Die 16 Dae van Aktivisme: Geen Geweld Teen Vroue is 'n veldtog van die Verenigde Nasies wat van 25 November (Internasionale Dag van Geen Geweld Teen Vroue) tot 10 Desember 2009 (Internasionale Menseregtedag) sal plaasvind om bewustheid van die impak wat geweld op vroue en kinders het, te verhoog. Dit is 'n jaarlikse instelling en dien as oproep tot die uitwissing van alle vorms van geweld teen vroue, kinders en ook teen mans.

BELANGRIKE DATUMS TYDENS DIE 16 DAE VAN AKTIVISME

25 November 2009 - Internasionale Dag vir die uitwissing van Geweld teen Vroue

Die tema vir 2009 is "Moenie wegkyk nie, tree op teen misbruik". Die Internasionale Dag vir die uitwissing van Geweld teen Vroue stuur die 16 Dae van Aktivisme-veldtog van stapel. Dit is sedert 1981 deur vroueaktiviste bepaal as 'n dag teen geweld teen vroue (en kinders). Dit word gevier ter herinnering aan die brutale sluipmoord in 1960 op die drie Mirabal-susters, politieke aktiviste in die Dominikaanse Republiek, op bevel van die Dominikaanse heerser, Rafael Trujillo (1930 - 1961). Die dag fokus op die bemagtiging van vroue om vir hulle regte op te kom, maar doen ook 'n beroep op mans om 'n lewensbelangrike rol te vervul in die uitskakeling van gendergebaseerde geweld.

1 Desember 2009 - Węreld VIGS-dag

Węreld VIGS-dag gaan oor verhoogde bewusmaking, opvoeding en bestryding van vooroordeel. Dit herinner mense daaraan dat MIV nie verdwyn het nie, en dat baie dinge nog gedoen moet word. Tydens die Węreld Vigs-veldtog word mense aangemoedig om rooi strikkies te dra om die gesondheid te vier van mense wat met MIV saamlewe asook om diegene te onthou wat aan VIGS gesterf het. Die rooi strikkie is die internasionale simbool van VIGS-bewustheid wat deur die jaar, en veral op Węreld VIGS-dag, deur mense gedra word om besorgdheid te toon oor MIV en VIGS, en om ander te herinner aan die behoefte aan hulle ondersteuning en betrokkenheid. Huidige navorsing toon dat die bevolkingsouderdomsgroepe wat die grootste risiko loop om MIV/VIGS op te doen die volgende is: Swart vroue (20 tot 34 jaar oud), Swart mans (25 - 49 jaar oud) en mans van ouer as 50 jaar.

3 Desember 2009 - Internasionale Dag van Persone met Gestremdhede

Hierdie dag word gebruik om begrip te bevorder vir gestremdheidkwessies, die regte van persone met gestremdhede en die integrasie van persone met gestremdhede in elke aspek van die politieke, sosiale, ekonomiese en kulturele lewe van hulle gemeenskappe. Dit verskaf 'n geleentheid aan individue en gemeenskappe om deel te neem aan aktiwiteite wat daarop gemik is om 'n inklusiewe omgewing (van mense met 'n gestremdheid) te skep. Tans lewe ongeveer 3.4% van mense in die Wes-Kaap met 'n gestremdheid saam.

10 Desember 2009 - Internasionale Menseregtedag

Menseregte is regte wat inherent is aan alle mense, afgesien van nasionaliteit, geslag, nasionale of etniese oorsprong, kleur, godsdiens, taal of enige ander status. Ons is almal ewe geregtig op ons menseregte sonder diskriminasie. Internasionale Menseregtedag vier die dag toe die Universele Verklaring van Menseregte deur die Algemene Vergadering van die Verenigde Nasies aanvaar is. Met die 2010 Sokker Węreldbeker op hande word veral gefokus op kwessies aangaande mensehandel. Die Wes-Kaap is tans besig om 'n Kinderbeskermingsplan saam te stel wat sal help met die beskerming teen en voorkoming van kinderhandel.

Alhoewel die 16 dae gefokus is op die tydperk 25 November tot 10 Desember, is dit nodig dat ons sal begin kyk nie net na 'n 16-dae-veldtog nie, maar na 'n 365-dae-veldtog om seker te maak dat bewusmaking aangaande gendergebaseerde geweld deur die jaar sal plaasvind en in al ons programme aandag sal geniet.

Ons vra alle WKOD-werknemers om by ons aan te sluit om op hierdie 16 dae te fokus en hulle deel te doen om bewustheid van gendergebaseerde geweld en menseregtekwessies te verhoog. Gedurende hierdie tydperk moedig ons alle werknemers (veral mans) aan om deel te neem en om aktiwiteite en programme aangaande die uitwissing van gendergebaseerde geweld te bevorder.



GETEKEN: S CYSTER
HOOF: ONDERWYS
DATUM: 2009:11:19

16 Dae van Aktivisme  (grootte: 32 KB)
16 Dae van Aktivisme: "Menseregte vir almal – Menseregte vir vroue"  (grootte: 18 KB)
16 Dae van Aktivisme: Mans Wat Omgee  (grootte: 12 KB)