1. Die Wes-Kaap Onderwysdepartement (WKOD) het met kommer oor die afgelope paar jaar kennis geneem dat sekere skole hulle nie hou by die amptelike getal skoolure nie, met 'n gevolglike verlies van onderrigtyd. Die impak van hierdie verlies op leerderprestasie is onbetwisbaar.
2. Ten einde die onderwysregte van kinders te beskerm, is die WKOD van voorneme om dissiplinêr op te tree teen prinsipale van skole wat voortgaan om die skooldag te verkort.
3. In hierdie verband vestig ons graag die aandag van prinsipale op die volgende:
3.1 Daar word van elke skool verwag om dwarsdeur die skooljaar in alle grade te voldoen aan die amptelike vereistes rakende skoolure.
3.2 Daar word van alle leerders verwag om op elke skooldag van die jaar die skool vir die hele skooldag by te woon.
3.3 Elke moontlike poging moet aangewend word om te verseker dat die graad 12-eksamen nie die onderrigtyd in die res van die skool beïnvloed nie.
3.4 Onder geen omstandighede mag enige leerders toegelaat word om tuis te bly wanneer hulle nie eksamens skryf nie.
3.5 Die skooldag moet elke dag op die bepaalde tyd begin vir alle leerders, insluitende diegene wat eksamens skryf. Dit sal bydra tot die handhawing van orde en dissipline in die skool.
3.6 Wanneer ander soorte assessering, bv. beheerde toetse, afgeneem word, moet dit binne normale skoolure geskied.
3.7 In die geval van graad 12-leerders mag skole die normale rooster wysig om die volgende in te sluit: tutoriale, studiegroepe, individuele remediërende sessies, hersieningslesse en gereelde klasse onder toesig binne 'n gestruktureerde omgewing.
3.8 Onderwysers moet dwarsdeur die skooljaar voldoen aan die vereiste werkweek van 35 uur.
3.9 Op die laaste dag van elke kwartaal moet leerders vir ten minste 3 uur en onderwysers vir ten minste 5 uur by die skool wees.
4. In die beperkte tyd tot die beskikking van onderwysers en leerders - en gedagtig aan die verlies van onderrigtyd veroorsaak deur die onlangse erge vorm van griep - is dit gebiedend noodsaaklik dat dissipline onder leerders by alle skole gehandhaaf word. Die volle gebruik van onderrigtyd is 'n belangrike wyse waarop dit bereik kan word. Prinsipale moet nie swig voor die druk van gemeenskappe of personeel om die skooldag te verkort nie.
5. Prinsipale word daaraan herinner dat hulle by die distrikskantoor aansoek moet doen as hulle gedurende skoolure 'n groep leerders op 'n uitstappie wil neem.
6. Aktiwiteite wat skole gedurende onderrigtyd reël en wat min of geen opvoedkundige waarde het nie, bv. strandwandelinge, spesiale dae, sal nie deur die distrikskantoor goedgekeur word nie.
7. Die Junie-eksamens het aangetoon dat daar baie risiko-leerders is en, waar van toepassing, moet skole alles in hulle vermoë om onderrigtyd wat hulle moontlik verloor het, in te haal, beginnende met die volle gebruik van die beskikbare tyd wat oorbly.


GETEKEN: LJ ROSE
HOOF: ONDERWYS
DATUM: 2009:08:19