1. Om te verseker dat daar voortgesette befondsing van onafhanklike skole is, wil die Wes-Kaap Onderwysdepartement (WKOD) graag u aandag vestig op paragraaf 177(4) van die gewysigde Nasionale Norme en Standaarde vir Skoolbefondsing (NNSSF) , wat meld dat die sekondêre fase van 'n onafhanklike skool vir 'n subsidie in aanmerking mag kom vir 'n besondere jaar, indien

  1. sy finale graad 12-slaagsyfer gelyk aan of hoër is as die provinsiale gemiddelde graad 12-slaagsyfer vir openbare skole in die vorige jaar;

  2. nie meer as 20% van graad 11-leerders herhalers is wat graad 11 in dieselfde skool gevolg het die vorige jaar nie;

  3. nie meer as 20% van graad 12-leerders herhalers is wat graad 12 in dieselfde skool gevolg het die vorige jaar nie;

  4. Die skool nie skuldig is aan praktyke wat daarop gemik is om die skool se graad 12-slaagsyfer kunsmatig te verhoog nie; en

  5. Leerders 'n graad nie meer as een keer in die graad 7 tot 9-fase herhaal nie.
2. Onafhanklike skole wat nie voldoen aan die voorwaardes in paragraaf 1 (a), (b) of (c) hierbo nie, sal alleenlik deur die Departementshoof vir 'n subsidie oorweeg word indien die betrokke skole 'n goeie rede kan verskaf vir die afwyking.
3. Skole wat om befondsing vir 2011 wil aansoek doen, het tyd tot 27 September 2010 om aansoeke voor te lê sodat die WKOD kan voldoen aan die vereistes in paragraaf 62(a) van die Nasionale Norme en Standaarde vir Befondsing van Skole. Ingevolge die genoemde paragraaf moet kwalifiserende skole teen 30 September van 'n jaar voorsien word van 'n aanduidende bedrag om onafhanklike skole in staat te stel om hulle begroting en skoolgeld vir die volgende jaar te beplan.


GETEKEN: PA VINJEVOLD
HOOF: ONDERWYS
DATUM: 2010:09:14