| 1. |
Die Wes-Kaap Onderwysdepartement (WKOD) het 'n vennootskap gevorm met die Universiteit van Stellenbosch om TV-uitsendings direk uit te send na alle skole wat 'n graad 12-slaagkoers behaal het van minder as 60%, asook na geselekteerde Fokus- en Dinaledi skole. |
| 2. |
Die intervensie, bekend as Interaktiewe Telematiese Onderrig, sal voortgesit word met dieselfde 120 skole wat die uitsendings in 2010 ontvang het. |
| 2.1 |
Nuwe skole wat egter 'n graad 12-slaagkoers van minder as 60% in 2010 gehad het, en wat nou by hierdie projek ingesluit is, sal nie lewendige uitsendings ontvang nie. In die plek daarvan sal hulle kort na elke uitsending DVD's ontvang en toegang verkry tot die webtuiste sodat hulle vrae kan stel en bydraes kan lewer. |
| 2.2 |
Alle skole sal leerderondersteuningsmateriaal ontvang. (Sien lys van skole in die aangehegte
Bylae A.)
|
| 3. |
Telematiese onderrig is nie bedoel om normale onderrig te vervang nie. Dit is eerder gemik op die skep van 'n virtuele leeromgewing om leeraktiwiteit in graad 12 te ondersteun en te bevorder. |
| 4. |
Die volgende vakke met graad 12-inhoud sal op voorafbepaalde tye gebeeldsend word: Wiskunde, Fisiese Wetenskappe, Lewenswetenskappe, Rekeningkunde, Engels Eerste Addisionele Taal, Afrikaans Huis Taal en Geografie. Addisioneel sal daar telematiese ondersteuning wees vir graad 11-leerders gedurende September 2011 in dieselfde vakke as vir graad 12, maar wel met graad 11-inhoud. (Sien rooster vir uitsendings in die aangehegte Bylae B.) |
| 5. |
Graad 12-leerders en onderwysers by die 120 bestaande skole sal tydens die uitsendings met die aanbieder in die ateljee kan kommunikeer deur middel van die Internet of 'n selfoon. Leerders sal ook na die uitsendings vrae kan stel aan die aanbieder. Al die deelnemers sal toegang hê tot die vrae en antwoorde. |
| 6. |
Die aanbieders is leidende WKOD-onderwysers wat gekies is op grond van hulle bedrewenheid in hulle vakke. |
| 7. |
Vakonderwysers by elke skool moet die leerproses bestuur, monitor en fasiliteer in die tyd dat lesse deur leerders na skool gekyk word. |
| 8. |
Aangesien lesse na skoolure deur die week en op Sondae aangebied word, is dit uiters noodsaaklik dat prinsipale die reëlings met ouers van graad 11- en 12-leerders asook met hulle beheerliggame sal bespreek. |
| 9. |
Die leerders is nie die enigste wat uit hierdie proses voordeel gaan trek nie. Indien die proses goed bestuur word, sal sowel die skool as die gemeenskap daarby baat. |
| 10. |
Hierdie intervensie sal op 'n gereelde basis deur Hoofkantoorpersoneel en distriksbeamptes gemonitor word. |
| 11. |
Van prinsipale sal verwag word om weekliks verslag te doen van bywoning deur leerders, sowel as van die uitdagings en suksesse van die program. |
| 12. |
DVD's van die uitsending sal voor die eksamen aan skole gestuur word vir hersienings-doeleindes. |
| 13. |
Indien u enige navrae het oor hierdie inisiatief, neem asseblief die vrymoedigheid om enige van die volgende persone te skakel:
|
| 14. |
Ons sien daarna uit om hierdie interessante projek saam met u mee te maak. |
| 15. |
Prinsipale word versoek om die inhoud van hierdie minuut onder die aandag van alle betrokke personeel, graad 12-leerders en ouers te bring. |
GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2011:03:09
|
 |