1. Inleiding

Die Wes-Kaap Onderwysdepartement (WKOD) beskou onafhanklike skole as belangrike vennote in die onderwys van die Wes-Kaap. Die WKOD-hoofkantoor en sy onderwysdistrikskantore deel die verantwoordelikheid om onafhanklike skole te moniteer en te ondersteun. Die Direktoraat: Inrigtingsbestuur en Beheerbeplanning (IBBB) het die opdrag ontvang om alle funksies met betrekking tot onafhanklike skole te koördineer.

Die WKOD het 'n goeie werkverhouding met die Vereniging van Onafhanklike Skole in Suider Afrika (VOSSA) en die Wes-Kaapse Gesamentlike Skakelkomitee (GSK) in belang van die versekering van gehalteonderrig vir al ons leerders.

Hoofkantoor- en distrikskantoorbeamptes besoek onafhanklike skole om ondersteuning, gehalteversekering en erkenning van goeie praktyk te verskaf.

Hierdie minuut moet saamgelees word met minute en omsendbriewe wat na onafhanklike skole gestuur is in 2010.

Die hersiene Regulasies betreffende die Registrasie van en Subsidies tot Onafhanklike Skole sal beskikbaar wees in September 2011 en sal van toepassing wees vanaf Januarie 2012.

2. Die infasering van onderwysers as opsieners vir die nasionale senior sertifikaat-eksamen.
Omsendbrief 0015/2011, van 1 Junie 2011, saam met die Assesseringsbestuursminuut 0009/2010 van 12 Julie 2010, het al die Nasionale Senior Sertifikaat- (NSS-)eksamensentrums ingelig oor die infasering van onderwysers as opsieners vir die NSS-eksamens.
3. Umalusi
3.1 Die rol van Umalusi is om te verseker dat daar voldoen word aan die akkreditasievereistes vir registrasie van elke onafhanklike skool.
3.2 Umalusi doen gehalteversekering van die hele Nasionale Senior Sertifikaat-eksamenproses.
3.3 Umalusi akkrediteer nie skole wat die ACE-, Delta- en Brainlines-benadering volg nie, aangesien hulle kurrikulums en slaagvereistes nie met dié van Umalusie ooreenstem nie.
3.4 Dit is die plig van individuele skole om by Umalusi aansoek te doen om akkreditasie.

4. WKOD-omsendbriewe en -minute
Minute en omsendbriewe wat betrekking het op gewone openbare, onafhanklike en spesiale skole is beskikbaar op die WKOD-webtuiste by http://wced.school.za

5. Kontakbesonderhede van Hoofkantoordirektorate en distriksbeamptes ten opsigte van Onafhanklike skole, kan gevind word in die aangehegte Bylae.

6. Prinsipale word vriendelik versoek om die inhoud van hierdie minuut onder die aandag van alle betrokkenes te bring.


GETEKEN: JH LYNERS
ADJUNK-DIREKTEUR-GENERAAL: INRIGTINGSONTWIKKELING EN -KOÖRDINERING
DATUM: 2011:09:02

Bylae  (grootte: 56 KB)