1. Die Nasionale Onderwystoekennings erken voortreflikheid en 'n hoë graad van professionalisme, en voorsien die onderwysgemeenskap van die geleentheid om die prestasies van uitmuntende opvoeders te erken. Voorts plaas hulle die kollig op die buitengewone werk wat oor die algemeen deur opvoeders verrig word.
2. Die Wes-Kaap Onderwysdepartement (WKOD) is dus trots om die provinsiale toekenningsgeleentheid vir die Nasionale Onderwystoekennings aan te bied en te organiseer, as voorloper van die 12de jaarlikse Nasionale Onderwystoekenning-seremonie.
3. Die onderskeie toekenningskategorieë is soos volg:

  UITNEMENDHEID IN LAERSKOOLONDERRIG
UITNEMENDHEID IN SEKONDÊRESKOOLONDERRIG
UITNEMENDHEID IN PRIMÊRESKOOLLEIERSKAP
UITNEMENDHEID IN SEKONDÊRESKOOLLEIERSKAP
UITNEMENDHEID IN GRAAD R-ONDERRIG
UITNEMENDHEID IN SPESIALEBEHOEFTES-ONDERWYS
UITNEMENDHEID IN BASIESE ONDERWYS EN OPLEIDING VIR VOLWASSENES (Vlakke 1 - 4 in die AOO-band alleenlik)
LEWENSLANGE PRESTASIETOEKENNING
4. Die elektroniese weergawe van die Inligtingsgids wat die nominasievorms bevat, is aangeheg.
5. Drukstukke van die Inligtingsgids met die nominasievorms daarin, sal alle WKOD-inrigtings, met inbegrip van OOV-sentrums en geregistreerde graad R-terreine bereik teen die begin van die 3de kwartaal.
6. Alle onderwysers word uitgenooi om nominasies voor te lê (gebaseer op die kriteria en formaat ingesluit in die inligtingshandleiding) aan hulle prinsipale of sentrumbestuurders.
7. Prinsipale en sentrumbestuurders word versoek om die voltooide nominasievorms aan hulle onderskeie onderwysdistrikskantore te stuur vir die aandag van die distrikskoördineerders. Skakel asseblief met een van die volgende distrikskoördineerders indien u meer inligting benodig:

  1. Eden & Sentrale Karoo: Mnr Eric Magodla, tel. 044 8038358 /083 508 4933
  2. Kaapse Wynland: Mnr Alton Koenze, tel. 023 348 4673 / 082 462 8916
  3. Overberg: Mnr Japie Bailey, tel. 028 212 3634 / 083 707 2197
  4. Weskus: Mnr Johannes Mouton, tel. 022 4822737 / 083 289 8437
  5. Metro-Suid: Me Karen Dudley, tel. 021 370 2000 / 082 691 6768
  6. Metro-Oos: Me Desiree Watson, tel. 021 900 7195 / 078 531 7632
  7. Metro-Noord: Mnr Trevor Adams, tel. 021 938 3016 / 083 653 6815
  8. Metro-Sentraal: Dr Jeffrey Martin, tel. 021 514 6730 / 082 642 7714
8. U aandag word gevestig op die volgende uittreksels uit die nominasiehandleiding:

"Die prinsipaal/sentrumbestuurder moet 'n nominasievergadering belê wat die skoolbeheerliggaam(SBL) of sentrumbeheerliggaam moet insluit, waar die nominasieproses bespreek word."

"Die personeel en die SBL-lede moet die kriteriavereistes van elke kategorie bestudeer en eienskappe of kenmerke opstel vir hulle genomineerdes wat sal ooreenstem met bepaalde gegewe kriteria."

"Wanneer geskikte onderwysers/spanne genomineer is, moet hulle name op die gegewe nominasievorms ingevul word."

"Distriksbeamptes mag ook nomineer in konsultasie met die skool/gemeenskap."

9. 'n Maksimum van vyf onderwysers per kategorie mag 'n span vorm.
10. Prinsipale en sentrumbestuurders moet die nominasievergadering teen nie later nie as 20 Julie 2011 hou. 'n Notule moet van die vergadering bygehou word en by die kringbestuurder ingedien word vir die aandag van die betrokke distrikskoördineerder.
11. Prinsipale en sentrumbestuurders moet ook die aangehegte Bylae A voltooi en voorlê, nie later nie as 22 Julie 2011, aan die IBB-bestuurder, vir die aandag van die betrokke distrikskoördineerder.
12. Die sluitingsdatum vir die indien van nominasievorms by die distrikskoördineerder is 5 Augustus 2011. . [Closing date updated Friday, 29 July 2011]
13. Die nominasievorm is ook beskikbaar op die Thutong Portal by www.thutong.doe.gov.za/nationalteacherawards en die nasionale Departement van Basiese Onderwys se webtuiste by www.education.gov.za
14. Die nasionale Onderwystoekennings word ondersteun deur die Hoof van Onderwys, unies, skoolbeheerliggaamverenigings en die Provinsiale minister van Onderwys.
15. Alle lede van die skoolgemeenskap word aangemoedig om deel te neem aan die nominasie van verdienstelike onderwysers vir die Nasionale Onderwystoekennings.
16. Bring asseblief die inhoud van hierdie minuut onder die aandag van al u onderwyspersoneel.


GETEKEN: BK SCHREUDER
HOOF: ONDERWYS
DATUM: 2011:06:20

Bylae A: "National Teaching Awards Information Guide"  (grootte: 209 KB)