1. Skooltoilette en handwasfasiliteite speel 'n kritieke rol in die bevordering van leerders se gesondheid en voorkoming van die verspreiding van onder andere diaree, cholera, tifus, intestinale parasiete, ooginfeksies en velsiektes.
2. Ingevolge die Suid-Afrikaanse Skolewet is die skoolbeheerliggaam aanspreeklik vir die daaglikse instandhouding van hierdie fasiliteite.
3. Alle skole moet aan die volgende basiese standaarde voldoen:
  • Skole moet voldoende toilette en handwasfasiliteite hê om aan leerders se behoeftes te voldoen, gegrond op 'n aanbevole leerder:toilet-verhouding van 35:1 en 'n leerder:wasbak-verhouding van 60:1;
  • Alle toilette en wasbakke moet in 'n skoon, werkende toestand wees;
  • Leerders moet toegang tot behoorlike toiletpapier hê om blokkasies te verhoed;
  • Leerders moet voorsien word van seep en skoon water om hulle hande te was nadat hulle die toilet gebruik het;
  • Sanitêre blikke moet in alle dames toilette voorsien word om blokkasies te voorkom;
  • Alle skole moet voorsiening maak vir leerders met spesiale behoeftes;
  • Alles moontlik moet gedoen word om leerders se persoonlike veiligheid en privaatheid te verseker wanneer die toiletfasiliteite gebruik word.
4. Daarbenewens word skole aangeraai om die volgende voorstelle te oorweeg vir verbeterde bestuur van die bogenoemde op skoolvlak:
  • Alle skole moet 'n opname van die skooltoilette en handwasfasiliteite onderneem en daaraan werk om die mees toepaslike oplossings te verkry. Hierdie opname moet gereeld gedoen word om die gebruik, higiëne en onderhoud van hierdie fasiliteit te monitor. Aktiewe deelname van die leerders en opvoeders aan hierdie aktiwiteit moet aangemoedig word. Bevindinge van die opname moet aan die leerders, personeel, skoolbeheerliggaam en kringbestuurder deurgegee word;
  • Seep en toiletpapier moet vir alle fasiliteite beskikbaar wees en daar moet in die skool se begroting daarvoor voorsiening gemaak word. Indien skole besluit het dat die opvoeders seep en toiletpapier moet uitdeel soos wat dit benodig word, ten einde diefstal en vermorsing te voorkom, moet die skoolbestuur seker maak dat genoegsame geleentheid vir leerders bestaan om van hierdie fasiliteite gebruik te maak;
  • Indien toilette of handwasbakke vuil, geblokkeer of gebreek is, moet dit so vinnig as moontlik reggestel word.
5. Daar word aanbeveel dat opvoeders verwys na die belangrikheid van persoonlike higiëne, water, sanitasie en omgewingsgesondheid gedurende onderrig. Daar is leerderondersteuningsmateriaal by die Gesondheidsbevorderings-hulpbronsentrum (telefoonnommer 021 710 9863, 2de vloer. Maynard Plaza, Maynardweg, Wynberg) beskikbaar vir beide die Grondslag- en Intermediêre Fase.
6. Die aangehegte "School Sanitation Guidelines" sit die rolle en verantwoordelikhede van leerders, opvoeders, skoonmaakpersoneel en die skoolbeheerliggaam uiteen ten einde die korrekte gebruik en instandhouding van hierdie fasiliteite te verseker. Duidelike riglyne word voorsien vir daaglikse instandhouding en noodherstelwerk.
7. Dit sal waardeer word indien hierdie inligtingsblaaie en kennisgewing onder die aandag van alle personeel en skoolbeheerliggaamlede gebring kan word.


GETEKEN: HA LEWIS
HOOF: ONDERWYS
DATUM: 2009:11:20

School Sanitation Guidelines  (grootte: 51 KB)