1. Kinders van skoolgaande ouderdom is die meeste geneig om wurmverwante siektes op te doen. Studies het aangetoon dat 80% tot 100% van kinders wat primêre skole in sekere gebiede bygewoon het, met wurms geïnfekteer is. Kinders wat in gemeenskappe woon waar daar nie skoon water en behoorlike riolering is nie, loop die grootste risiko. Daarbenewens het onlangse navorsing getoon dat chroniese wurmbesmetting die risiko van MIV en TB verhoog. Wurms kompeteer ook vir die kos en energie wat kinders benodig om te groei. Hoewel kinders van voedsame kos voorsien word deur middel van die Nasionale Skoolvoedingsprogram, moet baie van hierdie kinders ook vir wurmbesmetting behandel word. 'n Onlangse ewekansige gekontroleerde steekproef wat 28 000 kinders in Uganda betrek het, het getoon dat slegs 2 ontwurmingsbehandelings per jaar daartoe lei dat hierdie kinders tot 10% meer gewig per jaar optel.
2. In Mei 2001 het Suid-Afrika die Wêreldgesondheidvergadering (WGV) se resolusie 54.19 onderskryf, wat beoog dat 75% tot 100% van skoolkinders teen 2010 aan 'n gereelde skoolgebaseerde ontwurmingsprogram moet deelneem, met behandeling wat grootliks deur opvoeders verskaf word.
3. Die Wes-Kaap Onderwysdepartement en die Departement van Gesondheid onderskryf gereelde ontwurmingsessies by bepaalde skole, wat insluit:
3.1 skole wat deel het aan die Nasionale Skoolvoedingsprogram, en
3.2 skole wat deur skoolgesondheidspersoneel of omgewingsgesondheidspraktisyns van die Departement van Gesondheid geïdentifiseer word.
4. Skole wat aan die ontwurmingsprogram wil deelneem, kan na die aangehegte Step by Step Guide to Deworming verwys vir meer inligting. (Let asseblief daarop dat die riglyne deur die Departement van Gesondheid versprei is en slegs in Engels beskikbaar is.)
5. Skole wat aan die program deelneem, sal op die volgende drie aspekte moet fokus:
5.1 Ontwurming: Ontwurmingstablette sal deur die skool se gesondheidspersoneel uitgedeel word en toegedien word deur opgeleide opvoeders aan leerders wie se ouers toestemming gegee het dat die kinders by die program betrokke mag raak (sien die Step by Step Guide to Deworming);
5.2 Gesondheids- en Higiëne-opleiding: Gesondheids- en higiëne-opleiding vorm 'n integrale deel van die ontwurmingsprogram en het ten doel om die verspreiding van die besmetting te verhoed. Daar word aanbeveel dat opvoeders lesplanne ontwikkel om hierdie inligting in huidige onderwyspraktyk te inkorporeer. Leerderondersteuningsmateriaal is beskikbaar vir die Grondslag- en Intermediêre Fases. Die materiaal kan deur die skoolverpleegster bestel word. Skole word ook aangemoedig om strategieë te ondersoek om ouers en die breër gemeenskap oor wurms in te lig, bv by ouer- en gemeenskapsvergaderings, deur middel van pamflette, plaaslike koerante, gemeenskapsradiostasies (sien Step by Step Guide to Deworming);
5.3 Sanitasie: Die program moet ondersteun word deur monitering van die higiëne en sanitasie van die skoolterrein om herbesmetting te voorkom. Tydens monitering moet daar nagegaan word dat toilette en wasbakke skoon en in 'n werkende toestand is, dat leerders toegang het tot seep en toiletpapier en dat sanitêre dromme voorsien word (sien School Sanitation Guidelines).
6. Maak asseblief seker dat hierdie inligting onder die aandag van lede van die skoolbeheerliggaam sowel as personeel gebring word.


GETEKEN: MJ THERON
HOOF: ONDERWYS
DATUM: 2009:11:20

Step by Step Guide to Deworming  (grootte: 28 KB)