1. Ingevolge die Regulasies betreffende die Afneem, Administrasie en Bestuur van Assessering van die Nasionale Senior Sertifikaat, gepubliseer in die Staatskoerant Nr. 31337 van 21 Oktober 2008, moet die provinsiale departemente van onderwys skoolhoofde aanstel as hoofopsieners vir die Nasionale Senior Sertifikaat-eksamen (NSS-eksamen).
2. Die Wes-Kaap Onderwysdepartement (WKOD) het, tot nog toe, lede van die publiek gebruik om toesig te hou by die Senior Sertifikaat-eksamen en NSS-eksamen vir voltydse, deeltydse en privaat kandidate. Hierdie benadering is egter nie in lyn met die bogemelde beleid nie.
3. By die HODKOM-vergadering van Mei 2010, het die WKOD ooreengekom om die gebruik van onderwysers as opsieners in te faseer, met ingang van die NSS-eksamen in 2010.
4. Om hierdie rede sal die 2010 reëlings as volg wees:
4.1 Soos dit in 2009 gedoen is, sal skole weereens slegs lede van die publiek as hooftoesighouers en assistenttoesighouers nomineer. Hierdie persone sal dan deur die WKOD aangestel word en betaal word vir die pligte wat hulle uitvoer.
4.2 Daarbenewens moet prinsipale ten minste twee lede van die skoolbestuurspan nomineer, waarvan een die adjunkprinsipaal moet wees, om opgelei te word in die toesighouery van die eksamen. Hierdie senior onderwysers sal die hoofopsiener vergesel tydens die toesig van die 2010 NSS-eksamens, met die doel om die bestuur van die NSS-eksamen by die skool vanaf 2011 oor te neem.
5. Skoolhoofde sal verantwoordelik gehou word vir die behoorlike en geloofwaardige bestuur en toesig van die eksamens by hulle skole.
6. Die vereiste vir die November 2011 NSS-eksamens sal wees dat 50% van die totale getal toesighouers per skool onderwysers sal wees, terwyl die oorblywende 50% uit lede van die publiek sal bestaan. Die hoofopsiener sal een van die lede van die skool se bestuurspan wees.
7. Teen 2012 sal alle toesighouers by 'n skool na verwagting onderwysers wees en sal die prinsipaal of sy afgevaardigde die hoofopsiener wees. Dit is die verantwoordelikheid van die prinsipaal om te verseker dat al die onderwysers wat as opsieners genomineer is, behoorlik opgelei word.
8. Ingevolge die Personeeladministrasiemaatreëls word toesig by die NSS-eksamen beskou as deel van die verantwoordelikhede van onderwysers.
9. Die WKOD wil graag skoolhoofde en onderwysers by voorbaat bedank vir hulle samewerking in hierdie verband.


GETEKEN: JH LYNERS
HOOF: ONDERWYS
DATUM: 2010-07-12


"Regulations Pertaining to the Conduct, Administration and Management of Assessment for the National Senior Certificate" (Staatskoerant nr. 31337, Augustus 2008)
  Volledige dokument  (grootte: 2 212 KB)
of
  Dokument sonder bylaes  (grootte: 773 KB)
  Bylae A - N  (grootte: 660 KB)
  Bylae M - O  (grootte: 695 KB)