1. Ten einde data oor die vaardighede en kwalifikasies van Wiskunde-, Wetenskap- en Rekeningkunde-opvoeders in die stelsel in te samel en te ontleed, onderneem die Wes-Kaap Onderwysdepartement (WKOD) tans die Wiskunde-, Wetenskap- en Rekeningkunde-opvoeders se kwalifikasiesprojek (WWRP).
2. Die projek sal verseker dat die WKOD beskik oor betroubare inligting sodat ingeligte besluite geneem kan word oor watter strategieë toegepas moet word en watter intervensies toepaslik sal wees om ons opvoeders te help om beter voorbereid te wees vir die uitdagings waarmee hulle in skole te kampe kry.
3. Kennis van die presiese getal Wiskunde-, Wetenskap- en Rekeningkundeopvoeders in die stelsel sal ons ook in staat stel om beter te beplan en vooruitskattings te maak vir die toekomstige menslikehulpbronbehoeftes van die onderwystelsel in hierdie provinsie, om intervensies te beplan en om aandag te gee aan moontlike toekomstige leemtes in personeelvoorsiening op hierdie gebied.
4. Hierdie projek het noodsaaklik geword omdat ons bewus is van die probleme wat skole ondervind om opgeleide Wiskunde-, Wetenskap- en Rekeningkunde-opvoeders te bekom.
5. Die WKOD sal ook hierdie data en planne deel met ander belanghebbendes in die onderwys, bv. die provinsiale wetgewer se Staande Komitee oor Onderwys.
6. Alle prinsipale van skole met leerders in graad 8 tot 12 word dus versoek om die DHP MSAP 0001-vorm, soos op Vrydag 15 Mei 2009, te voltooi vir alle opvoeders op hulle personeel wat Wiskunde, Wiskundige Geletterdheid, Fisiese Wetenskap, Lewenswetenskap, Landbouwetenskap, Inligtingtegnologie en Rekeningkunde vir graad 8 en/of 9 en/of 10 en/of 11 en/of 12.onderrig. Dit sluit permanente, kontrak-, plaasvervangende en SBL-opvoeders in.
7. Wanneer die vorm voltooi word, gebruik asseblief die volgende kodes (kyk aangehegte voorbeeld van 'n voltooide DHP MSAP 0001-vorm): As 'n onderwyser 'n vak tot op derdejaarvlak aan 'n universiteit bestudeer het, moet dit as U3 aangedui word. As 'n onderwyser 'n vak tot op tweedejaarvlak by 'n opleidingskollege gedoen het, moet dit as C2 aangedui word. As 'n onderwyser 'n vak tot op tweedejaarvlak by 'n universiteit van tegnologie (voorheen bekend as 'n technikon) gedoen het, moet dit aangedui word as T2. As 'n onderwyser 'n vak tot op vlak twee by 'n tegniese kollege gedoen het, moet dit aangedui word as N2.
8. Die voltooide vorms moet die Direktoraat: Menslikekapitaalbeplanning teen Vrydag 5 Junie 2009 bereik en moet gestuur word (gepos, gefaks of ge-epos) na die volgende adres:

Die Direkteur
Menslikekapitaalbeplanning
Wes-Kaap Onderwysdepartement
2de Vloer, Kamer 2011
Atterbury House
h.v. Riebeeck- en Laer Burgstraat
Kaapstad
8000
Aandag: WWRP-projek

Faks: 021 467 9384 of 086 694 4133.

E-pos: avmalgas@pgwc.gov.za of mdelo@pgwc.gov.za

9. Indien u enige navrae het, moet asseblief nie huiwer om met me. Margaret Delo by tel. nr. 021 467 2073/2288 in verbinding te tree nie.

10. Bring asseblief die inhoud van hierdie minuut onder die aandag van alle personeel.

11. U samewerking sal waardeer word.


GETEKEN: WILLIAM JS JANTJIES
HOOF: ONDERWYS
DATUM: 2009:05:04

"DHP MSAP 0001 form"  (grootte: 31 KB)
"DHP MSAP 0001 example"  (grootte: 39 KB)