1. Die Wes-Kaap Onderwysdepartement het 'n pakket voorberei vir elke 2010 NSS-kandidaat van die Wes-Kaap om hulle te help met hulle voorbereiding vir die eksamen. Die pakket, wat insluit skryfbenodighede, 'n boekie met wenke vir studie en eksamens, 'n eksamenrooster, beursinligting, wenke vir sukses en ander nuttige inligting, word voorsien in 'n PVC-omslag.
2. Die plan is dat 'n pakket gedurende die eerste week van die tweede kwartaal aan elke graad 12-leerder oorhandig moet word om hulle daarvan bewus te maak dat daar 200 dae oor is voor die aanvang van die 2010 NSS-eksamen.
3. Alle hoërskole sal die pakkette teen 15 April 2010 per koerier ontvang.
4. Die prinsipaal of 'n gedelegeerde personeellid moet ontvangs van die pakkette erken nadat seker gemaak is dat die getal items wat ontvang word ooreenstem met die faktuur wat elke boks vergesel. Die persoon wat die pakkette ontvang, moet die volgende op die faktuur verskaf:

  • Sy of haar naam, ID-nommer en handtekening;
  • Naam en adres van skool;
  • Die skoolstempel;
  • Die datum van aflewering.

'n Afskrif van die faktuur moet deur die skool bewaar word.
5. In 'n geval waar die getal pakkette wat aan die skool gelewer word, foutief is, kontak asseblief u distrikskantoor. Oortollige pakkette moet aan die distrikskantoor terugbesorg word.
6. Onderwysers word versoek om leerders aan te moedig om so gou as moontlik die inhoud van die pakkette te lees en te gebruik ter voorbereiding vir hulle finale eksamen.
7. Bring asseblief die inhoud van hierdie minuut onder die aandag van alle lede van u personeel.


GETEKEN: BK SCHREUDER
HOOF: ONDERWYS
DATUM: 2010:03:23