1. Dit is die verantwoordelikheid van elke skool om te verseker dat leerders konstruktief betrokke bly. Om hierdie rede moet elke skool sy skoolprogram en assessering vir die jaareindeksamen, asook die periode daarna wat eindig op 10 Desember 2010, deeglik beplan. Dit is dus, belangrik dat alle skole gehoor gee aan die volgende:
1.1 Skole moet elkeen van hulle interne eksamens sodanig beplan dat die leerders wat betrokke is teen 13:00 op die vroegste klaarmaak. Die skooldag, tydens die jaareindeksamen, moet nie vroeër as 13:00 vir leerders eindig nie. Leerders moet by die skool wees teen die normale begintyd van die skooldag.
1.2 Tydens die eksamenperiode moet alle leerders die skool elke dag bywoon. Diegene wat nie eksamen skryf nie, moet óf onderrig ontvang, óf met hersiening vir die eksamen besig wees. Dit is belangrik dat leerders nie sonder toesig in hulle klaskamers gelaat moet word nie.
1.3 Die prinsipaal moet die distrikskantoor raadpleeg om 'n aanvaarbare oplossing te probeer vind indien leerderbywoning, tydens die Nasionale Senior Sertifikaat-eksamen (NSS-eksamen), ontwrig word deur akkommodasieprobleme.

2. Skole wat graad 10 en 11 aanbied, moet hulle eksamenroosters so beplan dat hulle eksamen nie vroeër as op Woensdag, 10 November 2010 begin nie. Skole wat vakke met praktiese komponente aanbied, mag hulle praktiese eksamen op Maandag, 8 November 2010 laat begin.
3. Afhangende van hulle samestelling, behoort skole hulle godsdienstige vakansiedae in ag neem by die opstel van die rooster vir die jaareindeksamen. 'n Godsdienstige vakansiedag om in ag te neem gedurende die November-Desember-eksamenperiode van 2010 is Eid-ul-Adha op 17 November 2010. Let egter daarop dat hierdie datum onderhewig is aan die sigbaarheid van die maan, soos bevestig deur die betrokke godsdienstige gesagdraers.
4. Daar word van onderwysers verwag om tydens die eksamenperiode teenwoordig te wees vir die volle skooldag, afgesien daarvan of hulle toesigverpligtinge het of nie. Onderwysers betrokke by die nasien van die NSS-eksamen mag nie vir nasienwerk aanmeld voor al hulle interne nasienwerk vir die jaareinde en alle administratiewe pligte by die skool afgehandel is nie. Die WKOD se Direktoraat: Eksamenadministrasie sal prinsipale binnekort inlig aangaande die begindatums vir die NSS-nasienwerk. Let daarop dat alle NSS-nasienwerk gelyktydig begin. Die nasien van vraestelle met baie kandidate begin vroeër as vraestelle met min kandidate.
5. Leerderprofiele, leerderbewyse van leer en onderwyserportefeuljes en lêers moet vir moderering en vordering beskikbaar wees op die datums soos aangetoon deur die distrikte.
6. Alle skole word versoek om hulle eksamenroosters teen 1 November 2010 vir goedkeuring aan hulle kringspanbestuurders voor te lê.
7. Indien alle skole hulle leerders teen 13:00 vrystel, behoort leerdervervoerreëlings nie geraak te word nie.


GETEKEN: JH LYNERS
HOOF: ONDERWYS
DATUM: 2010:08:25