E-LEER- EN BIBLIOTEEKDIENSTEMINUUT: 0003/2010 |
AAN: | HOOFDIREKTEURE, DIREKTEURE (HOOFKANTOOR EN ONDERWYSDISTRIKS-KANTORE), KRINGSPANBESTUURDERS, IBB-BESTUURDERS, HOOFKURRIKULUMBESTUURDERS, KURRIKULUMADVISEURS, GLOO-PERSONEEL, HOOFDE VAN ONDERWYSINRIGTINGS EN VOORSITTERS VAN BEHEERLIGGAME |
| VIERING VAN 2010 INTERNASIONALE SKOOLBIBLIOTEEKMAAND IN DIE WKOD |
| 1. |
Die Internasionale Vereniging van Skoolbiblioteekwese (IASL) het Oktober tot Internasionale Skoolbiblioteekmaand (ISBM) verklaar. Gedurende Oktober 2010 sal skoolbiblioteke dwarsoor die wêreld en in Suid-Afrika biblioteek- en inligtingsdienste met gebruikmaking van die volgende tema by skole vier en bevorder: Diversiteit, Uitdagings, Aanpasbaarheid - Skoolbiblioteke is die Antwoord! |
| 2. |
Internasionale Skoolbiblioteekmaand sal diegene in beheer van skoolbiblioteke regoor die wêreld die geleentheid bied om 'n dag in Oktober 2010 te kies wat hulle bepaalde situasie die beste pas, ten einde die belangrikheid van skoolbiblioteke te vier. |
| 3. |
In die afgelope twee jaar het meer as 600 skole in die WKOD gebaat by die Program vir
Gehalteverbetering, Ontwikkeling, Ondersteuning en Opheffing (PGOOO), 'n Skoolbiblioteekprojek. Hierdie skole het 'n voorraad biblioteekmateriaal, biblioteekmeublement en, in groter skole, 'n toegewysde rekenaar en sagteware ontvang om in die skoolbiblioteek te gebruik, sowel as opleiding vir 'n Biblioteekkoördineerder. Die WKOD moedig skole wat hulle skoolbiblioteek ingerig het met behulp van die PGOOO-skoolbiblioteekprojek of a.g.v. eie inisiatief, om hierdie prestasie van hulle te vier deur hulle skoolbiblioteek gedurende Oktober 2010 in te wy. Indien u geplaas wil word op die spesiale lys van skole in die WKOD wat hulle skoolbiblioteke tydens Oktober wil inwy, kontak asseblief Theresa de Young by EDULIS by 021 957 9638 of e-pos TdeYoung@pgwc.gov.za. |
| 4. |
Maak asseblief meegaande twee aanhangsels oop vir 'n reeks voorstelle oor hoe WKOD-skole Internasionale Skoolbiblioteekmaand 2010 kan vier, nuttige webtuistes om te besoek en die amptelike weergawe van die ISBM-logo om in promosie-materiaal te gebruik. Let daarop dat hierdie logo slegs gebruik moet word om Internasionale Skoolbiblioteekmaand bekend te stel en nie vir kommersiële doeleindes nie. |
| 5. |
In die lig van die toenemende noodsaaklike rol wat leer-en-onderrigondersteuningsmateriaal (LOOM) in leer en onderrig speel, moet onderwysers bewus wees van die beskikbaarheid van biblioteekhulpbronne vir hierdie doel. As deel van die viering van Internasionale Skoolbiblioteekmaand 2010 en die bevordering van die biblioteek- en inligtingsdienste van die WKOD, word u en u personeel uitgenooi om 'n besoek aan die EDULIS-biblioteek of aan u Onderwysdistrikshulpbronsentrum te reël vir oriëntering en inligting aangaande hierdie dienste en die beskikbare gespesialiseerde biblioteekhulpbronne. |
| 6. |
Die EDULIS-biblioteek in Bellville en die distrikshulpbronsentrums in Mitchells Plain, Paarl, George, Worcester en Kuilsrivier het die volgende biblioteekgebaseerde LOOM beskikbaar vir individuele lenings deur onderwysers en skoolhoofde, of bloklenings deur skole:
- Inspirerende aktiwiteit-gebaseerde idees vir lesplanne en vir geletterdheid- en gesyferdheidsontwikkeling (baie waarvan gefotokopieer kan word)
- 'n Wye verskeidenheid kurrikulumondersteuningsmateriaal
- 'n Groot versameling boeke oor onderwysbestuur en leierskap wat onlangs verskyn het
- Stimulerende materiaal ter ondersteuning van onderwysnavorsing en beleidsontwikkeling
- Materiaal wat aktuele kritieke vraagstukke, bv. geletterdheid en gesyferdheid, inklusiwiteit, dissipline en gedragsprobleme, differensiasie, MIV/VIGS, skoolveiligheid en fetale alkoholsindroom, aanspreek
- Leerder-gerigte materiaal (insluitende prenteboeke en romans vir leerders van alle ouderdomme vir gebruik gedurende leesperiodes), wat spesiaal geëvalueer en geresenseer is om skole te help om materiaal te kies om uit Norme-en-standaarde LOOM-fondse of uit eie fondse vir hulle skoolbiblioteke aan te koop
- Video's, DVD's, oudiokasette, CD's, CD-ROM's en multimedia wat 'n wye reeks onderwerpe dek om klasonderrig en -leer te verryk en te ondersteun en skoolbestuur te bevorder.
|
| 7. |
Die volgende bibliotekarisse kan geskakel word vir inligting aangaande die bogenoemde:
| Susan Hanekom |
EDULIS-biblioteek, Bellville |
021 957 9618 |
| Cheryl Joseph |
Metro-Oos-bronnesentrum/EDULIS-takbiblioteek, Kuilsrivier |
021 900 5111 |
| Ntombi Mngxuma |
Metro-Suid: Brian O'Connell-bronnesentrum, Mitchells Plain |
021 370 2084 |
| Ina Heiberg |
Weskus-bronnesentrum, Paarl |
021 860 1229 |
| Sam Webber |
Eden & Sentraal-Karoo-bronnesentrum, George |
044 803 8328 |
| Janine Ontong |
Kaapse Wynland-bronnesentrum, Worcester |
023 348 4657 |
| Sara Clegg |
Onderwysdistrik Overberg, Caledon |
028 214 7300 |
|
| 8. |
Aangesien daar geen funksionerende bronnesentrum in die Onderwysdistrik Metro-Sentraal is nie en in reaksie op talle versoeke van opvoeders by skole in die distrik, is 'n insamelingspunt by EDUMEDIA in Mowbray daargestel vir individuele en skoolbloklenings vanaf die EDULIS-biblioteek. Hierdie tussentydse maatreël sal van toepassing wees totdat 'n bronnesentrum gevestig is by die Metro-Sentraal Onderwysdistrikskantoor. |
GETEKEN: BK SCHREUDER
HOOF: ONDERWYS
DATUM: 2010:08:30
Grand Central Towers, Laer-Parlementstraat, Privaatsak X9114, Kaapstad 8000
Meld asseblief verwysingsnommers in alle korrespondensie
VEILIGE SKOLE: 0800 45 46 47
INBELSENTRUM: 0861 92 33 22
|
