| 1. |
Sedert 2003 het die Wes-Kaap Onderwysdepartement vier prestasiebestuurstelsels behartig wat verband hou met seniorbestuurdienste, opvoeders en staatsdienspersoneel. |
| 2. |
Implementering van die vier prestasiebestuurstelsels is tans 87%, wat 'n groot verbetering is op vorige implementeringspersentasies. Alhoewel ons departement hierdie hoë algemene voldoeningpersentasie behaal het, wil ons nietemin onderstreep hoe belangrik dit is om die doeltreffendheid en effektiwiteit van die proses te verseker. |
| 3. |
Om die lynbestuurders te help om doeltreffend te beplan, heg ons die jaarlikse 2012 kalenders vir die PPBOS, PBOS en GGBS aan. Hulle verskaf die vereiste prosedures en die relevante keerdatums. |
| 4. |
Prestasiebestuur is 'n stelsel wat organisatoriese strategieë en doelwitte skakel aan sub-eenheiddoelwitte en dan aan individuele beroepe, en is bedoel om rigting te gee aan individuele prestasie en dit te verbeter, om sodoende organisasie en institusionele doeltreffendheid te verhoog. |
| 5. |
Deurlopende prestasiebestuur help met
- die verbetering van 'n kultuur van uitnemende prestasie;
- die verbetering van bewustheid en begrip van verwagtings;
- die verbetering van kommunikasie;
- die aansporing tot billike en objektiewe assessering;
- die verskaffing van geleenthede vir ontwikkelingsbehoeftes;
- die proaktiewe hantering van onbevredigende prestasie;
- die leiding en ondersteuning van werknemers; en
- die verskaffing van 'n grondslag vir toekomstige besluite.
|
| 6. |
Dit is die verantwoordelikheid van die lynbestuurder (toesighouer) en die werknemer om te verseker dat 'n prestasieooreenkoms bestaan, indien dit 'n voorvereiste is van die toepaslike prestasie-instrument. Dit is noodsaaklik dat al die lynbestuurders en werknemers seker maak dat prestasie-evaluerings gereeld plaasvind.l Alle werknemers, of hulle permanent of op kontrak aangestel is, is onderhewig aan 'n prestasie-evaluering, en die bepaling van elke prestasieaanslag moet op bewyse gebaseer wees. |
| 7. |
Versuim deur lynbestuurders of werkgewers om die vereiste dokumentasie voor te lê, kan daarop uitloop dat 'n werknemer nie 'n betalingsvordering of 'n prestasiebonus (in die geval van staatsdienspersoneel) ontvang nie. Indien die bestuurder of die werknemer agterlosig is in hierdie verband, kan daar strafgevolge wees vir die betrokke persoon. |
| 8. |
Dit is die verantwoordelikheid van alle lynbestuurders en werkgewers om seker te maak dat hersiening en finale evaluerings plaasvind soos bepaal in die toepaslike prestasiebestuursinstrument. Dit is imperatief dat daar gebly word by die keerdatums van die vereiste dokumentasie. Versuim om aan hierdie keerdatums te voldoen, sal tot gevolg hê dat die betrokke werknemer(s) hulle betalingsvordering of prestasiebonus (in die geval van staatsdienspersoneel) kan verbeur. |
| 9. |
Bring asseblief die inhoud van hierdie minuut onder die aandag van alle personeel onder u toesig. |
GETEKEN: TS MATSELISO
HOOFDIREKTEUR: MENSEHULPBRONNE
DATUM: 2011:12:06
|
 |