1. Die doel van hierdie minuut is om u te herinner aan die insette wat u moet lewer vir die samestelling van die interim jaarlikse finansiële state (IJFS) soos op 30 September 2009 vir die Wes-Kaap Onderwysdepartement vir die 2009/10 finansiële jaar.
2. As gevolg van die probleme wat elke jaar ondervind word met die saamstel van die jaarlikse finansiële state (JFS), het die Provinsiale Tesourie (PT) besluit om interim finansiële verslaglewering in te stel. Die bedoeling is om die integriteit en gehalte van finansiële inligting soos gerapporteer in finansiële state, veral in openbaarmakingsnotas te verbeter en departemente voor te berei op toevallingsrekeningkunde. Die inisiatief is ondersteun deur die nasionale Tesourie (NT) wat met 'n ontplooiingsprogram begin het. Die WKOD se voltooide IJFS'e moet voorgelê word aan die PT teen nie later nie as 15 November 2009.
3. Ten einde Die Direktoraat: Finansiële Rekeningkunde in staat te stel om aan hierdie nuwe bepalings te voldoen, is dit noodsaaklik dat die persone op die aangehegte lys, hulle insette op die Basiese Rekeningkundige Stelsel (BRS) so gou moontlik na die sluiting van die September-rekeningkundemaand indien, of nie later nie as op 15 Oktober 2009 by hierdie direktoraat indien. Alle bydraes moet dus, waar moontlik, vergesel wees van ondersteunende dokumentasie en waar moontlik in elektroniese formaat wees, wat die normale vereistes van die JFS is. Die hooffokus sal wees op die toetsing van datakorrektheid en die voorkoming van enige negatiewe ouditbevindings.
4. Ter wille van gerieflike verwysing sal elektroniese weergawes van die uittreksels uit die profielvorm vir die samestelling van die finansiële state soos van toepassing op elke afdeling, aan die persone op die aangehegte lys ge-e-pos word. Die toepaslike riglyn vir die voorbereiding van finansiële state sal ook per e-pos saamgestuur word aan die persone op die aangehegte lys.
5. Alle Finansiespersoneel word versoek om ook kennis te neem van die inhoud van Tesourie Omsendbrief 57/2009, van 21 September 2009. Enige navrae in hierdie verband kan gerig word aan mnr MJ Comer by tel. 021 467 2736, of aan mnr S van Wyk by 021 467 2738.
6. U samewerking sal hoog op prys gestel word.


GETEKEN: EI MEYER
HOOF: ONDERWYS
DATUM: 2009:10:06

"List of persons responsible for providing input"  (grootte: 23 KB)