| 1. |
Hierdie minuut moet saamgelees word met artikel 2.1.1 en 2.1.2 van Eksamens en Administrasieminuut 0001/2010: Opsomming van alle eksterne eksamens en assesserings wat in primêre skole, sekondêre skole en volwassene onderwyssentrums afgeneem gaan word: 2010. Die doel van hierdie minuut is om verdere inligting te verskaf oor die bestuur en afneem van die Jaarlikse Nasionale Assesserings (JNA) geskeduleer vir 2011. |
| 2. |
Die JNA sal afgeneem word van 8 tot 11 Februarie 2011. Die datums verskyn op die aangehegte voorgeskrewe rooster. Versuim om by die voorgeskrewe datums en tye te hou, sal 'n assesseringsonreëlmatigheid wees. |
| 3. |
Skole moet in gedagte hou dat hierdie 'n gewone skooldag is en dat leer en onderrig moet voortgaan na die voltooiing van die assesserings. |
| 4. |
Leerders sal die toetse skryf van die graad waarin hulle in 2010 was. Graad 2 sal dus graad 1-vlak toetse skryf, graad 3 sal graad 2-vlak toetse skryf, graad 4 sal graad 3-vlak toetse skryf, graad 5 sal graad 4-vlak toetse skryf, graad 6 sal graad 5-vlak toetse skryf, graad 7 sal graad 6-vlak toetse skryf, graad 8 sal graad 7-vlak toetse skryf, graad 9 sal graad 8-vlak toetse skryf, en graad 10 sal graad 9-vlak toetse skryf (steekproef van skole). Leerders wat 'n graad herhaal, sal dieselfde vlak toetse skryf as wat hulle eweknieë in die graad skryf. |
| 5. |
Die Departement van Basiese Onderwys (DBO) het 'n steekproef van 202 skole in die provinsie uitgesoek wat graad 3 en 6 aanbied, sowel as 52 skole wat graad 9 aanbied vir onafhanklike afneem van toetse en moderering van uitslae. Die prinsipale van hierdie skole is alreeds in kennis gestel. |
| 6. |
Al die skole wat nie deel vorm van die bogenoemde steekproef skole nie sal deelneem aan die JNA vir graad 1 tot 6, wat afgeneem word onder die toesig van die skoolbestuurspanne. |
| 7. |
Aangesien dit 'n nasionale assessering is, sal monitering deur distriksbeamptes, provinsiale beamptes sowel as deur verteenwoordigers van die DBO behartig word. |
| 8. |
Onderwysdistrikte sal met skole kommunikeer ten opsigte van die verspreiding, bestuur en afneem van die JNA gedurende Januarie 2011. |
| 9. |
Prinsipale moet seker maak dat hulle die korrekte hoeveelheid toetsmateriaal per graad, leerarea en taal van leer en onderrig ontvang. Daar word van prinsipale verwag om die veiligheid en vertroulikheid van toetsmateriaal te alle tye te verseker. |
| 10. |
Deelname aan hierdie assesserings is 'n stap in die rigting van verbeterde geletterdheid- en gesyferdheidsuitslae van ons leerders en daarom word prinsipale versoek om seker te maak dat die toetse intern nagesien en gemodereer word teen 25 Februarie 2011. Distriksmoderering moet voltooi word teen 11 Maart 2011. |
| 11. |
Skole moet die gemodereerde punte van alle leerders per leerarea op die Sentrale Onderwysbestuursinligtingstelsel (SOBIS) ingesleutel het teen 25 Maart 2011. Slegs die totale punt per leerarea sal benodig word. |
| 12. |
Om leerders goed voor te berei op 'n assessering van hierdie aard, kan voorbeelde van die Jaarlikse Nasionale Assesserings vir graad 3 en 6 van die DBO-webtuiste te http://www.education.gov.za afgelaai word. Kliek op Annual National Assessments in die hoek bo regs van die Curriculum News-blok om die voorbeelde te sien. |
| 13. |
Onderwysdistriksbeamptes en prinsipale word vriendelik versoek om die inhoud van hierdie minuut onder die aandag van hulle personeel, leerders en ouers te bring. |
GETEKEN: SM NAICKER
HOOF: ONDERWYS
DATUM: 2011:01:21
|
 |