1. Die Wes-Kaap Onderwysdepartment (WKOD) wil graag u aandag vestig op die prosedures wat gevolg moet word tydens die afneem van die finale praktiese eksamen vir Ontwerp en Visuele Kunste.
2. Die 2011 finale praktiese eksamenvraestelle vir Ontwerp en Visuele Kunste (Ontwerp, Vraestel 2 en Praktiese en Visuele Kunste, Vraestel 2) sal bestaan uit die volgende twee afdelings:
Afdeling A: Bronboek of Werkboek
Afdeling B: Die Kunswerk.
3. Hierdie vraestelle is alreeds afgelewer by alle skole en inrigtings of kunssentrums wat Ontwerp en/of Visuele Kunste aanbied. Skole en kunssentrums moet dan verseker dat alle kandidate wat Ontwerp en/of Visuele Kunste aanbied die vraestel ontvang het om hulle in staat te stel om die inligting oor Afdeling A van die vraestel te kry. Kandidate moet by ontvangs van die vraestel 'n register onderteken.
4. Kandidate moet voldoende navorsing voltooi en alle materiaal vir Afdeling A van die eksamenvraestel saamvoeg. Afdeling A kan geadministreer word óf tydens onderrigtyd óf na-ure.
5. Afdeling A van die eksamen moet afgehandel word voordat afdeling B van die praktiese eksamen aangepak word.
6. Afdeling B moet voltooi wees teen 28 Oktober 2011.
7. Afdeling B van die eksamen moet voltooi word in die eksamenlokaal tydens die normale onderrigtyd en nie na-ure of oor naweke nie. Daar word voorgestel dat bloksessies van 4 tot 6 uur oor 'n aantal dae gereël moet word totdat alle kandidate hulle kunswerke of produk klaarkry. Die toegekende 18 uur moet nie oorskry word nie. Interne reëlings moet getref word by elke skool of sentrum om die tegniese aktiwiteite te akkommodeer wat deur die spesifieke kunsdissipline, bv. keramiek, benodig word.
8. Die Visuele Kunste- en/of Ontwerp-onderwyser moet streng toesig hou gedurende die afneem van die eksamen.
9. Distrikskantore moet seker maak dat skole opsieners aanstel addisioneel tot die Ontwerp en Visuele Kunste-onderwyser, om seker te maak dat Afdeling B by die skool en onder streng gekontroleerde toestande voltooi word.
10. Kandidate mag nie alleen gelaat word terwyl hulle aan Afdeling B werk nie, en word ook nie toegelaat om onvoltooide kunswerke of produkte huis toe te neem nie. Alle onvoltooide kunswerke of produkte moet by die skool agtergehou word tot die volgende sessie op die rooster.
11. Die WKOD sal datums skeduleer vir nasien en moderering om te verseker dat alle praktiese werk nagesien en gemodereer is teen 25 November 2011.
12. Indien daar enige navrae is oor die afneem van die finale praktiese eksamen vir Ontwerp en Visuele Kunste, kan dit gerig word aan mnr. Leon Buchner by tel. 021 467 2556 of 082 824 8871 of by e-posadres Leon.Buchner@pgwc.gov.za.
13. U samewerking in hierdie verband sal opreg waardeer word.


GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2011:09:26