1. Prinsipale, skoolbeheerliggame en IBB-bestuurders by onderwysdistrikskantore in die Wes-Kaapprovinsie word daaraan herinner dat die huidige dienstermyne van alle skoolbeheerliggame (SBL'e) in 2012 verstryk. Nuwe SBL'e sal dan verkies moet word by alle openbare skole. Selfs al het 'n onlangs verkose beheerliggaam nog nie sy volle driejaartermyn voltooi nie, moet daardie skool 'n nuwe beheerliggaam in 2012 verkies.

2. Die datum vir die 2012 -skoolbeheerliggaamverkiesings moet nog deur die Hoofde van Onderwysdepartemente-komitee bepaal word. 'n Versoek is gerig aan die Departement van Basiese Onderwys om die SBL-verkiesings te vervroeg na Maart 2012 om sommige van die probleme wat skole tydens die vorige SBL-verkiesings ervaar het te elimineer. Skole sal ingelig word van die datum van die 2012 SBL-verkiesings sodra daar 'n besluit hieroor geneem is.

3. 'n Provinsiale kiesspan, gelei deur mnr Redewan Larney (tel. 021 467 2337) is gekonstitueer om die verkiesingsaktiwiteite van die distriks- en skoolkiesspanne in die Wes-Kaap te koördineer en te moniteer.

4. Prinsipale word vriendelik versoek om onverwyld te begin voorberei vir die 2012 SBL-verkiesings deur skoolverkiesingspanne wat bestaan uit opvoeders en nie-opvoeders wat by die skool in diens is aan te stel. Ouers en leerders mag ook op die skoolverkiesingspan dien. Prinsipale moet ouers aanmoedig om betrokke te raak by die beheerliggaamverkiesing en die nuus te versprei sodat geskikte kandidate vir die SBL gevind kan word.

5. Addisionele verkiesingsverantwoordelikhede van elke prinsipaal en skoolverkiesingspan is as volg:

  • Die aanstelling van 'n kiesbeampte, wat die prinsipaal van 'n ander skool is, wat deur die distrikskiesbeampte aangestel is.
  • Die voorbereiding van 'n kieserslys van al die verkiesbare stemgeregtigdes in die skool volgens die verskillende komponente van die SBL, en dit beskikbaar te hê by alle SBL-verkiesingsvergaderings
  • Die kennisgewing op skrif aan alle ouers, nie minder as 21 dae voor die datum van die verkiesing nie, van die datum, stemtye en lokaal vir die SBL-verkiesing
  • Daar moet verseker word dat die SBL-verkiesing goed geadverteer word deur promosieleesstof wat deur die WKOD verskaf word en interne inligting wat deur die skool berei is te versprei en ten toon te stel.
  • Personeel moet voorsien word om die kiesbeampte by te staan, waar nodig
  • Ouers en personeel moet voorsien word van inligting oor die verantwoordelikhede en pligte van 'n SBL.
6. Alle openbare skole is in besit van die wetgewende maatreëls betreffende beheerliggame en die wysigings soos gepubliseer in die Buitengewone Provinsiale Koerant in 2008. Indien daar enige verdere wysigings aan die maatreëls gemaak word, sal skole en ander betrokkenes so spoedig moontlik van daardie inligting voorsien word.

7. Prinsipale van openbare skole sal weereens opgelei word as kiesbeamptes, en sal verantwoordelik wees vir die bestuur van SBL-verkiesings. Opleiding sal verskaf word deur die distrikskiesbeamptes en verdere gegewens sal mettertyd aan skoolhoofde bekendgestel word.

8. Die verkiesing van skoolbeheerliggame is 'n groot en omvattende taak en die WKOD maak staat op die samewerking van elkeen betrokke om daarvan 'n sukses te maak. Indien u verdere inligting verlang, kontak asseblief mnr I Morkel by tel. 021 467 2768, of mnr R Larney by telefoon 021 467 2337.


GETEKEN: PA VINJEVOLD
HOOF: ONDERWYS
DATUM: 2011:08:29