1. Aansoeke word ingewag van BOOV Vlak 4-onderwysers, kurrikulumadviseurs en senior kurrikulumbeplanners wat graag wil dien as hoofnasieners, interne moderatore en nasieners vir die Basiese Onderwys en Opleiding vir Volwassenes (BOOV) se eksamens van November 2010 tot Junie 2012. Die lys van BOOV-leerareas is aangeheg as Bylae A.
2. Kriteria vir die aanstelling van nasieners, hoofnasieners en interne moderatore
2.1 Aansoekers moet in besit wees van 'n erkende driejaar na-Senior Sertifikaat-kwalifikasie.
2.2 Aansoekers moet beskik oor BOOV Vlak 4-onderwyservaring en ten minste 3 jaar onderwyservaring in die betrokke leerarea. Voorkeur sal egter gegee word aan onderwysers wat tans BOOV Vlak 4 leerders onderrig.
2.3 Aansoekers moet in diens wees by inrigtings wat kandidate voorberei vir die BOOV Vlak 4-eksamen wat opgestel word deur die Departement van Hoër Onderwys en Opleiding (DHOO).
2.4 In die geval van interne moderatore, is ervaring as moderator of hoofnasiener in vorige jare 'n vereiste.
2.5 In die geval van hoofnasieners is vorige ervaring as 'n hoofnasiener, adjunkhoofnasiener of interne moderator 'n vereiste.
2.6 Aansoekers wat aangedui het dat hulle van plan is om te bedank of af te tree en wat hulle diens by die WKOD teen 01 Desember 2010 sal beëindig, sal nie vir aanstelling as moderator, hoofnasiener of nasiener oorweeg word nie, behalwe in die geval dat die betrokke onderwyser by 'n onafhanklike skool aansluit waarvan die kandidate die BOOV Vlak 4-eksamen van die DHOO aflê.
2.7 Aansoekers wat beoog om teen voor 30 Junie 2012 af te tree, sal die WKOD betyds hiervan in kennis moet stel.
2.8 `n Persoon wat met verlof is tydens die periode wat die nasienperiode voorafgaan en insluit se aanstelling as moderator, hoofnasiener of nasiener sal beëindig word. Iemand wat teen die einde van die jaar vir meer as 50 dae met verlof was se aanstelling sal ook beëindig word.
2.9 Die WKOD sal die aanstelling beëindig van enige persoon wat nie bevredigend presteer tydens die uitvoering van sy of haar verpligtinge tydens die bogenoemde nasienperiodes nie.
2.10 Die finale besluit oor die aanstelling van interne moderatore, hoofnasieners en adjunkhoofnasieners berus by die Superintendent-generaal van die WKOD.
3. Sentrumbestuurders word versoek om opvoeders wat aan die bogenoemde vereistes voldoen, aan te moedig om aansoek te doen om die betrekkings van hoofnasiener, nasiener of interne moderator.
4. Voorlegging van aansoeke
4.1 Alle aansoeke moet op die aangehegte aansoekvorm (Bylae B) gedoen word en moet vergesel word van 'n begeleidende brief waarin die aansoeker redes verskaf waarom hy of sy vir die pos aansoek doen.
4.2 Alle nuwe aansoekers moet die volgende dokumente aanheg by hulle aansoekvorms:
  • Curriculum vitae
  • Gewaarmerkte afskrif van identiteitsdokument
  • Gewaarmerkte afskrif/afskrifte van akademiese studierekord(s)
  • Gewaarmerkte afskrif/afskrifte van professionele kwalifikasiesertifikaat/-sertifikate
    		•
    4.3 Aansoeke moet by die volgende adres ingedien word:

    Hoof: Onderwys
    Vir aandag: Mev N Kanase / Mnr M Cameron
    Direktoraat: Eksamenadministrasie
    Wes-Kaap Onderwysdepartement
    4de Vloer, Grand Central Towers
    Laer Parlementstraat
    KAAPSTAD
    8001

    Aansoeke moet die WKOD bereik teen 30 Julie 2010. Indien u enige navrae het, kontak asseblief mev N Kanase by tel. nr. 021 467 2952 of mnr M Cameron by tel. nr. 021 467 2964.
    5. Suksesvolle aansoekers sal skriftelik van hulle aanstellings verwittig word en sal 'n kontrak met die WKOD moet sluit. Verdere korrespondensie aangaande die nasienproses sal dan volg.
    6. Die WKOD maak staat op u samewerking en ondersteuning in hierdie belangrike saak.


    GETEKEN: BK SCHREUDER
    HOOF: ONDERWYS
    DATUM: 2010-07-14

    Bylae A: BOOV-leerareas  (grootte: 12 KB)
    Bylae B: Aansoekvorm  (grootte: 25 KB)