1. Die Wes-Kaap Onderwysdepartement se MIV/VIGS-eenheid wil graag dit onder die aandag van alle werknemers, ouers en leerders bring dat September Nasionale Skolemaand vir VIGS is.
2. Alle skoolbeheerliggame, onderwysers en leerders word weereens aangemoedig om tydens September op MIV/VIGS en verwante kwessies te fokus. Ons wil almal aanmoedig om met entoesiasme hulle kreatiwiteit te gebruik om programme en funksies aan te bied en veldtogte te ondersteun wat op Wêreldvigsdag op 1 Desember 2010 'n hoogte punt sal bereik.
3. Skole en hulle vennote in die gemeenskap (ouers, gemeenskaps- en geloofsgebaseerde organisasies en plaaslike regering) word aangemoedig om aandag te gee aan die volgende aspekte aangaande MIV/VIGS-lewensvaardighede en seksualiteitsopvoeding:

  • Groter bewusmaking, en die bestryding van mites deur korrekte inligting te voorsien, ten einde die verspreiding van VIGS te bekamp en die invloed daarvan te versag. (Dit kan tydens ouervergaderings en skoolsportgeleenthede gedoen word.)

  • Die skep van 'n ondersteunende omgewing vir diegene wat geïnfekteerd en geaffekteerd is deur die siekte (skep van 'n siekeboeg/-ruimte, huisbesoeke, verskaffing van kospakkies, en skep van voedseltuine, is van die metodes waarop geïnfekteerde en geaffekteerde persone ondersteun kan word.

  • Bestryding van diskriminasie, dwelms, misdaad, tienerswangerskappe, prostitusie en mishandelende gedrag wat die verspreiding van die virus in gemeenskappe kan vererger. (Dit kan gedoen word deur gassprekers te reël vir drama-opvoerings om sodoende aan leerders inligting hieroor op kreatiewe wyses te verskaf.)

  • Bevordering van positiewe en verantwoordelike gedrag en ontwikkeling van jong leiers vir die toekoms

  • Debatvoering oor kontroversiële kwessies, soos die gebruik van voorbehoedmiddels en alternatiewe behandeling of medikasie

  • Bevordering van 'n gesonde lewenstyl en die bevestiging van norme en waardes in gemeenskappe

  • Motivering van onderwysers, leerders en die gemeenskap om hulle status te ken deur middel van MIV-toetsing en berading.
4. Skole kan bogenoemde vermag deur kreatiewe programme vir leerders, ouers en skoolgemeenskappe te reël. Hierdie programme moet nie beperk word tot kurrikulumgebaseerde aktiwiteite nie, maar moet uitgebrei word om ook buitekurrikulêre aktiwiteite in te sluit.
5. Indien skole meer inligting of hulp benodig, kan hulle met die volgende koördineerders vir MIV/VIGS skakel by die onderskeie distrikskantore:

Metropool-Sentraal Loretta Erasmus-Arendse Tel. 021 514 6903
Metropool-Suid Nceba Jalamba Tel. 021 370 2072
Metropool-Noord Labeqa Abrahams Tel. 021 938 3065
Metropool-Oos Esme Kleinveldt Tel. 021 900 7024
Weskus Kennith Booise Tel. 021 860 1200
Kaapse Wynland Alister Adonis Tel. 023 348 0609
Overberg Benorita Ockhuis Tel: 028 214 7300
Eden & Sentraal-Karoo Lionel Pedro Tel. 044 803 8362

6. U entoesiastiese deelname aan programme gedurende die Nasionale Skolemaand vir VIGS sal hoog op prys gestel word.


GETEKEN: JH LYNERS
HOOF: ONDERWYS
DATUM: 2010:09:02