| 1. |
Dit is noodsaaklik dat gehalteversekeringsprosesse op alle vlakke plaasvind ten einde die geldigheid van die eksamenuitslae te verseker. Dit sluit in onaangekondigde besoeke aan eksamensentrums om te verseker dat alle eksamenprosesse en -prosedures behoorlik en in ooreenstemming met die regulasies vir die afneem, administrasie en bestuur van eksamens uitgevoer word. |
| 2. |
Verteenwoordigers van die volgende drie instansies sal die eksamenprosesse moniteer by die eksamensentrums: |
| 2.1 |
Die WKOD: Net soos in die verlede, sal Kringspanbestuurders, IBB-bestuurders, lede van die kringspanne en die Hoofdirektoraat: Assessering en Eksaminering kontroleer dat die eksamenprosesse doeltreffend toegepas word; |
| 2.2 |
Umalusi - Die Raad vir Gehalteversekering in Algemene en Verdere Onderwys en Opleiding; en |
| 2.3 |
Die Departement van Basiese Onderwys (DBO). |
| 3. |
Monitors van Umalusi en DBO is spesifiek vir hierdie doel aangestel en sal nie noodwendig vergesel wees van WKOD-amptenare wanneer hulle skole besoek nie. |
| 4. |
Kringspanbestuurders, IBB-bestuurders of lede van die kringspanne sal nie noodwendig net in hulle eie kringe monitor nie. |
| 5. |
Spanlede sal identifikasiedokumente in hulle besit hê en sal alle eksamenprosedures, byvoorbeeld die verwydering van vraestelle uit kluise, die veilige bewaring en berging van vraestelle in kluise, die skryf van die eksamen in die eksamenlokale en die toesighouding kontroleer. |
| 6. |
Geen persoon mag toegelaat word om sonder 'n identifikasiedokument van Umalusi of die DBO of 'n aanstellingsbrief van die WKOD waarin die persoon as ?n monitor aangestel word, 'n eksamensentrum te betree nie. Indien daar enige twyfel oor 'n persoon se identiteit bestaan, moet die hoof van die inrigting onverwyld met die Direkteur: Assesseringsbestuur (me Z Modimakwane) by 021 467 2057 / 071 683 6286, die Direkteur: Eksamenadministrasie (mnr AP Clausen) by 021 467 2945 / 082 773 9980, mnr J Parbhoo by 021 467 2572 of mnr TJ Magwaca by 021 467 2626 in verbinding tree. |
| 7. |
Die WKOD ondersteun hierdie moniteringsproses en is oortuig daarvan dat die eksamenprosesse in sy skole met integriteit gehanteer word. Hoofde van die betrokke inrigtings word dus ernstig versoek om in alle opsigte met die monitors saam te werk. |
| 8. |
Monitors is gevra om aan te meld by die kantoor van die hoof van die inrigting wanneer hulle kom en weer wanneer hulle vertrek. Hoofde van inrigtings word versoek om die moniteringsinstrument te onderteken en ook om te verseker dat die monitor die Register vir Monitors onderteken. |
| 9. |
Hierdie minuut word vergesel van twee moniteringsinstrumente (BYLAES A en B) vir gebruik in die monitering van die afneem van eksamens. Bylae A moet gebruik word deur alle gedelegeerde monitors, oor kringgrense heen, wat die eksamens moniteer. Bylae B is vir die gebruik van nie-gedelegeerde monitors om die eksamens binne hulle kringgrense te moniteer terwyl hulle hulle normale pligte vervul. |
GETEKEN: BK SCHREUDER
HOOF: ONDERWYS
DATUM: 2010:09:13
|