Heelskoolevaluering (HSE)

1. Die Direktoraat: Gehalteversekering wil hiermee graag sy dank uitspreek teenoor al die skole en beamptes vir hul samewerking met HSE.
2. Teen die einde van Junie 2009 was al die Nasionale Strategie vir Leerderprestasieskole (NSLP-skole) in 'n verkorte formaat geëvalueer. Gedurende 2009 is 53 NSLP skole geëvalueer, terwyl die ander 21 alreeds tussen 2006 en 2008 geëvalueer was.
3. Tot op hede is al die individuele NSLP-verslae aan die betrokke skole en distriksbeamptes oorhandig. 'n CD met al die verslae van die geëvalueerde skole tot en met einde 2008 is aan al die distrikte oorhandig.
4. 'n CD met al die verslae van skole wat gedurende 2009 geëvalueer was, sal teen die einde van November 2009 aan Hoofkantoor en die Distrikskantore beskikbaar gestel word sodat dit kan help met sodanige intervensies en ondersteuning aan alle WKOD-skole.

Regstellende aksie

5. 'n Opvolg sal gedoen word om te bepaal in hoe 'n mate aanbevelings geïmplementeer is asook tot watter mate areas vir ontwikkeling aandag in die HSE-verslae in ag geneem is. Die datums vir sodanige regstellende aksie besoeke sal vooraf bekend gemaak word.
5. Skole wat gedurende die tydperk Maart tot Junie 2009 ten opsigte van HSE geëvalueer was, word versoek om 'n vorderingsverslag aan die Direktoraat: Gehalteversekering te verskaf aangaande die implementering van die aanbevelings wat in die HSE verslae aangedui was. Hierdie aanbevelings moet verder deel vorm van hersiende 2009 SVP wat ook die 2010 SVP sal beïnvloed.

Skoolselfevaluering (SSE) en skoolverbeteringsplanne (SVP's)

7. Alle skole word daaraan herinner dat die volgende prosesse nou geïmplementeer moet word:

a. Die bevindinge van die HSE-verslae moet aan alle betrokkenes oorhandig word en vir SSE-doeleindes aangewend word;
b. 'n Ontleding van die 2009 SVP's moet gedoen word;
c. Die SSE moet aan die gang wees, insluitende die opstel van 'n aksieplan om elke fokusarea as 'n projek te bestuur. Indien nodig, kan kringspanne se ondersteuning versoek word. Die bevindinge van die SSE moet gebruik word om die hersiene SVP te beïnvloed;
d. Die 2010 SVP's moet al die bogemelde prosesse insluit. Fokusarea 4, 5 en 6 is verpligtend. Daarbenewens word skole versoek om nog 2 of 3 fokusareas te kies en te konsentreer op slegs geprioritiseerde kriteria.

8. Ingevolge die Wysigingswet op Onderwyswette (Wet 31 van 2007), moet 'n verslag oor die vordering en implementering van die 2009 SVP, insluitend teikens wat vir daardie jaar gestel is, by die distrikskantoor tesame met die nuwe SVP vir 2010 ingdien word. Die profielvorms sal deur die Hoofdirektoraat Inrigtingsontwikkeling en Koördinering aan alle skole gestuur word.
9. Die sperdatum vir die 2010 SVP's is 27 November 2009 vir primêre skole en 29 Januarie 2010 vir hoërskole. Die ondertekening van die SVP deur elke prinsipaal dien as 'n verifikasie dat die SSE behoorlik gedoen is in konsultasie met alle betrokkenes.
10. Prinsipale word daaraan herinner dat die doeltreffende implementering van hul SVP deurlopend moet wees. Personeellede moet hul volle saamwerking gee aan die ko-ordineerder van elke fokusarea in die SVP.

Prestasiemeting

11. Die moderering van al die onderwysers se tellings moet deur al die personeelontwikkeling-spanne gedoen word. Op distriksvlak sal die Hoofde: IBB-koördinering en -advies al die tellings modereer. Die kringspanbestuurders moet die prinsipale se tellings modereer. 'n Verslag oor die modereringsproses moet by die GGBS-koördineerder ingedien word.
12. Die sperdatum vir die inhandiging van al die tellings is 13 November 2009 (of volgens die datums wat deur die GGBS-koördineerder voorsien word.) Hoofde: IBB-koördinering en -advies en kringspanbestuurders word daaraan herinner dat wanneer hulle goedkeuring van tellings onderteken, hulle beoordeling gebaseer moet word op die bewyse in ooreenstemming met die prestasiestandaarde van die prinsipale.


GETEKEN: KN BYDELL
HOOF: ONDERWYS
DATUM: 2009:11:10