1. In sy strewe om gehalte-opvoeding aan alle kinders in die provinsie te verskaf, is die Wes-Kaap Onderwysdepartement voortdurend besig om daardie aspekte van die skoollewe wat verbeter kan word om onderwys te verbeter, te identifiseer en reg te stel. Een aspek is die beskerming en die produktiewe gebruik van amptelike skoolure. Skole wat voortdurend leerderprestasie verbeter, het dit geïdentifiseer as 'n groot faktor in hul sukses.

2. Die WKOD wil ook graag reageer op versoeke van ouers oor skoolure wat gedurende eksamentye van toepassing is. Die WKOD het talle klagtes ontvang van ouers en besorgde burgers omdat leerders skole vroeg verlaat of selfs vir twee tot drie dae op 'n keer nie die skool bywoon nie vanweë besluite deur skole oor bywoning tydens eksamens. Hierdie besluite maak dit moeilik vir ouers en versorgers om toesig te hou oor en reisreëlings vir hul kinders te tref. Daarbenewens wil die WKOD ook verseker dat onderwysers wie se eie kinders deur veranderinge aan skoolbywoningstye tydens eksamens geraak word, nie gedwing word om minder tyd aan onderrig in hul klasse te bestee om hul eie kinders te vervoer nie. Ten einde alle betrokkenes te help, is daar 'n behoefte aan eenvormigheid hieroor in die hele provinsie.

3. Die volgende bywoningsvereistes geld dus gedurende die September Graad 12 voorbereidende eksamen, die finale Nasionale Senior Sertifikaat (NSS)-eksamen, die September-eksamen en assessering vir graad 1-11, en die 4de kwartaal eksamens en assessering vir graad 1-11:
3.1 September Graad 12 proefeksamen:

  • Slegs Graad 12-leerders skryf 'n volskaalse eksamen in die derde kwartaal van die skooljaar. Hierdie eksamen is bedoel om leerders bloot te stel aan die finale eksamentoestande en hul gereedheid vir die finale eksamen te assesseer.
  • Die September-eksamen mag nie vroeër as 12 September 2011 begin nie.
  • Elke moontlike poging moet aangewend word om twee vraestelle of vakke per dag op die eksamenrooster in te pas om die lengte van die eksamentydperk te beperk. Byvoorbeeld: Afrikaans Vraestel 1 en Vraestel 2 op dieselfde dag.
  • Dit word van alle Graad 12-leerders, insluitende kosgangers, verwag om die skool tot en met die laaste dag van die 3de kwartaal by te woon.
  • Slegs Graad 12-leerders mag vroeër verdaag word nadat hulle die laaste vraestel van die dag geskryf het, maar nie vroeër as 13:00 nie. Geen studieverlof word toegelaat nie.
  • Die September-eksamenrooster vir graad 12 moet aan die betrokke IBB-bestuurder voorgelê word vir goedkeuring.
  • Die skool se toesigrooster moet op so 'n wyse opgestel word dat dit nie klasse in die laer grade ontwrig nie.
3.2 Die finale NSS-eksamen vir graad 12:

Omsendbrief 7 van 2011 verskaf inligting oor die reëlings vir die Oktober-Desember 2011 NSS-eksamen. Die laaste verpligte normale skooldag vir graad 12-leerders is 14 Oktober 2011.
3.3 September-eksamen en assessering vir graad 1-11:

  • Alle Graad 1-11-leerders word blootgestel aan verskeie eksamens en assesserings gedurende die 3de kwartaal. Dit mag toetse, praktiese assesseringstake en deurlopende assessering in die klas insluit.
  • Dit word dus van alle graad 1-11 leerders, insluitende kosgangers, verwag om die hele kwartaal vir die volle skooldag by die skool wees.
  • Onderwysers moet ook verseker dat leerders die minimum aantal assesserings- take per vak voltooi.
3.4 4de kwartaal eksamen en assessering vir graad 4-11:

  • Behalwe vir Graad 12-leerders word dit van alle leerders verwag om die skool elke dag, vir die hele kwartaal, by te woon.
  • Leerders mag nie afwesig wees op dae wanneer hulle nie eksamen skryf nie.
  • Die eksamens vir Graad 4-11-leerders mag nie vroeër as 18 November 2011 begin nie.
  • Gedurende hierdie tydperk mag leerders nie vroeër as 13:00 verdaag nie.
  • Leerders is verplig om by die skool te wees vanaf die normale aanvangstyd van die skooldag en moet nie net voor die begin van die eksamen opdaag nie.
  • Na die voltooiing van die eksamen word dit van leerders verwag om die skool tot en met 9 Desember 2011 by te woon. Skole word versoek om te beplan vir die post-eksamenperiode en oriëntering van leerders vir die volgende skooljaar in te sluit
4. Skoolhoofde word versoek om hierdie reëlings duidelik en ondubbelsinnig aan alle leerders, ouers en opvoeders te kommunikeer sodat geen ruimte bestaan vir misverstand nie.

5. Indien alle skole aan die bogenoemde voldoen kan ons die veiligheid en akademiese ontwikkeling van al ons kinders verseker.


GETEKEN: L ROSE
ADJUNK DIREKTEUR-GENERAAL:INSTITUSIONELE ONTWIKKELING EN KOÖRDINERING
DATUM: 2011:06:23