| 1. |
Le ngcaciso imfutshane mayifundwe kunye neZiqendu 2.1.1. no-2.1.2 zeNgcaciso eMfutshane yeCandelo leeMviwo noLawulo 0001/2010: Isishwankathelo sazo zonke iimviwo zangaphandle neemvavanyo eziya kuqhutywa kwizikolo eziziiprayimari, kwizikolo eziziisekondari nakumaziko emfundo yabadala ngo-2010. Injongo yale ngcaciso imfutshane kukunika ingcaciso engaphezulu ngokulawulwa nokuqhutywa kweeMvavanyo zikaZwelonke zoNyaka (Annual National Assessments) (ANA) ezicwangciselwe u-2011. |
| 2. |
Ii-ANA ziya kubhalwa ukuqala nge-8 - 11 Februwari 2011. Le mihla ibhaliweyo iyavela kule thayimthebhile imiselweyo iqhotyoshelweyo apha. Ukungalandeli ngqo le mihla namaxesha kuya kuba kukutenxa kwinkqubo yokubhalwa kweemvavanyo (assessment irregularity). |
| 3. |
Izikolo mazikhumbule ukuba olu lusuku lwesikolo oluqhelekileyo kwaye ukufunda nokufundisa makuqhubeke emva kokuba uvavanyo lugqityiwe. |
| 4. |
Abafundi baya kubhala iimvavanyo zamabakala abebekuwo ngo-2010. Ngaloo ndlela, abeBakala 2 baya kubhala iimvavanyo zenqanaba leBakala 1, abeBakala 3 babhale iimvavanyo zenqanaba leBakala 2, abeBakala 4 baya kubhala iimvavanyo zenqanaba 3, abeBakala 5 babhale iimvavanyo zenqanaba leBakala 4, abeBakala 6 baya kubhala iimvavanyo zenqanaba leBakala 5, abeBakala 7 babhale iimvavanyo zenqanaba leBakala 6, baze abeBakala 10 babhale iimvavanyo zeBakala 9 (kwisampula yezikolo). Abafundi abaphinda ibakala baya kubhala uvavanyo lwenqanaba elifanayo oontanga babo abalubhalayo kwibakala elo. |
| 5. |
ISebe leMfundo esiSiseko (Department of Basic Education) (DBE) lichonge isampula yezikolo eziyi-202 ezifundisa amaBakala 3 nele-6, kwanezikolo eziyi-52 ezifundisa iBakala 9, kweli phondo ukwenzela ukuba kuqhutywe ngokuzimeleyo iimvavanyo nokumodareyithwa kweziphumo. Iinqununu zezi zikolo sezazisiwe malunga noku. |
| 6. |
Zonke izikolo ezingeyonxalenye yale sampula ingasentla yezikolo ziya kuba zithatha inxaxheba kwii-ANA zamaBakala 1 - 6, eziqhutywa phantsi kweliso leekomiti zolawulo zezikolo (school management teams). |
| 7. |
Njengoko olu iluvavanyo lukazwelonke, ukubeka esweni kuya kwenziwa ngamagosa e- ofisi yesithili semfundo, amagosa ka Ndlukulu ngokunjalo nangabameli beSebe iDBE. |
| 8. |
Ii-ofisi zezithili zemfundo ziya kusebenzisana nezikolo ekuzisweni, ekulawuleni nasekuqhutyweni kwee-ANA ngoJanuwari 2011. |
| 9. |
Iinqununu maziqinisekise ukuba zifumana inani elichanekileyo lezinto zokubhala uvavanyo kwibakala ngalinye, kwinkalo yesifundo nganye / kwisifundo nakulwimi lokufunda nokufundisa ngalunye. Kufuneka iinqununu ziqinisekise ukhuseleko nokuhlala kuyimfihlo kwamaphepha emibuzo nezinto eziza kusetyenziswa kuvavanyo ngawo onke amaxesha. |
| 10. |
Ukuthatha inxaxheba kwezi mvavanyo linyathelo elinye elisingise ekuphuculeni iziphumo zoLwazi lokuFunda nokuBhala noLwazi lokuBala lwabafundi bethu kwaye ke ngoko iinqununu ziyacelwa ziqinisekise ukuba ezi mvavanyo zimakishwa zize zimodareyithwe ngaphakathi nge-25 Februwari 2011. Ukumodareyitha kwesithili makube sekugqityiwe nge-11 Matshi 2011. |
| 11. |
Izikolo mazifake onke amanqaku amodareyithiweyo abo bonke abafundi kwinkalo/ isifundo ngasinye kwi Centralised Education Management Information Systems )(CEMIS) ungadlulanga owe-25 Matshi 2011. Kuphela yitotali yamanqaku kwinkalo/ kwisifundo ngasinye eya kufuneka. |
| 12. |
Ukunceda ekulungiseleleni abafundi kakuhle uvavanyo olulolu hlobo, imizekelo (exemplars) yeeMvavanyo zikaZwelonke zoNyaka zeemvavanyo zenqanaba lamaBakala 3 nelesi-6 isengakotshwa ngekhompyutha (can be downloaded) kweli ziko lewebhu leSebe iDBE http://www.education.gov.za. Klikha ku-Annual National Assessments kwikona ephezulu ngasekunene kwi-Curriculum News box ukufumana imizekelo. |
| 13. |
Kucelwa ngesihle amagosa ee-ofisi zezithili zemfundo neenqununu ukuba zazise okubhalwe kule ngcaciso imfutshane ootitshala bazo, abafundi kunye nabazali. |
ISAYINWE: NGU-SM NAICKER
INTLOKO: YESEBE LEMFUNDO
UMHLA: 2011:01:21
|
 |