VERVALDATUM: 31 MAART 2012



1. Ingevolge die nasionale beleid en die regulasies van toepassing op die afneem van die Nasionale Senior Sertifikaat-eksamen, is dit van kardinale belang dat ALLE eksamens met integriteit afgeneem moet word.

2. Die praktiese eksamens van Nasionale Senior Sertifikaat Rekenaar-toepassingstegnologie en Inligtingstegnologie hou 'n hoë risiko in met betrekking tot die beveiliging van data. Dit is die geval omdat die eksamen afgelê word op dieselfde rekenaars wat gedurende lesse gebruik word en omdat lêers vanaf individuele rekenaars gekopieer moet word vir die eksaminatore. Dit is dus van kardinale belang dat die data beveilig moet word as ons die integriteit van hierdie eksamens wil verseker.

3. Hierdie minuut bevat baie spesifieke instruksies wat gevolg MOET word deur alle opsieners en ander personeel wat toegang het tot die eksamenlokale vir rekenaargebaseerde eksamens. Prinsipale en sentrumbestuurders, wat die eksamenbeamptes is, moet seker maak dat hierdie instruksies te alle tye uitgevoer word.

4. Hierdie minuut moet saamgelees word met die nasionale Departement van Basiese Onderwys se Omsendbrief E25 van 2009 en die Regulasies aangaande die Afneem, Administrasie en Bestuur van Assessering vir die Nasionale Senior Sertifikaat, Bylae G (Regeringskoerant No. 31337 van 29 Augustus 2008).

5. Die volgende bylaes is by hierdie minuut aangeheg. Maak asseblief seker dat u die instruksies vervat in die onderskeie bylaes gelees en verstaan het en, waar nodig, die betrokke kontrolelys voltooi het:
5.1 BYLAE A: Minimumvereistes vir die aanbieding van RTT en IT
5.2 BYLAE B: Rolle en verantwoordelikhede
5.3 BYLAE C: Kontrolelyste

6. Alle opsieners en onderwysers wat aangestel is om die praktiese eksamens vir Rekenaartoepassingstegnologie en Inligtingstegnologie af te neem moet die opleidingsessies wat deur die Wes-Kaap Onderwysdepartement (WKOD) georganiseer is, bywoon.

7. Let asseblief daarop dat die prinsipaal, die hoofopsiener en die Rekenaartoepassingstegnologie- en/of Inligtingstegnologie-onderwyser teenwoordig moet wees wanneer die finale CD's geskryf word. Hulle moet ook die kontrolelys (Bylae C) voltooi en onderteken.

8. 'n Maksimum van slegs twee eksamensessies word toegelaat. Die volgende is voorgestelde tydraamwerke vir die eksamensessies:
8.1 EEN SESSIE

BESKRYWING TYDSTOEDELING TYDSDUUR
Sit in rekenaarlaboratorium   08:30
Aanlogproses ("log on") en die herbenaming van eksamengids 15 minute 08:35 - 08:50
Leestyd 10 minute 08:50 - 09:00
Vraestel 1 (Prakties) 3 uur 09:00 - 12:00
Handel kontrole af, maak gidse bymekaar, kopieer CD's 120 minute (hang af van getal kandidate) 12:00 - 14:00
8.2 TWEE SESSIES

BESKRYWING TYDSTOEDELING EERSTE SESSIE TWEEDE SESSIE
Sit in rekenaarlaboratorium   07:30 13:00
Aanlogproses en die herbenaming van eksamengids 15 minute 07:35 - 07:50 13:05 - 13:20
Leestyd 10 minute 07:50 - 08:00 13:20 - 13:30
Vraestel 1 (Prakties) 3 uur 08:00 - 11:00 13:30 - 16:30
Handel kontrole af, maak gidse bymekaar, kopieer CD's, maak rekenaars skoon 120 minute (hang af van getal kandidate) 11:00 - 13:00 16:30 - 18:30 (2de sitting mag vroeër begin)

(Let asseblief daarop dat waar daar twee sessies is, kandidate en hulle ouers skriftelik van die reëlings in kennis gestel MOET word.)

