| 1. |
Ingevolge Deel III, afdelings C1 en C2 van die Staatsdiensmaatreëls, 2001 (soos gewysig), moet die Hoof van Onderwys 'n diensleweringsverbeteringsprogram (DLVP) daarstel en handhaaf, en 'n jaarlikse verklaring uitreik van staatsdiensverbintenis waarin die diensstandaarde wat kliënte van die departement kan verwag uiteengesit word, en verduidelik word hoe die departement beoog om aan elk van daardie standaarde te voldoen. |
| 2. |
Die DLVP moet bestaan uit die volgende:
- Belangrikste dienste wat voorsien sal word
- Konsultasie-reëlings tussen die departement en sy kliënte
- Kliënte se wyse van toegang tot die departement se dienste
- Diensstandaarde vir die belangrikste dienste
- Inligtingsdelingreëlings
- Klagteprosedures
- Erkenningstelsels
|
| 3. |
Die daarstelling en handhawing van 'n DLVP word ook bepaal deur die volgende wetgewing:
Batho Pele Witskrif (Nr. 1459 van 1997)
Beginsel 2 van die Diensstandaarde: Burgers moet in kennis gestel word van die vlak en gehalte van openbare dienste wat hulle sal ontvang sodat hulle kan weet wat om te verwag.
Die Wet op Openbare Finansiële Bestuur (Nr. 1 van 1999)
Dit bepaal dat strategiese planne nie in isolasie ontwikkel kan word nie en dat hulle 'n integrerende deel moet wees van 'n departement se DLVP.
Wet op die Bevordering van Administratiewe Geregtigheid (Nr. 3 van 2000)
Dit voorsien 'n wetlike raamwerk waarbinne administrateurs moet funksioneer wanneer hulle besluite neem wat burgers raak, bv. 'n besluit om 'n subsidie aan 'n Vroeër Kinder Ontwikkelings-fasiliteit toe te ken. |
| 4. |
Die Departement van Staatsdiens en Administrasie (DSA) vereis dat departemente jaarliks twee diensstandaarde vir rekorddoeleindes moet indien. Vir die 2009/2010 finansiële jaar het die WKOD daaraan voldoen met die aangehegte diensstandaarde vir die Direktoraat: Kommunikasie (Instapsentrum en Inbelsentrum). Alleenlik beskikbaar in Engels. |
| 5. |
Die Direktoraat: Besigheidsbeplanning en -strategie het opdrag gekry om die bogenoemde en ander verwante inisiatiewe uit te voer, en het die WKOD se diensleweringsverbeteringskoördineerder, Leslie Daniels, (tel. 021 467 2059, e-posadres ledaniels@pgwc.gov.za) formeel aangestel met ingang van 1 Februarie 2009. |
| 6. |
Ingevolge wetgewing moet 'n nuwe diensleweringsmanifes hierdie jaar uitgereik word. Ten einde die WKOD in staat te stel om daaraan te voldoen, word die volgende stappe beplan: |
| 6.1 |
'n Kliënt-tevredenheidsopname sal uitgevoer word deur 'n steekproef van skole te gebruik; |
| 6.2 |
Elke direktoraat sal deur die DLVP-eenheid gekontak word ten einde oefeninge te onderneem vir die bepaling van diensstandaarde en/of die bevestiging van hertoewyding daaraan. |
| 6.2.1 |
'n Aanvangsafspraak met die direkteur behoort 45 minute in beslag te neem. |
| 6.2.2 |
'n Daaropvolgende afspraak moet binne 'n week na die aanvangsafspraak plaasvind. Dit moet bygewoon word deur die adjunkdirekteur(e) en assistentdirekteur(e). Die direkteur moet verkieslik, maar nie noodwendig nie, ook teenwoordig wees. Afhangende van die grootte van die betrokke direktoraat, die huidige kapasiteit daarvan en die rolle waarvoor dit verantwoordelik is, sal hierdie tweede afspraak enige tyd tussen 'n uur en 'n dag in beslag neem. |
| 6.2.3 |
In die geval van groter direktorate sal die tweede afspraak deur die dag versprei word, d.w.s. afsprake sal met elke afdeling om die beurt wees en dit sal nie vir alle personeel nodig wees om vir die hele dag teenwoordig te wees nie. |
| 6.2.4 |
In die geval van direktorate wat heeltemal nuut is, of radikaal hersien is, sal die afsprake moontlik effens langer wees.
|
| 6.2.5 |
Die aanvangsafspraak met die direkteur sal dien om die vorm van verdere afsprake met die direktoraat te bepaal. |
| 7. |
Addisionele kommunikasie oor die implementeringsplan vir die WKOD se 2009/2010 finansiële jaar sal mettertyd volg. Maak asseblief die inhoud van hierdie minuut bekend aan u personeel. |
GETEKEN: AMJ SCHLEBUSCH
HOOF: ONDERWYS
DATUM: 2009:04:29
|