1. |
ISebe leMfundo leNtshona Koloni (WCED) likuxabisile ukuzinikela kootitshala bethu ekwandiseni ulwazi lwabo kwizinto zemfundo eziqhubekayo ngoku nasekuphuhliseni izakhono zabo zokufundisa. |
2. |
ISebe i-WCED liya kuncedisa ootitshala ngemali yokufunda ngokungesosigxina ukuba bafundele isidanga esilandela esokuqala, i-B Ed Hons, balandele nayiphi na inkalo yokufunda yezemfundo ethile. |
3. |
Bayacelwa ootitshala abasele bebhalisele unyaka wezifundo ka-2009 ukuba bafake isicelo soncedo lwemali lohlobo oluyibhasari ukwenzela ithuba lonyaka (leminyaka) eliseleyo lokufundela isidanga se-B Ed Hons. |
4. |
Ukunikwa ibhasari kuxhomekeke kumenzi-sicelo ukuba ngaba
- ungumfundi obhalisileyo nokuba kukwiziko lemfundo ephakamileyo elivunyiweyo eliseNtshona Koloni okanye e-UNISA okanye eNorth West University;
- ukunyaka wakhe wokuqala okanye wesibini wezifundo;
- ungutitshala oqeshwe isigxina kwiSebe i-WCED;
- ungumntu ongafumani bhasari karhulumente okanye nayiphi na enye ibhasari; kwaye
- ungummi waseMzantsi Afrika.
|
5. |
Ibhasari le iya kuhlawula kuphela iifizi zokubhalisa nezokufunda (registration and tuition fees).
|
6. |
Isicelo ngasinye sebhasari masibe nala maxwebhu alandelayo:
- Ifom yesicelo sebhasari yokufunda ezalisiweyo (isiHlomelo A)
- Igama leyunivesithi apho abhalise khona malibhalwe ngokucacileyo kwifom yesicelo.
- Ifom yemvumelwano ezalisiweyo (isiHlomelo B)
- Ubungqina bokubhaliselwa unyaka wezifundo ka-2009 (iikopi ezingqiniweyo)
- Ubungqina obubhaliweyo beendleko zokufunda, o.k.t. iifizi zokubhalisa neefizi zokufunda, ukulungiselela unyaka wezifundo ka-2009 (Le ngcaciso iya kufumaneka kwiziko lemfundo ephakamileyo umenzi-sicelo abhalise kulo.)
- Iikopi ezingqiniweyo zesazisi (ID), zesatifikethi sematriki, zesiqinisekiso semfundo noqeqesho (zeziqinisekiso zemfundo nezoqeqesho)
|
7. |
Izicelo mazingeniswe kule dilesi ilandelayo engadlulanga uLwesine we-18 Juni 2009:
Head: Education (For Attention: Ms F Kearns) Directorate: Internal Human Capital Development (Teacher Development) Western Cape Education Department Private Bag X9114 Cape Town 8000
Izicelo zinokufakwa kwakhona kwibhokisi ephawulwe "Directorate: Internal Human Capital Development" kwifoya yomnyango wokungena omkhulu kwaNdlunkulu weSebe i-WCED e-Grand Central Towers, eKapa.
|
8. |
Iifom zezicelo neefom zemvumelwano ziqhotyoshelwe apha kule ngcaciso imfutshane. Iikopi zezi fom ziyafumaneka ngokunjalo kwicandelo laBenzelwa iiNkonzo leSebe i-WCED kumgangatho wesibini waseGrand Central Towers, eKapa. |
9. |
Uyacelwa uqaphele ukuba
- akukho zicelo zifike emva kwexesha elibekiweyo, zingabhalwanga zonke iinkcukacha okanye ingabonakaliyo into ebhalwe kuzo ziya kuqwalaselwa;
- kuphela ziikopi ezingqiniweyo zamaxwebhu ayimfuneko eziya kwamkelwa; yaye
- akukho zicelo zithunyelwe ngefeksi ziya kwamkelwa.
|
10. |
IKomiti yeeBhasari iya kuqwalasela ize izibeke ngokweemfuno eziphambili (prioritise) zonke izicelo, ize emva koko yenze iingcebiso malunga nokubonelela ngeebhasari. Inani leebhasari ezikhutshwayo liya kususela kwinani labenzi-zicelo elamkelweyo nemali efumanekayo. |
11. |
Umenzi-sicelo ngamnye ophumeleleyo kolindeleka angene kwimvumelwano esemthethweni neSebe i-WCED yokuba enze inkonzo yonyaka omnye ngonyaka ngamnye wokunikwa kwakhe ibhasari, kunye nokuthobela eminye imigqaliselo ekhankanywe kwimvumelwano. |
12. |
Kucelwa uqinisekise ukuba okubhalwe kule ngcaciso imfutshane kwaziswa bonke ootitshala ukuze bakuthathele ingqalelo. |
ISAYINWE: NGU-ED KIRSTEN
INTLOKO: YESEBE LEMFUNDO
UMHLA: 2009:05:26
|