1. Die Letterkundeondersteuningskomitee (LOK) nooi hiermee alle onderwysers van Afrikaans vir graad 12-leerders uit na die 2011-simposium, wat op Saterdag, 19 Februarie 2011 vanaf 08:30 tot 15:30 by die Universiteit van Wes-Kaapland aangebied sal word.
2. Die hoofdoel van die simposium is om die onderrig van letterkunde te ondersteun, maar daar sal ook 'n fokus wees op ander dissiplines, soos skryfwerk en grammatika. Een van die hoogtepunte vir 2011 is die aanbieding oor die onderrig van Afrikaans Eerste Addisionele Taal wat deur mev. Martie Venter, ervare eksterne moderator van Tweedetaalvraestelle, aangebied sal word.
3. Die simposiumprogram sal teen 17 Januarie 2011 beskikbaar wees op die VOO-webtuiste vir Afrikaans, http://curriculum.wcape.school.za/.
4. Die registrasiegeld vir die 2011-simposium is R100,00 per persoon. Persone wat belangstel, kan hierdie bedrag by die Stigting vir Bemagtiging deur Afrikaans (SBA) se rekening inbetaal (ABSA-tjekrekening, rekeningnommer 550145847, takkode 632005). Gebruik asseblief die akroniem LOK en die naam van die skool as 'n verwysing wanneer u die deposito betaal bv. LOK EERSTERIVIER SEKONDÊR. Die SBA sal verantwoordelik wees vir die administratiewe en logistieke reëlings vir die LOK-simposium.
5. Voornemende deelnemers aan die simposium moet die registrasievorm wat hierby ingesluit is (Bylae A) voltooi en dit faks, saam met bewys van betaling, aan me Christine Francke van die SBA by faksnommer 021 446 1012 teen nie later nie as 28 Januarie 2011. (Die SBA se telefoonnommer is 021 446 1376). Registrasie kan ook aanlyn gedoen word op die webtuiste www.afrikaans.com.
6. Om die organiseerders van die LOK-simposium te help, word onderwysers versoek om by die bogenoemde sperdatum te hou, aangesien geen laat inskrywings aanvaar sal word nie.
7. Let op dat daar in 2011 geen LOK-studiegidse beskikbaar sal wees nie. Elke deelnemer sal egter 'n R50-koopbewys as subsidie ontvang om enige een van die Vlymskerp-gidse aan te koop. Die Vlymskerp-gidse kos R100 elk.
8. Bring asseblief die inhoud van hierdie minuut onder die aandag van almal wat betrokke is.


GETEKEN: SM NAICKER
HOOF: ONDERWYS
DATUM: 2011:01:18

Bylae A: Registrasievorm  (grootte: 11m KB)