1. Aansoeke word ingewag van onderwysers, kurrikulumadviseurs en senior kurrikulum-beplanners wat graag wil dien as hoofnasieners, adjunkhoofnasieners en interne moderatore vir die Nasionale Senior Sertifikaat-eksamens (NSS-eksamens) van November 2010 tot die Maart 2012 aanvullende eksamen. Die lys van NSS-vakke en -vraestelle in Bylae A sluit in poste wat geheradverteer word.
2. Kriteria vir die aanstelling van hoofnasieners, adjunkhoofnasieners en interne moderatore
2.1 Aansoekers moet in besit wees van 'n erkende driejaar na-Senior Sertifikaat-kwalifikasie, wat die betrokke vak moet insluit op tweede- maar verkieslik derdejaarvlak.
2.2 Aansoekers moet 'n minimum van 8 jaar onderwyservaring en ten minste 5 jaar onderwyservaring in die betrokke vak op graad 12-vlak hê. Hulle moet ook die vak vir ten minste twee van die volgende jare onderrig het, nl. in 2008, 2009 en 2010. Voorkeur sal egter gegee word aan onderwysers wat tans die Nasionale Kurrikulumverklaring onderrig aan graad 12-kandidate.
2.3 Aansoekers moet in diens wees van inrigtings wat kandidate voorberei vir die NSS-eksamen, wat opgestel word deur die Departement van Basiese Onderwys (DBO).
2.4 Om die gehalte van nasienwerk te verbeter en seker te maak dat leerders nie te na gekom word nie, sal die Wes-Kaap Onderwysdepartement (WKOD) net aansoeke oorweeg van daardie applikante wat 'n bewese rekord van uitstekende uitslae in hulle vak(ke) het in die 2008- en 2009-NSS-eksamens.
2.5 Slegs aansoekers met 'n rekord van 'n minimum slaagsyfer van 60% in die betrokke vak sal oorweeg word vir aanstelling in 2010 en daarna.
2.6 Aansoekers wat aansoek doen om Vraestel 2 na te sien (Letterkunde) in die Tale moet al die voorgeskrewe werke wat vir die eksamen voorgeskryf is, gelees en bestudeer het en nie net daardie boeke wat kandidate by hulle eie skool bestudeer het nie.
2.7 In die geval van adjunkhoofnasieners, moet aansoekers beskik oor ten minste 5 jaar ondervinding as nasieners in die vak waarvoor aansoek gedoen word. Ervaring as 'n senior nasiener sal 'n verdere voordeel wees.
2.8 In die geval van interne moderatore, is ervaring as 'n moderator, adjunkhoofnasiener of hoofnasiener in vorige jare 'n vereiste.
2.9 In die geval van hoofnasieners is ervaring as 'n moderator of hoofnasiener of adjunkhoofnasiener in vorige jare 'n vereiste. Voorkeur sal gegee word aan onderwysers wat tans die vak in graad 12 onderrig.
2.10 Aansoekers wat aangedui het dat hulle van plan is om te bedank of af te tree en wat hulle diens by die WKOD teen 30 September 2010 sal beëindig, sal nie vir aanstelling as moderator, hoofnasieners of adjunkhoofnasieners oorweeg word nie, behalwe in die geval dat die betrokke onderwyser by 'n onafhanklike skool aansluit waarvan die kandidate die NSS-eksamen van die DBO aflê.
2.11 Aansoekers wat beplan om aft e tree teen 30 September 2011 moet die WKOD vroegtydig verwittig.
2.12 `n Persoon wat op verlof is tydens die periode wat die nasienperiode voorafgaan en insluit se aanstelling as moderatoor, hoofnasiener of adjunkhoofnasiener sal beëindig word. Iemand wat teen die einde van die jaar vir meer as 50 dae met verlof was se aanstelling sal ook beëindig word.
2.13 Persone wat 'n familielid (bv. seun, dogter, broer of suster) of 'n kandidaat vir die 2010 NSS-eksamen het wat by hulle woon en wat die NSS-eksamen in die vak waarvoor aansoek oorweeg word, gaan aflê, kwalifiseer nie vir aanstelling nie. (Waar sodanige familielid of kandidaat die NSS-eksamen in 2011 gaan skryf in die vak waarvoor aansoek gedoen word, moet die aansoeker dit vooraf verklaar. Indien aangestel, sal sodanige aansoekers hulleself moet onttrek van die Desember 2011- en Maart 2012-nasienperiodes).
2.14 Om 'n hoë standaard van nasien te verseker, sal alle aansoekers onderwerp word aan 'n bevoegdheidsassessering.
2.15 Die WKOD sal die aanstelling van enigiemand beëindig indien hy of sy nie bevredigend presteer in die uitvoering van sy of haar pligte in enige van die bogenoemde nasienperiodes nie.
2.16 Die finale besluit oor die aanstelling van interne moderatore, hoofnasieners en adjunkhoofnasieners berus by die Superintendent-generaal van die WKOD.
3. Hoofde van inrigtings word versoek om onderwysers wat aan die bogenoemde vereistes voldoen, aan te moedig om aansoek te doen om die poste van hoofnasieners, adjunkhoofnasieners of interne moderatore.
4. Die Departement sal een moderator, een hoofnasiener en een adjunkhoofnasiener aanstel in elke vak waarvoor 'n groot getal aansoek doen.
5. Voorlegging van aansoeke
5.1 Alle aansoeke moet op die aangehegte aansoekvorm (Bylae B) gedoen word en moet van die volgende vergesel word:
  • 'n Begeleidende brief waarin die aansoeker verduidelik hoekom hy of sy vir die pos aansoek doen.
  • 'n Voltooide verklaringsvorm waarvan 'n afskrif aangeheg is aan hierdie minuut as (Bylae C).
  • 5.2 Alle nuwe aansoekers moet die volgende dokumente aanheg by hulle aansoekvorms:
  • Curriculum vitae
  • Gewaarmerkte afskrif van identiteitsdokument
  • Gewaarmerkte afskrifte van akademiese studierekord(s)
  • Gewaarmerkte afskrif/afskrifte van kwalifikasiesertifikaat/-sertifikate
  • 5.3 Aansoeke moet by die volgende adres ingedien word:

    Hoof: Onderwys
    Vir aandag: Mnr N Riddles
    Direktoraat: Eksamenadministrasie
    Wes-Kaap Onderwysdepartement
    4de Vloer, Grand Central Towers
    Laer Parlementstraat
    KAAPSTAD
    8000

    Aansoeke moet die WKOD bereik teen 30 Julie 2010. Indien u enige navrae het, kontak asseblief mnr M Cameron by tel.no. 021 467 2964 of mnr N Riddles by tel.no. 021 467 2992.

    6. Suksesvolle aansoekers sal skriftelik van hulle aanstellings verwittig word en sal 'n kontrak met die WKOD moet sluit. Verdere korrespondensie aangaande die nasienproses sal dan volg.
    7. Die aangehegte erkenning van ontvangs (Bylae D) van hierdie minuut moet voltooi word deur die skoolhoof of sentrumbestuurder en terugbesorg word aan hierdie Departement by ontvangs van hierdie minuut. Prinsipale word versoek om hierdie minuut onder die aandag van hulle personeel te bring sodat hulle kennis dra van die aanstellingsvereistes voor aansoeke ingedien word.
    8. Die WKOD maak staat op u samewerking en ondersteuning in hierdie belangrike saak.


    GETEKEN: BK SCHREUDER
    HOOF: ONDERWYS
    DATUM: 2010-07-15

    "Annexure A: List of NSC subjects and question papers"  (ubukhulu: 40 KB)
    Bylae B: Aansoekvorm  (grootte: 25 KB)
    Bylae C: Verklaringsvorm  (grootte: 39 KB)
    Bylae D: Erkenning van ontvangs  (grootte: 35 KB)