9. NETWERKE
9.1 EWE-KNIE-NETWERKE verskaf nie dieselfde vlak van sekuriteit as bedienergebaseerde netwerke nie en word nie toegelaat nie. Skole moet hulle ontkoppel vir die duur van die eksamen en die rekenaars in losstaande modus gebruik word.
9.2 Waar BEDIENERGEBASEERDE netwerke onstabiel blyk te wees en/of die nodige sekuriteit nie gewaarborg kan word nie, moet hulle ontkoppel word en moet die rekenaars in losstaande modus gebruik word.

10. Op sommige netwerke is dit moontlik om 'n log by te hou van wie toegang tot watter gidse verkry het. Indien u netwerk hierdie fasiliteit het, moet dit gedurende die eksamen geaktiveer word en dan behou word na afloop van die eksamen ingeval navrae as gevolg van ongerymdhede ontstaan. Hierdie log-lêer moet op die CD gekopieer word saam met die kandidate se gidse.

11. Die Spoedendosseringstoets sal elektronies nagesien word en skole moet die kandidate se datalêers vir die Spoedendosseringstoets in 'n aparte gids skryf op die CD waarop die Rekenaartoepassingstegnologie se praktiese datagidse geskryf is.

12. WKOD-beamptes sal eksamenlokale voor die aflê van die eksamen besoek om seker te maak dat alle netwerke en losstaande werkstasies behoorlik opgestel is en dat al die instruksies wat in hierdie minuut vervat is, nagekom is.

13. As daar gedurende die afneem van die eksamen 'n kragonderbreking is, moet die volgende prosedure gevolg word:
13.1 Die sentrumbestuurder moet die plaaslike owerhede onmiddellik in kennis stel daarvan. Hy of sy moet ook, indien moontlik, probeer vasstel hoe lank die kragonderbreking sal voortduur.
13.2 Die WKOD moet onmiddellik verwittig word van die kragonderbreking.
13.3 Kandidate moet in die rekenaarlokaal bly totdat die kragtoevoer herstel is. Kandidate mag nie met mekaar kommunikeer terwyl hulle wag vir die kragtoevoer om herstel te word nie. Die tyd wat tydens die kragonderbreking verlore gaan, moet as addisionele eksamentyd toegelaat word.
13.4 Indien die kragtoevoer na twee uur nog nie herstel is nie, moet die eksamen herskeduleer word in konsultasie met die WKOD se Direktoraat: Eksamenadministrasie.
13.5 Die werk wat deur die kandidate voltooi is, moet ingehandig word en saam met die dokumente by die WKOD ingedien word.
13.6 In die geval van die kansellasie van 'n eksamen as gevolg van 'n kragonderbreking, moet die kandidate die rugsteunvraestel aflê op 'n ander datum soos deur die nasionale Departement van Basiese Onderwys bepaal.
13.7 In gevalle waar twee eksamensessies gedurende 'n eksamen geskeduleer is, naamlik in die oggend en in die middag, is bogemelde prosedure van toepassing op albei sessies.

14. In die geval van rekenaars wat breek gedurende die eksamen, moet die volgende prosedure gevolg word:
14.1 Kandidate moet onmiddellik oorgeskuif word na rugsteuntoerusting en moet toepaslike addisionele tyd gegee word.
14.2 Geen addisionele tyd sal toegelaat word vir werk wat verloor is omdat dit nie behoorlik gestoor is nie.
14.3 Kandidate moet die vraestel binne die gegewe tyd afhandel.
14.4 Die omvang van die rekenaaronderbreking en die aksie wat onderneem is om dit reg te stel moet gerapporteer word.

15. Indien daar nie aan die instruksies soos vervat in hierdie minuut voldoen word nie, kan dit lei tot dissiplinêre stappe en moontlike formele klagte ingevolge die toepaslike wetgewing.

16. Tree gerus met mnr I Francis (tel 021 467 2549 of e-posadres ighsaan.francis@pgwc.gov.za in verbinding vir meer inligting of hulp.

17. Maak asseblief seker dat 'n afskrif van hierdie minuut voorsien word aan alle onderwysers en opsieners van Rekenaartoepassingstegnologie en Inligtingstegnologie.


GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2011:10:07

"Government Gazette No. 31337 of 29 August 2008: Annexure G"  (grootte: 217 KB)
Byale A: Praktiese eksamens in Rekenaartoepassingstegnologie (RTT) en Inligtingstegnologie (IT)  (grootte: 16 KB)
Byale B: Rolle en verantwoordelikhede  (grootte: 31 KB)
Byale C: Kontrolelyste  (grootte: 57 KB)