1. Die Wes-Kaap Onderwysdepartement se MIV/VIGS-eenheid wil dit graag onder die aandag van alle werknemers, ouers en leerders bring dat 1 Desember 2010 Internasionale Wêreldvigsdag is. Sedert dit begin het op 1 Desember 1988, is Wêreldvigsdag belangrik om bewustheid te vergroot, vooroordeel en diskriminasie te beveg en onderwys te verbeter.
2. Die tema vir 2010 is "Universele toeganklikheid en Menseregte". Ons politieke leiers het hulle woord gegee om te werk vir universele toeganklikheid tot MIV- en VIGS-behandeling, voorkoming en sorg, en om dit as fundamentele menseregte te erken. Skending van menseregte versnel die verspreiding van MIV, en stel wese, kwesbare kinders, dwelm- en alkoholmisbruikers en die jeug van ons land in gevaar.
3. Volgens die Nasionale Jeugrisiko-opname wat gemaak is deur die Mediese Navorsingsraad in 2008 het 37,5% van ons leerderbevolking (Graad 8 tot 11) seksueel verkeer, 19% swanger geraak, 17.7% 'n kind in die wêreld gebring, 8.2% aborsies gehad en 4.4% seksueel-oordraagbare infeksies opgedoen. Daarbenewens het 41% alkohol en 9.3% dwelms misbruik of is hulle dwelms aangebied, waarvan , beide geassosieer word met riskante seksuele verkeer.
4. Om bogenoemde redes druk die WKOD en sy MIV/VIGS-eenheid hulle besorgdheid uit oor leerders wat betrokke is by sulke riskante gedrag en is hulle verheug oor diegene wat verantwoordelike keuses vir hulle eie welsyn gemaak het.
5. Wêreldvigsdag bied 'n geleentheid aan alle leerders, onderwysers en gemeenskappe om oor te gaan tot aksie en te verseker dat menseregte beskerm is en dat die MIV/VIGS-geassosieerde fokus gerig is op die bevordering van fisiese en psigologiese veiligheid, voorkoming, behandeling en sorg, en die uitskakeling van stigma, diskriminasie, seksuele teistering en misbruik.
6. Die rooi lintjie is 'n internasionale simbool van VIGS-bewussyn wat die hele jaar lank deur mense gedra word, en veral op Wêreldvigsdag, om sorg en besorgdheid oor MIV/VIGS uit te druk en om andere te herinner aan die behoefte aan hulle ondersteuning en verbintenis.
7. Soos me A Motshekga, Minister van Basiese Onderwys, gesê het: "…as 'n stelsel kan ons alleenlik sukses behaal indien elke skool as 'n eenheid funksioneer. Laat ons almal daarna strewe dat elke skool 'n ondersteunende omgewing word waarin elke leerder en opvoeder kan gedy…"
8. Die WKOD wil alle prinsipale, onderwysers, leerders en ouers bedank wat, deur 2010 heen, hulle ondersteuning en toewyding getoon het in die stryd teen die MIV-plaag wat ons land bedreig.
9. U word nogeens aangemoedig om te fokus op Wêreldvigsdag en om programme en gebeurtenisse vir 1 Desember 2010, Wêreldvigsdag, met kreatiwiteit en entoesiasme te ontwikkel.


GETEKEN: JH LYNERS
HOOF: ONDERWYS
DATUM: 2010:11:26