaas.
  • Die inligting uit die onderhoude is noukeurig getranskribeer (indien 'n bandopnemer gebruik is).
  • Die inligting uit die onderhoude is ontleed en samehangend georden en wys verskillende uitgangspunte uit, indien van toepassing.

Die aanbieding van die projek vir die klas was duidelik en doeltreffend.
Kriterium 5
Nabetragting oor self

Kommentaar wys diepte van denke oor die proses en die produk.

9. KOMPETISIE VIR ONDERWYSERS
9.1 Opvoeders van sekondêre skole wat vir die kompetisie inskryf, moet 'n werksplan indien oor hoe hulle die mondelingegeskiedenis-projek in die klaskamer opgestel het.
9.2 Van elke onderwyser sal verwag word om 'n aanbieding te gee van sy of haar portefeulje aan 'n paneel beoordelaars en moet gereed wees vir ‘n paneelbespreking oor sy/haar portefeulje.
9.3 OPVOEDERS MOET DIE VOLGENDE IN 'N PORTEFEULJE VIR DIE KOMPETISIE INSLUIT:
9.3.1 Hoe die mondelingegeskiedenis-projek in die klaskamer bekendgestel is.
9.3.2 Die erfenisprojek kan verbind word met die plaaslike gemeenskap en die skool kan dit aanpas en inskakel by die Suid-Afrikaanse Erfenisnavorsingsagent vir beskerming en bewaring.
9.3.3 Leerders kan plakkate ontwikkel vir die erfenisterrein.
9.3.4 Watter verduideliking aan leerders gegee is oor die uitkies en benadering van moontlike onderhoudpersone, oor voorbereiding vir en afneem van onderhoude en die gebruik van die onderhoud as bewyse waaruit afleidings oor die deelname van daardie individu gemaak kan word.
9.3.5 Watter intervensies die onderwyser gebruik het om die leerders by te staan om die projek af te handel
9.3.6 Wat die leerders na die onderwyser se mening geleer het uit die mondelingegeskiedenis-projek.
9.3.7 ‘n Reeks voorbeelde van leerders se werk behoort ingesluit te word.

10. PROVINSIALE BEOORDELINGSPROSES
10.1 Onderwysers moet leerders identifiseer en voorberei vir die elimineringsrondtes binne die distrik en vir die provinsiale gebeurtenis, en seker maak dat al die leerders wat ingeskryf het, teenwoordig is en reg vir die provinsiale gebeurtenis en dat die nodige vervoer na en van die gebeurtenis gereël is.
10.2 Leerders moet hulle navorsing, vraelyste, onderhoude en transkripsies lank voor die tyd voltooi, seker maak dat hulle hulle portefeuljes van bewyse saamgestel het, hulle aanbiedings voltooi het, in staat is om enige vrae aangaande hulle projekte en navorsing te beantwoord en hulle persoonlike ervarings kan bedink en deel.
10.3 Die provinsiale beoordeling om 5 leerders en 2 onderwysers vir die nasionale kompetisie te kies, sal op 31 Augustus 2012 plaasvind. Die lokaal sal bevestig word via die kurrikulumadviseurs vir Sosiale Wetenskappe en Geskiedenis.
10.4 Die Nasionale Departement van Basiese Onderwys sal verantwoordelik wees vir die reis- en verblyfkoste van deelnemende leerders en onderwysers gedurende die nasionale kompetisie in Pretoria vanaf 28 September tot 1 Oktober 2012.

11. Vir verdere inligting, skakel asseblief me N Dodgen by tel. 021 467 9333 of e-posadres noleen.dodgen@pgwc.gov.za

12. Prinsipale word vriendelik versoek om die inhoud van hierdie minuut onder die aandag van die skoolbestuurspan en die betrokke onderwysers te bring.


GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2012:05:03