1. Inleiding

Behoorlike bestuur van die eksamen by 'n onderwysinrigting is 'n belangrike deel van die hele eksamenproses. In ooreenstemming met nasionale en provinsiale beleid, sowel as die Regulasies vir die Afneem, Administrasie en Bestuur van Assessering vir die Nasionale Senior Sertifikaat-eksamens, is die skoolhoofde aanspreeklik vir alle eksamenprosesse by hulle skole.

Alhoewel daar nie voorsien word dat die Senior Sertifikaat- of BOOV vlak 4-eksamen in 2010 ontwrig sal word nie, is dit noodsaaklik dat daar 'n volledige risikobestuursplan by elke inrigting ontwikkel word om moontlike ontwrigting van die afneem van die eksamen te hanteer.

2. Gebeurlikheidsplan vir 'n noodtoestand
2.1 Aangesien daar verskillende soorte noodgevalle is, het die WKOD die volgende prosedure ontwikkel wat ten doel het om alle situasies te dek waar dit nodig is om die gevolge van 'n noodontruiming tot 'n minimum te beperk. Dit is belangrik dat alle inrigtings wat kandidate vir hierdie eksamens voorberei dieselfde basiese prosedure sal volg.
2.1.1 Indien 'n noodtoestand sou ontstaan voordat kandidate begin skryf, mag hulle nie die eksamenlokaal/-lokale betree voordat hulle aangesê word om dit te doen nie. Hulle moet egter van ander groepe afgesonder word en onder toesig bly.
2.1.2 Indien 'n noodtoestand sou ontstaan terwyl kandidate nog skryf en dit gevolglik noodsaaklik sou wees om die lokaal te ontruim, moet kandidate opdrag ontvang:

  • om al hulle boeke toe te maak en op hulle banke te laat;

  • om een vir een die lokaal te ontruim onder die voortdurende toesig van die opsiener(s) en die hoofopsiener, en die oorhoofse toesig van die prinsipaal. Bykomende onderwysers (uitgesonderd dié wie se vak geskryf word), kan versoek word om te help om toesig te hou;

  • om nie met mekaar te kommunikeer nie;

  • om nie enige boeke of papiere by hulle te hê nie;

  • om nie in besit van 'n selfoon te wees nie;

  • om op 'n geskikte plek op die terrein op 'n afstand van mekaar te sit sodat geen kommunikasie kan plaasvind nie;

  • om in stilte terug te keer na die eksamenlokaal wanneer hulle verlof kry om dit te doen en voort te gaan met skryf waar hulle opgehou het.
2.1.3 Kandidate moet na hulle terugkeer 'n aanduiding ontvang van die tyd wat hulle het om die vraestel te voltooi, d.w.s. die totale tyd vir die vraestel minus die tyd wat reeds gebruik is voordat die ontruiming plaasgevind het.
2.2 Die prinsipaal, die hoofopsiener en die ander opsieners moet te alle tye beheer uitoefen oor die kandidate en elke opsiener moet verantwoordelikheid aanvaar vir sy of haar groep kandidate.
2.3 In die geval van 'n ontruiming moet die kringspanbestuurder of direkteur van die betrokke onderwysdistrik onmiddellik in kennis gestel word. Die kringspanbestuurder of 'n ander afgevaardigde amptenaar van die distrik sal probeer om die skool onmiddellik te besoek ten einde die prosedures wat deur die skool gevolg word, te verifieer. Die afgevaardigde amptenaar moet, vanaf die tyd dat hy of sy by die skool aankom die situasie noukeurig monitor.
2.4 Versuim om die ontruiming presies op die voorgeskrewe wyse uit te voer, sal die geldigheid van die eksamen in gedrang bring en die gevolg mag wees dat alternatiewe opsies gevolg moet word, soos die herskedulering van die eksamens tot 'n later datum.
2.5 Prinsipale moet kandidate inlig oor die skool se gebeurlikheidsplan indien enige ontruiming nodig sou wees en ook van die ernstige gevolge indien so 'n ontruiming nie behoorlik uitgevoer word nie.
2.6 In die onwaarskynlike geval dat 'n nasionale of 'n provinsiale vraestel oorgeskryf moet word, sal die WKOD alle prinsipale onmiddellik daarvan in kennis stel. So 'n vraestel sal dan na 3 Desember 2010 geskryf word.

3. Risikobestuur
3.1 Skoolhoofde moet die volgende kontrolelys gebruik om hulle te help om moontlike risiko's te identifiseer ten opsigte van die afneem van die eksamen en om hulle risikobestuursplan daarvolgens op te stel.
3.2 Enige ontwrigting in die eksamenproses of foutiewe oopmaak van eksamenvraestelle moet onmiddellik by een van die volgende WKOD-beamptes aangemeld word:

Mev Z Modimakwane @ 021 467 2057 / 071 683 6286
Mnr AP Clausen @ 021 467 2945 / 082 773 9980
Me T Singh @ 021 467 2541 / 084 312 8333
Mnr BK Schreuder @ 021 467 2518 / 082 373 5989

4. Die WKOD wens u alles van die beste toe vir die eksamen.


GETEKEN: BK SCHREUDER
HOOF: ONDERWYS
DATUM: 2010:09:13

Kontrolelys vir risikobestuur in die Nasionale Senior Sertifikaat- en BOOV Vlak 4-eksamens  (grootte: 37 KB)