1. Die administrasie van aansoeke vir leerdervervoerdienste het ontaard in 'n bron van groot bekommernis aangesien projeksies aandui dat die behoefte vir leerdervervoerdienste (LVS) in die provinsie teen 'n geweldige pas toeneem. Die koste om hierdie toenemende behoefte aan te spreek het astronomiese vlakke bereik met die gevolg dat streng prosedures en beheermaatreëls ingestel moet word op 'n deurlopende basis om die proses van aansoeke te verfyn.
2. Behoorlike beplanning moet gedoen word deur prinsipale in oorleg met die Onderwys Distrik personeel wanneer nuwe leerders ingeskryf word en/of nuwe roetes ingestel moet word
3. 'n Volledig gemotiveerde aansoek vir leerdervervoer moet voltooi en by Hoofkantoor ingedien word teen 'n vooraf bepaalde datum om te verseker dat aansoeke betyds goedgekeur en geimplementeer word.
4. Nuwe roetes moet verkieslik aan die begin van 'n skooljaar ingestel word , derhalwe die versoek vir aansoeke vir nuwe dienste.
5. Skole moet ALLE aansoeke vir LVS dienste wat met ingang van 1 Januarie 2012 gelewer moet word op of teen 14 September 2011 aan die Onderwys Distrik, vir die aandag van die Adjunk Direkteur: Korporatiewe Dienste, in dien en die Onderwys Distrik moet verseker dat al die aansoeke voor of op 30 September 2011 aan die Hoofdirekteur: Distrikte (Vir aandag: Mnr R Larney) voorsien word. Aansoeke wat direk aan die Direktoraat: Inrigtingshulpbronondersteuning voorsien word, sal na die Onderwys Distrik terugverwys word.
6. Aansoeke wat laat ingedien word moet deur 'n aanvaarbare skriftelike verduideliking vergesel word.
7. Nadat goedkeuring verkry is, sal die Onderwys Distrik van die uitslag verwittig word.
8. Die Onderwys Distrik moet toesien dat al die relevante rolspelers betyds ingelig word.


GETEKEN: MM HARKER
ADJUNK DIREKTEUR-GENERAAL: ONDERWYS BEPLANNING
DATUM: 2011:08:24