1. Dit is aangenaam vir die Wes-Kaap Onderwysdepartement (WKOD) om te kan aankondig dat 230 beurse beskikbaar gestel gaan word aan lede van skoolbestuurspanne wat gretig is om die Gevorderde Onderwyssertifikaat: Skoolleierskap (GOS: SL) te behaal.

2. Die GOS: SL-kursus is daarop ingestel om onderwys in skole te verbeter deur skoolbestuurspanne se leierskap- en bestuursvaardighede te ontwikkel.

3. Die volgende persone mag aansoek doen om die GOS: SL-beurs:

  1. Prinsipale op ROKW 13 (M + 3) of hoër
  2. Adjunkprinsipale op ROKW 13 (M+3) of hoër
  3. Departementshoofde op ROKW 14 (M+4) of hoër
4. Aansoeke sal oorweeg word indien die aansoeker aan al die volgende voorwaardes voldoen:

  1. moet permanent in diens wees van die WKOD
  2. moet voldoen aan die toelatingsvereistes van die toepaslike universiteit (sien Bylae A).
  3. mag nie in ontvangs van enige ander staatsbeurs of ander beurs wees nie
  4. mag nie by registrasie by enige ander universiteit geregistreer wees nie
  5. moet vir die volle duur van die kursus registreer
5. Die GOS: SL-kursus sal aangebied word op 'n deeltydse basis oor 'n periode van twee jaar, van Januarie 2012 tot Desember 2013. Die kursus sal lei na 'n NKR vlak 6-kwalifikasie en sal netwerkopleiding sowel as kontaksessies gedurende skoolvakansies behels. (Sien Bylae A).

6. Elke beurs sal registrasie- en onderriggeld dek en sal direk inbetaal word op die bankrekeninge van die betrokke hoëronderwysinrigting.

7. Akkommodasie, gereël deur óf die gekontrakteerde universiteit óf die WKOD, sal slegs verskaf word aan onderwysers wat vanaf landelike gebiede reis.

8. Waar van toepassing, sal vervoerkoste na en van die opleidingsentrum deur die WKOD gedek word, op voorwaarde dat onderwysers vanaf dieselfde dorp of skool saamry.

9. Onderwysers is verantwoordelik vir die koste van hulle leerondersteuningsmateriaal waar van toepassing.

10. Onderwysers wat vir die kursus en beurs oorweeg wil word, word versoek om die aangehegte Bylae B- en C-vorms te voltooi en te sorg dat albei teen 31 Oktober 2011 die volgende adres bereik:

  Hoof: Onderwys
Vir aandag: mnr G de Bruyn/me JC Titus
Direktoraat: Kaapse Onderrig-en-Leierskapinstituut
Wes-Kaap Onderwysdepartement
Privaatsak X14
KUILSRIVIER
7579

11. Aansoeke kan ook per hand afgelewer word en in die houtkis gemerk "Onderwyserontwikkeling" op die grondvloer van die Uitvoerendekunstegebou oorkant die Kaapse Onderrig-en-Leierskapinstituut se Administrasiegebou in Ou Nooiensfonteinweg, Kuilsrivier, geplaas word.

12. Aansoekvorms en ooreenkomsvorms aangeheg. Afskrifte van hierdie vorms is ook beskikbaar by die WKOD se Kliëntediensafdeling op die tweede vloer van Grand Central Towers in Kaapstad en die Direktoraat: Kaapse Onderrig-en-Leierskapinstituut op die eerste vloer van die Uitvoerendekunstegebou.

13. Let asseblief daarop dat

  • geen onvolledige of onleesbare aansoeke in aanmerking geneem sal word nie, en
  • geen aansoeke per faks aanvaar sal word nie.
14. Aansoeke wat ná die sluitingsdatum ontvang is, sal nie aanvaar word nie.

15. LET ASSEBLIEF OP:

  • Die naam van die Universiteit van u keuse (Universiteit van Stellenbosch, Universteit van Kaapstad of Universiteit van die Wes-Kaap) moet duidelik genoem word op die aansoekvorm.
  • Plasing sal afhang van onderwysdistrikte, bv. geografiese gebied, aanbieding van kontaksessie per hoëronderwysinrigting (HOI) en die getal aansoeke wat per distrik en HOI ontvang is, soos per Bylae A.
  • Gewaarmerkte afskrifte van u matrieksertifikaat, akademiese en/of professionele kwalifikasie(s) en identiteitsdokument moet u aansoek vergesel.
16. Die Beurskomitee sal alle aansoeke oorweeg en prioritiseer en dan aanbevelings oor die toekenning van die beurse doen.

17. Prinsipale en adjunkprinsipale sal voorkeur geniet.

18. Elke suksesvolle aansoeker sal 'n formele ooreenkoms met die WKOD moet aangaan om 'n jaar se diens te lewer vir elke jaar waarvoor die beurs toegeken is, en om te voldoen aan al die ander bepalings wat in die ooreenkoms uiteengesit is.

19. Maak asseblief seker dat die inhoud van hierdie minuut onder die aandag van alle lede van skoolbestuurspanne gebring word.


GETEKEN: BK SCHREUDER
ADJUNK-DIREKTEUR-GENERAAL: KURRIKULUM- EN ASSESSERINGSBESTUUR
DATUM: 2011:10:05

Bylae A: "2012 Bursaries available for Advanced Certificate in Education: School Leadership"  (grootte: 34 KB)
Bylae B: Aansoek om studiebeurs  (grootte: 106 KB)
Bylae C: "Agreement on payment of tuition fees from state funds"  (grootte: 34 KB)