1. Die WKOD het met besorgdheid kennis geneem van sommige skole se versuim om gehoor te gee aan die regulasies rakende die maksimalisering en optimale gebruik van onderrig- en leertyd in die algemeen, en gedurende assesserings- en/of ander eksamentydperke in die besonder.
2. Talle klagtes en uitings van kommer met betrekking tot die vermorsing van tyd wat ten volle tot voordeel van leerders se onderrig benut behoort te word, word steeds deur die WKOD uit verskeie oorde ontvang.
3. Die WKOD beklemtoon graag sy beskouing - wat bewys is deur navorsing - dat die optimale gebruik van alle skooldae en alle beskikbare ure 'n belangrike faktor is wat 'n impak het op hoë leerderprestasie. Dit versterk ook 'n ordelike, leerdergesentreerde ingesteldheid by 'n skool.

4. Alle beamptes by skole en onderwysdistrikskantore word versoek om op die volgende te let:
4.1 Dit is die verantwoordelikheid van elke skool om sy skoolprogram te beplan vir die tydperk gedurende en na die assessering en/of eksamen tot op die laaste dag van die skoolkwartaal, en om alle leerders en ouers dienooreenkomstig in te lig.
4.2 Skooldae gedurende die Junie-, September- of jaareindeksamen moet NIE vroeër NIE as 13:00 vir leerders eindig. Leerders moet vir die hele tydperk steeds onderrigondersteuning en -konsolidasie ontvang.
4.3 Skole moet seker maak dat alle leerders op alle dae die skool bywoon, ongeag of hulle betrokke is by assessering of skryf van eksamens of nie. Onderrigtyd moet effektief gebruik word, veral om te verseker dat kurrikulumdekking in pas is met die pasaanwysers.
4.4 Skole moet hulle eksamens op so 'n wyse beplan dat geen leerder wat betrokke is, vroeër klaarmaak as 13:00 nie. Om te verseker dat onderrigtyd so min as moontlik ingekort word, moet die tydperk wat vir graad 10 - 12 aan eksamens afgestaan word, nie 14 dae oorskry nie.
4.5 Onder geen omstandighede mag leerders, insluitende leerders by koshuise/hostelle toegelaat word om die kwartaal vroeër af te sluit nie.
4.6 Onder geen omstandighede mag skole leerders inlig dat dit die leerders se besluit is om skool toe te kom of nie na afloop van die eksamens vir die kwartaal of wanneer hulle nie toetse/eksamens skryf nie.
4.7 Daar word van alle opvoeders verwag om elke dag gedurende hierdie tydperk (35 uur per week) vir die volle skooldag by die skool te wees, ongeag of hulle toesighoudende diens moet verrrig of nie.
4.8 Onderwysdistriksbeamptes sal modereringsprosesse by steekproefskole uitvoer, soos bepaal deur die distrikte.

5. Onderwysdistriksbeamptes sal die implementering van hierdie opdragte monitor. Prinsipale en skoolbeheerliggame word versoek om spesiale aandag te gee aan die ontwikkeling van hulle programme vir die tydperk waarna daar verwys word, om te verhoed dat waardevolle tyd vir leer vermors word.


GETEKEN: B VOLSCHENK
HOOF: ONDERWYS
DATUM: 2009:05:04