1. Die promosietoere in onderwysdistrikte om die kwalifikasiedatabasis (KDP) vir onderwysers uiteen te sit, is voltooi. Onderwysdistrik Metro-Suid het aangedui dat hulle volle verantwoordelikheid sal neem vir die opleiding van al hulle skole in die gebruik van die KDP, wat geakkommodeer sal word op die Menslikekapitaal-verlofbestuurstelsel (MKVBS). Ons wil graag die skole bedank wat hulle verteenwoordigers gestuur het na hierdie promosietoere, asook die onderwysdistrikpersoneel wat hierdie geleenthede georganiseer het. Ons bedank graag die prinsipale, personeel en SBL'e van die volgende skole wat opleidingslokale beskikbaar gestel het.

Aurial Kollege (Oudtshoorn), Nico Brummer Primêre Skool (Beaufort-Wes), Knysna Hoërskool (Knysna), Gerrit Du Plessis Hoërskool (Riversdale), Ridge View Primêre Skool (Mosselbaai), Faure Jeugsorgsentrum (Eersterivier), Livingstone Hoërskool (Kaapstad), Proteus Hoërskool (Atlantis), Dirkie Uys Primêre Skool (Moorreesburg), Paarl Gimnasium Hoërskool (Paarl), Nuwe Hoop Sentrum (Worcester), PW Botha Kollege (George)

'n Spesiale woord van dank aan alle skole wat deelgeneem het aan die loodsprojek in 2008. Hulle bydraes word baie hoog waardeer.
2. Die stelsel sal in werking tree vir alle onderwysinrigtings op 1 Junie 2009. Dit beteken dat alle skole in staat sal wees om toegang te verkry tot die KDP op die MKVBS sodat alle kwalifikasies, ervaring en vaardighede van alle onderwysers op hulle personeel ingesleutel kan word. Dit sluit in staatsdienspersoneel en SBL-besoldigde personeel, permanente sowel as kontrakaanstellings.
3. Die vaslegging van data moet deur 'n personeellid gedoen word wat óf deur die Staat óf deur die SBL besoldig word en deur die prinsipaal aangestel is, soos die geval met die MKVBS is. Die enigste verskil is dat, waar die datavaslegger 'n SBL-besoldigde onderwyser is, die prinsipaal die onderwyser se ID-nommer moet gebruik.
4. Nóg die datavaslegger nóg die prinsipaal sal verantwoordelikheid aanvaar vir die korrektheid van die inligting op die KDP. Elke personeellid moet volle verantwoordelikneid neem vir die korrektheid van sy of haar persoonlike besonderhede op die KDP.
5. Die prinsipaal kan meer as een persoon aanwys om inligting op die KDP vas te lê.
6. Die inligting aangaande personeel van skole wat aan die loodsprojek deelgeneem het, is steeds op die stelsel. Ons het nou die wagwoorde van daardie onderwysers buite werking gestel en ons raai hulle aan om die inligting na te gaan vir korrektheid aangesien die databasis aangepas is na die voltooiing van die loodsprojek.
7. Sodra die vaslegging afgehandel is, moet die prinsipaal Bylae A voltooi (DHP QDP- 0002) wat teruggestuur moet word na die Direktoraat: Menslikekapitaalbeplanning, via die betrokke onderwysdistrik. Distrikskantore word versoek om al hierdie vorms in te samel en teen Vrydag, 24 Julie 2009 voor te lê aan die volgende adres:

 

Direkteur: Menslikekapitaalbeplanning
Wes-Kaap Onderwysdepartement
2de Vloer, Kamer 2011
Atterbury House
h.v. Riebeeck- en Laer Burgstraat
Kaapstad
8000

Faksno: 021 467 9384 of 086 694 4133.

E-posadres: avmalgas@pgwc.gov.za of mdelo@pgwc.gov.za)
8. Skole het tyd vanaf 1 Junie 2009 tot 30 Junie 2009 om al die inligting aangaande hulle onderwysers vas te lê.
9. Die verifikasie van die inligting sal in die derde skoolkwartaal begin en sal in twee fases gedoen word:
9.1 Tydens die eerste fase sal 'n vlag bygevoeg word tot die KDP om elke lid van 'n skool se onderwyspersoneel toe te laat om sy of haar persoonlike inligting aanlyn by te werk en te verifieer. Elke onderwyser sal die korrektheid van sy of haar persoonlike gegewens verifieer deur dit te onderteken. Onderwyspersoneel sal tyd hê tot 9 Oktober 2009 om hulle persoonlike gegewens te redigeer, by te werk en te onderteken. Na 9 Oktober 2009 sal onderwysers die Direktoraat: Menslikekapitaalbeplanning moet versoek om die gegewens te verander.
9.2 Tydens die tweede fase sal die gegewens van elke onderwyser geverifieer word deur 'n agentskap wat gelisensieer is om dit te doen.
10. Ruimte word ook op die KDP gelaat vir elke onderwyser om die studente- of eksamennommer in te vul wat deur die tersiêre inrigting waar hy of sy gestudeer het, toegeken is. Indien die onderwyser nie oor daardie nommer beskik nie of indien daardie tersiêre inrigting gesluit is, moet die onderwyser sy of haar ID-nommer invul. Dit is alleenlik van toepassing waar 'n inrigting gesluit het en nie met 'n ander inrigting saamgesmelt het nie.
11. 11. Daar is ook ruimte gelaat op die KDP vir die onderwyser se kwalifikasiesertifikaatnommer. Indien die sertifikaat nie 'n nommer het nie, moet die onderwyser se identiteitsnommer in die plek daarvan ingevoeg word.
12. Die KDP is gebruikersvriendelik, maar indien u enige vrae het, neem asseblief vrymoedigheid om dit met u IBB-bestuurder of kringspanbestuurder te bespreek. In uitsonderlike gevalle kan u die Direktoraat: Menslikekapitaalbeplanning bel.
13. Indien 'n onderwyser aansoek gedoen het om 'n sertifikaat by 'n professionele liggaam soos SARO en nog nie daardie sertifikaat ontvang het nie, moet die getal 6683663 in die plek daarvan ingesleutel word. Die egte sertifikaatnommer moet egter al ingesleutel wees teen die tyd dat die onderwyser die korrektheid van sy of haar inligting verifieer deur dit te onderteken.
14. Let asseblief daarop dat tegniese kwalifikasies gewoonlik N-vlak-kwalifikasies is. U professionele kwalifikasies sluit gewoonlik woorde in soos onderwys, opleiding, opvoeder, educationis of onderwyser op die sertifikaat. Alle ander kwalifikasies moet geag word akademies te wees, insluitend die senior sertifikaat van u skool. Dit beteken dat, indien 'n onderwyser 'n tersiêre kwalifikasie het van 'n onderwysopleidingskollege of tegniese kollege, sy of haar hoogste akademiese kwalifikasie sy of haar senior sertifikaat is.
15. Onderwysers moet alle kwalifikasies vaslê, nie slegs die hoogste kwalifikasie nie.
16. Bring asseblief die inhoud van hierdie minuut onder die aandag van alle onderwyspersoneel en laat hulle teken as erkenning van ontvangs daarvan. Bewyse dat alle personeel geteken het, moet op lêer geplaas word vir veilige bewaring.
17. U samewerking sal opreg waardeer word.


GETEKEN: WILLIAM JS JANTJIES
HOOF: ONDERWYS
DATUM: 2009:05:29

Bylae A  (grootte: 38 KB)