ASSESSERINGSBESTUURMINUUT: 0010/2010 |
AAN: | HOOFDIREKTEURE, DIREKTEURE (HOOFKANTOOR EN ONDERWYSDISTRIKS-KANTORE), HOOFONDERWYSKUNDIGES, KRINGSPANBESTUURDERS, HOOFDE: KURRIKULUMKOÖRDINERING EN -ADVIES, HOOFDE: IBB KOÖRDINERING EN -ADVIES, IBB-BESTUURDERS, KURRIKULUMADVISEURS, ADJUNKHOOFONDERWYSKUNDIGES, ASSESSERINGSKOÖRDINEERDERS EN HOOFDE VAN ALLE ONDERWYSINRIGTINGS WAT GRAAD 10 - 12 AANBIED |
| WYSIGINGS TOT BELEID EN REGULASIES BETREFFENDE DIE NASIONALE SENIOR SERTIFIKAAT |
| 1. |
Inleiding
Hierdie Assesseringsbestuursminuut maak bekend wysigings aan die Nasionale Beleid oor die Afneem, Administrasie en Bestuur van die Nasionale Senior Sertifikaat, 'n Kwalifikasie op Vlak 4 van die Nasionale Kwalifikasieraamwerk (NKR), soos gepromulgeer in Staatskoerant No. 30048, asook aan die Regulasies betreffende die Afneem, Administrasie en Bestuur van Assessering vir die Nasionale Senior Sertifikaat, wat verskyn het in die Staatskoerant No. 31337. Hierdie wysigings is ingesluit in Staatskoerant No. 32678 van 03 November 2009. |
| 2.1 |
Voltydse, herhalings- en deeltydse kandidate wat nie voldoen het aan die minimum sertfiseringsvereistes nie, maar wat 'n maksimum van twee vakke benodig om 'n Nasionale Senior Sertifikaat te verwerf, sal toegelaat word om aanvullende eksamens te skryf. |
| 2.2 |
Kandidate wat kwalifiseer vir aanvullende eksamens mag in die aanvullende eksamen van die volgende jaar registreer vir 'n maksimum van twee vakke. Hierdie vakke moet vakke wees wat die kandidaat in die vorige eindeksamen geskryf het. Hierdie opsie mag slegs een keer deur 'n deeltydse kandidaat uitgeoefen word, naamlik na voltooiing van die Nasionale Senior Sertifikaat-eindeksamen. |
| 2.3 |
Punte wat deur kandidate behaal is vir hulle skoolgebaseerde assesserings, praktiese assesseringstake, praktiese assesserings en mondelinge assesserings vir die Nasionale Senior Sertifikaat-eksamen wat hulle die laaste geskryf het, sal geldig wees vir 'n tydperk van twee jaar na voltooiing van daardie eksamen. |
| 2.4 |
Kandidate mag registreer vir Lewensoriëntering, wat intern geassesseer word, as een van die twee vakke wat in die aanvullende eksamen oorgeskryf sal word. Die herassessering van Lewensoriëntering moet voltooi word binne die tydperk waartydens die aanvullende eksamen afgeneem word. |
| 2.5 |
Kandidate wat een of meer vakke herhaal, sal toegelaat word om hulle vakke te kombineer, gebaseer op die huidige Nasionale Senior Sertifikaat-vereistes, ten einde 'n Nasionale Senior Sertifikaat te verwerf. Wanneer hierdie vakke gekombineer word, sal die algehele prestasie in die sewe vakke in aanmerking geneem word, op voorwaarde dat dit voldoen aan die vereistes vir die Nasionale Senior Sertifikaat. |
| 2.6 |
'n Kandidaat wat 'n geldige rede het waarom hy of sy nie die eindeksamen geskryf of voltooi het nie, kry die geleentheid om die aanvullende eksamen te skryf vir die spesifieke eksamenvraestel wat hy of sy nie in die eindeksamen geskryf het nie. Indien die kandidaat egter sou verkies om die hele vak te skryf, sal die kandidaat toegelaat word om hierdie opsie uit te oefen, afgesien daarvan of die kandidaat vir een of meer eksamenvraestelle afwesig was. |
| 2.7 |
Kandidate wat nie voldoen het aan die vereistes vir die skoolgebaseerde assessering en praktiese assesseringstaakkomponent nie, mag toegelaat word om die punte wat hulle in die skoolgebaseerde assessering en praktiese assesseringstaak behaal het, te verbeter, onderworpe daaraan dat bevredigende reëlings met die betrokke skool getref kan word. Hierdie take moet voorgelê word nie later nie as drie maande na die publikasie van die uitslae van die betrokke eksamen. Indien daar nie van hierdie geleentheid gebruik gemaak word nie, sal dit tot gevolg hê dat die kandidaat die vak moet herhaal en 'n nuwe skoolgebaseerde assesseringspunt moet verwerf. |
| 2.8 |
Aansoek om herassessering van skoolgebaseerde assessering moet deur die skool gedoen word, wat voltooide aansoekvorms by die betrokke onderwysdistrikskantoor moet inlewer. Hierdie vorms sal dan deur die onderwysdistrikskantoor voorgelê word aan die Direktoraat: Eksamenadministrasie. Ouers en leerders moet volle verantwoordelikheid neem vir die indien van uitstaande assesseringstake by die skool. |
| 2.9 |
In die geval dat 'n onreëlmatigheid ondersoek word, kan voorwaardelike inskrywing tot die aanvullende eksamen toegeken word aan die betrokke kandidaat, hangende die uitkoms van die ondersoek. |
| 3. |
Bevordering en Sertifikaatvereistes |
| 3.1 |
Kondonering van 'n maksimum van een vak sal toegepas word indien 'n kandidaat nie meer nie as 2% benodig om 'n vak te slaag met óf 30% óf 40%. Sodanige kondonering sal toegepas word in slegs een vak en ook slegs indien die kondonering die kandidaat in staat sal stel om die Nasionale Senior Sertifikaat te verwerf. Hierdie kondonering is alleenlik van toepassing op die graad 12- eindeksamen. |
| 4. |
Onderwysdistriksbeamptes en prinsipale word versoek om die inhoud van hierdie minuut onder die aandag van hulle personeel, ouers en leerders te bring. |
GETEKEN: BK SCHREUDER
HOOF: ONDERWYS
DATUM: 2010:08:27
Grand Central Towers, Laer-Parlementstraat, Privaatsak X9114, Kaapstad 8000
Meld asseblief verwysingsnommers in alle korrespondensie
VEILIGE SKOLE: 0800 45 46 47
INBELSENTRUM: 0861 92 33 22
|
