1. Die impak van die huidige ekonomiese klimaat op die finansiële hulpbronne van die Wes-Kaap Onderwysdepartement het die instelling van buitengewone besuinigingsmaatreëls genoodsaak.
2. Ingevolge artikel 36(1) van die Suid-Afrikaanse Skolewet, 1996 (Wet 84 van 1996), moet 'n skoolbeheerliggaam (SBL) alle redelike maatreëls tref om die hulpbronne wat deur die staat ter verbetering van die gehalte van onderwys by die skool voorsien word, aan te vul.
3. By daardie skole waar dit van toepassing is, moet die SBL weereens ouers se aandag vestig op die noodsaaklikheid van die betaling van skoolgeld. By geen-geldeskole moet die SBL donasies aanmoedig.
4. Die skool se fondse moet ook versigtig bestuur word, en besteding aan goedere en dienste wat nie gebiedend noodsaaklik is nie, moet vermy word.
5. SBL'e moet ook seker maak dat die volgende besparingsmaatreëls rakende munisipale dienste, soos aangedui in Bylae B, van Omsendbrief 0034/2008 wat verband hou met Norme en Standaarde, geïmplementeer word:
5.1 Elektrisiteit

  1. Buiteligte moet gedurende die dag afgeskakel wees;
  2. Klaskamerligte moet gedurende die dag slegs aangeskakel word as die natuurlike lig onvoldoende is;
  3. Slegs die sekuriteitsligte en ligte van hoekklaskamers moet snags aangeskakel word. Gedurende naweke en skoolvakansies moet hierdie ligte saans aangeskakel en soggens afgeskakel word;
  4. Die installering van voorafbetaalde elektrisiteitsmeters moet oorweeg word aangesien skole dan beter kontrole oor hulle gebruik van en besteding aan elektrisiteit sal kan uitoefen. ESKOM en die meeste ander munisipaliteite het aangedui dat hulle hierdie meters sal kan installeer;
5.2 Water

  1. Watersproeiers moet spaarsaam gebruik word, en toegedraai word wanneer grasperke en blombeddings nat genoeg is;
  2. Die watertoevoer na urinale en krane buite die geboue moet toegedraai word by die afsluitkrane as hulle nie benodig word nie, bv. na skoolure en veral gedurende naweke;
  3. Personeel moet seker maak dat alle krane behoorlik toegedraai is voordat hulle die terrein verlaat;
  4. Toevoerpype en watermeters moet gereeld gekontroleer word vir lekplekke en defekte. Die volgende maatreëls moet getref word:
    • Wanneer die skool vir die dag sluit, maak seker dat alle krane toegedraai is en neem die meterlesing;
    • Neem nog 'n lesing soggens voordat enige krane oopgedraai word;
    • Vergelyk die twee lesings en, as hulle verskil, doen die volgende stappe:
      • Wanneer die skool die volgende dag sluit, maak die afsluitkrane toe en neem 'n meterlesing;
      • Neem die volgende oggend 'n meterlesing voordat die afsluitkrane oopgedraai word;
      • As daar steeds 'n verskil tussen die lesings is, dui dit daarop dat die watermeter foutief is of dat daar 'n pyplekkasie is;
      • Reëlings moet dan onmiddellik getref word vir die herstel of vervanging van die watermeter en/of pyp;
5.3 Vullisverwydering

Monitor die getal vullisdromme wat by die skool gebruik word. Plaaslike owerhede hef gewoonlik 'n tarief per drom en dit is dus van belang om so min vullisdromme as moontlik te gebruik. Oorweging kan ook geskenk word aan die aanstelling van 'n private kontrakteur om die skool se afval te verwyder.
6. Laastens moet die prosedure vir die bestuur en terugkry van handboeke heroorweeg word. In hierdie verband word u verwys na daardie afdeling van die Basiese Finansiële Handleiding Vir Skole (Tweede Uitgawe, 2006) wat handel oor die noodsaaklikheid om 'n doeltreffende stelsel vir die terugkry van handboeke te hê.
7. U samewerking in bogemelde verband sal hoog op prys gestel word.


GETEKEN: LJ ELY
HOOF: ONDERWYS
DATUM: 2009:08:26