1. Hierdie minuut stel prinsipale van skole, skoolbeheerliggame (SBL'e) en distriksbeamptes in kennis van die vroeë inskrywing van leerders vir die 2011-skooljaar. Dit raak hoofsaaklik daardie kinders wat vir die eerste keer skool toe of na 'n hoërskool toe gaan of diegene wat van skool verander.
2. Die Wes-Kaap Onderwysdepartement (WKOD) beskou vroeë inskrywing as 'n prioriteit waarom die kernsaak van onderrig en leer wentel. Die optimale gebruik van onderrigtyd in 'n akademiese jaar is noodsaaklik vir verbeterde prestasie en dit is moontlik wanneer leerders weet watter skool hulle sal bywoon.

3. Redes vir vroeë inskrywing:
3.1 Onderwys is verpligtend vir alle kinders tot op ouderdom 15 jaar.
3.2 Skole en die WKOD moet lank vooruit weet watter skole vol is en watter skole nog vakatures vir 2011 het.
3.3 Skole en die WKOD moet vooruit beplan en seker maak dat alle bronne beskikbaar is voordat die skool in 2011 heropen.
3.4 Leerders verloor skooldae as hulle laat geregistreer word en hulle vind dit moeilik om die werk in te haal.

4. Ouers en/of voogde moet aangemoedig word om hulle regte en verantwoordelikhede uit te oefen wanneer dit kom by die inskrywing van hulle kinders vir skool.
4.1 Dit is in die eerste plek die verantwoordelikheid van ouers en/of voogde om kinders vir die volgende skooljaar in te skryf as hulle na graad 1 gaan, van skool verander (soos na graad 8 of 9 gaan) of as hulle na 'n ander gebied getrek het.
4.2 Ouers en/of voogde moet 'n onderskeid tref tussen die "inskrywing" of "op die waglys plaas" van 'n kind.
4.3 Ouers en/of voogde moet hulle kind vir graad 1 registreer as die kind in die komende jaar sewe word.
4.4 Ouers en/of voogde wat moeilikheid ondervind met die inskrywing van hulle kinders vir 2011 kan hulle Onderwysdistrikskantoor om hulp nader. Kontakbesonderhede kan van die naaste skool verkry word.
4.5 Daar word aanvaar dat 'n leerder wat tans by 'n skool ingeskryf is, sal voortgaan om daardie skool by te woon totdat die uitgangsgraad bereik word. Sommige skole vereis van ouers en/of voogde om te bevestig dat die leerder daardie skool in die volgende jaar sal bywoon. In hierdie geval moet die prinsipaal en die SBL die ouers en/of voogde in kennis stel dat hulle dit moet doen.

5. Prinsipale en SBL'e moet ouers en/of voogde in kennis stel dat inskrywing vir 2011 twee fases sal hê:
5.2 die eerste fase in die tweede kwartaal (alhoewel sommige skole reeds met hierdie proses begin het) en
5.2 die tweede fase in die derde kwartaal.

6. Skole word daaraan herinner dat hulle teen die einde van Julie 2010 reeds op alle eerstefaseaansoeke moes geantwoord het sodat ouers en/of voogde genoeg tyd kan hê om na alternatiewe te soek.
7. Onderwysdistrikskantore en skole moet stelsels in plek sit om te verseker dat vroeë inskrywing effektief en suksesvol afgehandel word.
8. Prinsipale en SBL'e word versoek om die inhoud van hierdie minuut besikbaar te stel aan alle opvoeders, ouers en voogde.


GETEKEN: JH LYNERS
HOOF: ONDERWYS
DATUM: 2010:03:25