| 1. |
Op 17 April 2008 was dit presies 350 jaar sedert die eerste formele skool aan die Kaap gestig is. In 1658 is 'n klein skooltjie in die Slawelosie begin vir die slawe van die VOC en hulle kinders. Vir etlike jare was slawe se kinders dus die beste formeelonderrigte kinders in die Kolonie!
|
| 2. |
Baie jare later, in 1839, is die Wes-Kaap Onderwysdepartement gestig as die Departement van Openbare Opvoeding van de Kolonie van de Kaap de Goede Hoop. In die dae vóór Apartheid het dié departement omgesien na die belange van alle skole: swart, wit, bruin en spesiaal.
|
| 3. |
Ons skole het 'n trotse geskiedenis van onderwysdiens aan hulle gemeenskappe en baie van hulle het reeds hulle 100ste of 75ste herdenkings gevier.
|
| 4. |
Die Onderwysmuseum by die Sentrum vir Bewaringsopvoeding in Wynberg stel belang in die geskiedenisse van alle skole. Hierdie geskiedenisse word sover moontlik geliasseer en aan navorsers beskikbaar gestel. Baie skole is egter nie verteenwoordig nie, deur geen toedoen van die Museum nie. Ten einde dit reg te stel, is die Museum van voorneme om 'n ernstige poging aan te wend om die geskrewe geskiedenisse van al die baie skole in die Wes-Kaap te bekom, beginnende by die oudstes.
|
| 5. |
In die geval van skole wat 75 jaar of ouer is (d.w.s. in of voor 1934 gestig), moet die aangehegte Opnamevorm (Bylae A) asseblief ingevul en gestuur word aan:
Me Sigi Howes (Hoof)
Onderwysmuseum
Sentrum vir Bewaringsopvoeding
Aliwalweg 9
Wynberg
7800
|
| 6. |
'n Eksemplaar van die geskrewe geskiedenis van die skool, 'n foto van die skool, die skoollied, die skool se leuse en 'n sakwapen van die kleurbaadjie moet, indien beskikbaar, aangeheg word. Dit sal 'n goeie grondslag vorm vir die Museum se argieflêers oor individuele skole. Enige ander materiaal is welkom, maar opsioneel.
|
| 7. |
Hierdie inligting sal die Onderwysmuseum ook help om 'n databasis van die oudste skole in die Wes-Kaap saam te stel, 'n hulpbron wat toekomstige navorsing oor skole sal vergemaklik.
|
| 8. |
Skole waarvan die geskiedenis nog nooit opgeteken is nie, moet dit asseblief op die vraelys aandui. Sulke skole kan (op versoek) hulp ontvang oor hoe om 'n basiese rekord van hulle geskiedenis by te hou.
|
| 9. |
Die uiteindelike insluiting van alle skole wat na 1934 gestig is, word ook in die vooruitsig gestel.
|
| 10. |
Kyk in die tussentyd na Bylae B en C oor ons Skole se Erfeniskompetisie, waar skole pryse kan wen deur hulle geskiedenis te skryf. Die kompetisie is oop vir alle skole waarvan die geskiedenis nog nooit voorheen aangeteken en/of gepubliseer is nie en sal op 'n jaarlikse basis herhaal word.
|
| 11. |
Voorafkennisgewing van hierdie Omsendbrief het in die Sentrum se kwartaallikse nuusbriewe, EnviroNews 1/2008, 2/2008, 1/2009 en op die 'e-Schools' se poslys verskyn. Skole wat alreeds op daardie artikels gereageer het en die Opnamevorm (Bylae A) voltooi het, hoef dit nie weer te doen nie. Hulle belangstelling en samewerking word hoog op prys gestel.
|
GETEKEN: LJ ROSE
HOOF: ONDERWYS
DATUM: 2009:03:31
|