1. U word verwys na Omsendbrief 0058/2007 van 1 November 2007.
2. Let asseblief op die volgende belangrike regulasie aangaande die registrasie van kandidate vir die Senior Sertifikaat-eksamen wat in Junie 2011 uitgefaseer sal word. Slegs kandidate wat geregistreer was, of die Senior Sertifikaat-eksamen in 2009 of voor 2009 geskryf het, kwalifiseer om geregistreer te word vir die 2010 en 2011 Senior Sertifikaat-eksamen.
3. In buitengewone omstandighede het kandidate wat graad 11 ingevolge die ou kurrikulum suksesvol voltooi het, verlof van die Departementshoof ontvang om die 2010 Senior Sertifikaat-eksamen te skryf.
4. Dit het onder die aandag van die WKOD gekom dat Sentrumbestuurders en Hoofde van Private Kolleges kandidate, selfs kandidate van so jonk as 14 jaar, wat nie aan die kriteria om vir die Senior Sertifikaat-eksamen geregistreer te word, voldoen nie, inskryf. Verder blyk dit dat 'n groot aantal van die kandidate wat vir die Mei/Junie 2010 Senior Sertifikaat-eksamen geregistreer is, nie die eksamen in 2009 of vroeër afgelê het nie.
5. Die WKOD beskou hierdie optrede in 'n baie ernstige lig en ondersoek tans die saak.
6. Sentrumbestuurders en Hoofde van Kolleges word versoek om bewyse voor te lê teen nie later nie as 20 April 2010 dat kandidate wel voldoen aan die kriteria vir registrasie. Indien bevind word dat Sentrumbestuurders of Hoofde van Kolleges en kandidate verkeerde inligting op die registrasievorms verskaf het ten einde vir registrasie te kwalifiseer, sal die registrasie van die kandidaat en/of die kandidaat se uitslae nietig verklaar word. Dit sal 'n onreëlmatigheid uitmaak.
7. 'n Kandidaat mag slegs vir die Mei-Junie 2011-eksamen geregistreer word as 'n gesertifiseerde afskrif van 'n vorige graad 12-uitslagadvies aangeheg word of die eksamennommer van die kandidaat voorsien word.
8. Maak asseblief seker dat kandidate wat vir die 2011 Senior Sertifikaat-eksamen geregistreer moet word, voldoen aan die vereistes soos vervat in die Nasionale Beleid Staatskoerant van 6 Julie 2007 en in Omsendbrief 0058/2007 van 1 November 2007.
9. U samewerking sal op prys gestel word.


GETEKEN: BK SCHREUDER
HOOF: ONDERWYS
DATUM: 2010:04:07