| 1. |
Dit is vir die Wes-Kaap Onderwysdepartement (WKOD) aangenaam om bekend te maak dat 'n beperkte getal beurse weer eens beskikbaar gestel word aan skoolleerders en lede van die publiek wat 'n onderwysloopbaan beoog en van voorneme is om vir die 2010 akademiese jaar by 'n hoëronderwysinrigting in te skryf.
|
| 2. |
Die volgende persone kan in aanmerking kom vir oorweging:
- Graad 12-skoolleerders of lede van die publiek wat voldoen aan die toelatingsvereistes van die universiteit van hulle keuse;
- Graad 12-skoolleerders of lede van die publiek wat nie reeds 'n ander staatsbeurs of enige ander beurs ontvang nie.
|
| 3. |
Die beurs dek gelde vir registrasie, onderrig, handboeke, leermateriaal en verblyf in 'n studentekoshuis.
|
| 4. |
Die sluitingsdatum vir alle aansoeke is Woensdag, 30 September 2009 en aansoeke moet gerig word aan:
Dr FJ Wessels (Kamer 23-06)
Direktoraat: Interne-menslikekapitaalontwikkeling
Wes-Kaap Onderwysdepartement
Privaatsak X9114
Kaapstad
8000
|
Aansoeke kan ook geplaas word in die posbus gemerk "Pre-diensbeurse, Direktoraat: Interne-menslikekapitaalontwikkeling" in die hoofingangsportaal van die WKOD-hoofkantoor te Grand Central Towers, Kaapstad.
|
| 6. |
Let asseblief op die volgende rakende aansoeke:
- Die naam van die betrokke kursus, bv. B.Ed (Grondslag- of Intermediêre Fase) en die hoofvakke, in die geval van Senior Fase (Graad 7 - 9 ) en VOO (Graad 10 - 12), moet duidelik aangedui word;
- Indien 'n aansoeker egter 'n Baccalaureus Artium (BA), Baccalaureus in Handel (B Com), Baccalaureus in Natuurwetenskappe (B Sc), of ander toepaslike baccalaureusgraad wil neem, moet hy of sy ook registreer vir die Nagraadse Onderwyssertifikaat (NGOS) ten einde te kwalifiseer vir 'n beurs;
- Die naam van die universiteit van die student se keuse moet duidelik op die aansoekvorm aangedui word;
- Gewaarmerkte afskrifte van die volgende dokumente moet saam met die aansoek ingedien word:
- Aansoeker se middel-van-die-jaar-uitslae, in die geval van graad 12-leerders of studente wat tans aan 'n universiteit studeer;
- Aansoeker se matrieksertifikaat, en/of tersiêre akademiese kwalifikasie(s), indien in besit van 'n tersiêre kwalifikasie;
- Aansoeker se Identiteitsdokument;
- Geen onvolledige, onleesbare of gefakste aansoeke sal oorweeg word nie;
- Aansoeke wat na die sluitingsdatum ontvang word, sal nie oorweeg word nie.
|
| 7. |
Die Beurskomitee sal, na deeglike oorweging van alle aansoeke, aanbevelings doen vir die toekenning van die beurse aan die suksesvolle aansoekers.
|
| 8. |
Elke suksesvolle aansoeker sal 'n formele ooreenkoms met die WKOD moet aangaan om 'n jaar se diens as 'n onderwyser te lewer vir elke jaar waarvoor die beurs toegeken is, en om te voldoen aan die ander bepalings wat in die ooreenkoms uiteengesit is.
|
| 9. |
Maak asseblief seker dat die inhoud van hierdie minuut onder die aandag van alle onderwysers en leerders gebring word.
|
GETEKEN: ED KIRSTEN
HOOF: ONDERWYS
DATUM: 2009:07:23
|