1. Soos die geval is met enige eksamen, is dit van die uiterste belang dat alle eksamenvraestelle en memorandums beveilig word om die geldigheid van die algemene eksamens te beskerm.
2. Een CD, wat die eksamenvraestelle vir al die eksamens bevat en 'n ander CD wat die nasienmemorandums bevat, sal ten minste 7 dae voor die begin van die eksamens by Nasionale Strategie vir Leerderprestasie-skole en risikoskole afgelewer word.
3. Prinsipale sal voorsien word van 'n kode om toegang tot albei CD's te verkry. Dit is raadsaam dat alleenlik die prinsipaal meesterkopieë van die CD sal druk, sodat vakke wat nie op die skool van toepassing is nie 'n risiko word nie.
4. Die vroegtydige produksie van drukstukke van die eksamenvraestelle sal die verantwoordelikheid van die prinsipaal wees. (Maak seker dat die drukker in werkende toestand is.)
5. Alle veiligheidsmaatreëls moet getref word met die druk sowel as die berging van die vraestelle. (In hierdie verband, raadpleeg asseblief die Opsienershandleiding 2008, wat aan prinsipale verskaf is.) Alle personeel moet daarvan bewus gemaak word dat daar geen voordeel vir enigiemand sal wees indien sekuriteit op enige wyse verbreek word nie. Hierdie eksamens bied 'n geleentheid aan leerders en onderwysers om die graad van gereedheid van die kandidate vir die finale eksamens te assesseer
6. Kontroleer asseblief die vraestelle en rangskik hulle chronologies in jou kluis ooreenkomstig die rooster.
7. Die prinsipaal is verantwoordelik vir die uitreik van die korrekte vraestel ooreenkomstig die rooster.
8. Elke memorandum moet beskikbaar gestel word aan onderwysers slegs nadat die vraestel geskryf is.
9. Om ongereeldhede te vermy met die veilige bewaring van eksamenvraestelle, punteskemas, antwoordboeke en skryfbehoeftes moet die prinsipaal of sentrumbestuurder verseker dat hierdie items in 'n kluis gestoor word.
10. Die prinsipaal is alleen verantwoordelik vir die veilige bewaring van die sleutels van die kluis. Dit is ook van toepassing in die geval dat 'n skool se vraestelle, punteblaaie, antwoordboeke en skryfbehoeftes by 'n ander skool of inrigting geberg word. Die IBB-adviseur moet verseker dat hierdie opdrag noukeurig uitgevoer word.
11. Onder geen omstandighede mag vraestelle uit die skool verwyder word voor of tydens eksamens nie. Reëlings moet getref word deur die prinsipaal vir die oopsluit van die kluis en vir die nakom van al die ander sekuriteitsprosedures in verband met die eksamenvraestelle.
12. Die noodsaaklikheid van die veilige bewaring van vraestelle kan nie oorbeklemtoon word nie en dit is dus gebiedend noodsaaklik dat alle voorsorgmaatreëls getref word wanneer met die CD's of met die stoor van vraestelle gewerk word.
13. Ons wens alle skole en leerders voorspoed toe met die eksamens.


GETEKEN: LJ ROSE
HOOF: ONDERWYS
DATUM: 2009:08:19