| 1. |
Die immer veranderende en toenemende eise t.o.v. skoolonderrig plaas al groter druk op die administratiewe personeel van ons skole. In ooreenstemming met internasionale tendense en beste praktyk moet ons ons administratiewe personeel help om professionele skooladministrateurs te word. Dit sal nie alleen hierdie gewaardeerde werknemers ontwikkel nie, maar ook SBS'e in staat stel om meer tyd aan hulle hooffunksie, naamlik doeltreffende onderwys, te bestee.
|
| 2. |
Die Wes-Kaap Onderwysdepartement (WKOD) het die Sertifikaat in Skoolsakebestuur (SSSB) op NKR Vlak 4 vir administratiewe personeel by skole ontwikkel. Die hoofdoel van hierdie kwalifikasie is om relevante ontwikkelingsgeleenthede te skep vir skooladministratiewe personeel wat tot persoonlike groei en ontwikkeling verbind is. Hierdie program is daarop ingestel om deelnemers toe te rus met die kennis en bevoegdheid wat vereis word om by te dra tot die doeltreffende bestuur van skoolwerksaamhede en bronne.
|
| 3. |
Aansoekers moet asseblief op die volgende let:
|
| 3.1 |
Daar is slegs 300 beurse beskikbaar vir die kursus in 2010. Aansoekers sal uit stedelike sowel as plattelandse distrikte gekeur word;
|
| 3.2 |
Aansoekers moet permanent in diens van die WKOD wees;
|
| 3.3 |
Die toegangsvlak vir die sertifikaatprogram is graad 10, met 'n slaagsyfer in Wiskunde of Wiskundige Geletterdheid of Rekeningkunde of Bedryfsekonomie as vereiste. Suksesvolle aansoekers sal geassesseer word ooreenkomstig hulle huidige kwalifikasies en vorige leer;
|
| 3.4 |
U moet in staat wees om te lees, te skryf en te kommunikeer in Engels en in ten minste een ander amptelike Suid-Afrikaanse taal. Let daarop dat die kursus net in Engels aangebied sal word, wat lesings sowel as studiemateriaal betref;
|
| 3.5 |
U moet toegang hê tot 'n rekenaar met 'n Internetverbinding, aangesien die program deur 'n aanlyn- leerkoppelvlak ondersteun word;
|
| 3.6 |
U moet rekenaargeletterd wees, d.i. oor 'n beginnerskennis beskik van woordprosessering, sigblaaie en e-pos, sowel as toepassings soos MS Word, Excel en Outlook. Bevoegdheid in 'n aanbiedingstoepassing, soos Power Point, is 'n sterk aanbeveling;
|
| 3.7 |
U moet deeglike ervaring hê in kantoor- en finansiële administrasie;
|
| 3.8 |
U mag nie vir enige ander kursus ingeskryf wees of reeds 'n staatsbeurs of enige ander beurs ontvang nie;
|
| 3.9 |
Daar sal van kursusgangers verwag word om na die kollege te reis vir lesings;
|
| 3.10 |
Die program sal 12 maande duur.
|
| 4. |
Die kursus sal in modules verdeel word, en elke module sal bestaan uit ± 2 dae van lesings gevolg deur ± 3 weke van leerwerk teen eie pas. '
|
| 5. |
Elke aansoek vir die kursus en beurs moet van die volgende dokumente vergesel wees:
- 'n Votooide aansoekvorm vir toelating tot die kursus en studiebeurs (Bylae A);
- 'n Aanbevelingsvorm, voltooi en onderteken deur die prinsipaal of toesighouer (Bylae B);
- Gewaarmerkte afskrifte van identiteitsdokument, Senior Sertifikaat of Junior Sertifikaat, en akademiese en/of professionele kwalifikasiesertifikaat/-sertifikate.
|
| 6. |
Alle aansoeke moet teen 9 Desember 2009 aan die volgende adres voorgelê word:
Hoof: Onderwys
Vir aandag: Me Mandy van Wyk
Direktoraat: Interne-menslikekapitaalontwikkeling
Wes-Kaap Onderwysdepartement
Privaatsak X9114
Kaapstad
8000 |
Aansoeke mag ook gepos word in die houer wat gemerk is Direktoraat: Interne - menslikekapitaalontwikkeling in die hoofingangportaal van die WKOD se hoofkantoor te Grand Central Towers, Kaapstad.
|
| 7. |
Aansoekvorms is by hierdie minuut aangeheg as Bylae A en B. Afskrifte van hierdie vorms is ook beskikbaar by u naaste onderwysdistrikskantoor of die WKOD se Kliëntediensafdeling op die tweede vloer van Grand Central Towers in Kaapstad.
|
| 8. |
Let asseblief daarop dat:
- geen laat, onvolledige en onleesbare aansoeke in aanmerking geneem sal word nie;
- slegs gewaarmerkte afskrifte van die vereiste dokumente aanvaar sal word;
- geen aansoeke per faks aanvaar sal word nie; en
- dat die WKOD nie enige korrespondensie sal voer oor laat aansoeke of onvolledige inligting nie
|
| 9. |
Die Keurkomitee sal alle aansoeke oorweeg en prioritiseer en dan aanbevelings oor die toekenning van die beurse doen.
|
| 10. |
Studente sal uit al die onderwysdistrikte gekies word, en kollegeplasing sal binne die student se distrik wees.
|
| 11. |
Van elke suksesvolle aansoeker sal verwag word om 'n formele kontraktuele ooreenkoms met die WKOD aan te gaan om 'n jaar se diens te lewer vir elke jaar waarvoor die beurs toegeken is, en om te voldoen aan al die ander bepalings wat in die ooreenkoms uiteengesit is. Die ondertekening van hierdie kontrak is 'n verpligte voorvereiste en is 'n standaard onderneming met enige beurs wat aan 'n WKOD-werknemer toegeken word.
|
| 12. |
Die SSSB is 'n aantreklike geleentheid vir selfverbetering, maar sal harde werk, toewyding en selfdissipline van studente vereis. Aansoekers moet daarop let dat hierdie sertifikaatkursus geen finansiële vergoeding vir studente inhou by die suksesvolle voltooiing van die kursus nie.
|
| 13. |
'n Aansoeker wat teen 1 Februarie 2010 nog nie 'n antwoord ontvang het nie, kan aanneem dat sy/haar aansoek nie geslaag het nie.
|
| 14. |
Prinsipale word vriendelik versoek om die inhoud van hierdie minuut onder die aandag van alle betrokkenes te bring.
|
GETEKEN: ED KIRSTEN
HOOF: ONDERWYS
DATUM: 2009:11:10
|