1. ISebe leMfundo leNtshona Koloni limenyiwe kwakhona ukuba lithathe inxaxheba kwi-2009 Southern African Development Community (SADC) Secondary Schools Essays Competition, eyeye-11 yohlobo lwayo. AMazwe angaMalungu aceliweyo ukuba afake amangenelo awo ngala: yi-Angola, Botswana, Democratic Republic of Congo, Lesotho, Madagascar, Malawi, Mauritius, Mozambique, Namibia, South Africa, Swaziland, Seychelles, Tanzania, Zambia neZimbabwe.
2. Izikolo ezinomdla, nootitshala nabafundi abanomdla bayacelwa ukuba bafunde le ngcaciso ebhalwe kule ngcaciso emfutshane baqaphele ngokukodwa imihla ebekiweyo yokungeniswa kwezincoko nesikhokelo esifakwe kwalapha. Ezona zincoko zibhetele ezivela kwizikolo zeSebe i-WCED mazifike kumcebisi ngezekharityhulam ochaphazelekayo kwisithili ngasinye ungadlulanga owe-27 Matshi 2009. Izincoko ezi-3 ekuzezona zigqwesileyo kwisithili ngasinye ziya kungeniswa kwaNdlunkulu we-WCED ungadlulanga owe-3 Apreli 2009 zize ekugqibeleni zithunyelwe kuMlawuli-Jikelele (weSebe leMfundo likazwelonke) nge-30 Apreli 2009.
3. Isihloko sesi silandelayo: Bangasebenzisana njani na oorhulumente be-SADC, oosomashishini nemibutho yoluntu ukuqinisekisa ukuba iNdebe yeZizwe zaseAfrika ka-2010 eya kuba se-Angola neNdebe ka-2010 yeFifa yeHlabathi eya kuba seMzantsi Afrika zifaka igalelo kuphuhliso lwentlalo noqoqosho lwabantu kwiNgingqi ye-SADC? (How should SADC governments, businesses and civil society organizations work together to ensure that the 2010 Africa Cup of Nations in Angola and the 2010 FIFA World Cup in South Africa contribute to the socio-economic development of the people in the SADC Region?)
4. Iphaneli yabamakishi iya kuhlangana kwiSebe leMfundo likazwelonke ukukhetha abantu abathathu abawine kuzwelonke. Ezi zincoko zithathu ziya kungeniswa kwi-SADC Secretariat ungadlulanga owe-31 Meyi 2009 ukulungiselela ukhuphiswano lwesigaba sengingqi.
5. I-SADC Secretariat ikhuphe isixa-mali esiyi-US $1000 njengebhaso eliyimali labo bawine ukhuphiswano kulo ngalinye iLizwe eliliLungu. Ezi zixa-mali zikhutshiweyo zimi ngolu hlobo lulandelayo:
  • yi-US $ 500 ibhaso lokuqala
  • yi-US $ 300 ibhaso lesibini
  • yi-US $ 200 ibhaso lesithathu
6. Abathathu abawinileyo abavela kulo ngalinye laMazwe angaMalungu e-SADC baya kuthi ke bakhuphisane kwinqanaba lengingqi. Iphaneli yeejaji iya kuhlangana kwandlunkulu we-SADC ukukhetha abawine kwingingqi. Amabhaso abo bawinileyo kwingingqi aya kuma lolu hlobo lulandelayo:
  • yi-US $ 1500 ibhaso lokuqala
  • yi-US $ 1000 ibhaso lesibini
  • yi-US $ 750 ibhaso lesithathu
7. Ukongeza, abathathu abawinileyo kwingingqi baya kuya kwidolophu esindleka umsitho (eya kwaziswa) eMzantsi Afrika ngo-Agasti/Septemba 2009 ukuya kwamkela amabhaso abo ngethuba lokuvulwa ngokusesikweni kweNgqungquthela yeeNtloko zaMazwe kunye nooRhulumente be-SADC. Owine ibhaso lokuqala usenokucelwa ukuba afunde izicatshulwa ezithile zesincoko sakhe kumsitho wokuvula. ISatifikethi esiKhethekileyo seNkuthazo (Special Commendation Certificate), kwakunye neSikhumbuzo se-SADC (SADC Souvenir), ziya kuthunyelwa kwiGosa loQhagamshelwano likaZwelonke (National Contact Person) ukuba lizinike abafundi abalishumi abaphume phambili kukhuphiswano lwengingqi. Kulo nyaka, abawinileyo baseMzantsi Afrika, njengabantu abawinileyo belizwe elisindlekayo (host country) ekubanjelwe kulo iNgqungquthela, baya kufumana amabhaso abo kunye nabawinileyo bengingqi.
8. Isincoko masingabi ngaphezu kwamagama angama-2000 ubude kwaye singabi ngaphantsi kwamagama ali-1000, yaye sifuneka sibhalwe ngesiNgesi. Kwimeko apho abafundi bakwaziyo ukufikelela kwiikhompyutha, kucetyiswa ukuba batayiphe amangenelo abo baze bangenise iikopi ezikwikhompyutha kunye nezingamaphepha (soft and hard copies). Zonke izincoko mazibhalwe ngokucacileyo igama lomfundi, lesikolo nelelizwe lakhe. Bangazisayina iikopi ezingamaphepha baze bafake ii-inishiyali zabo ukuqinisekisa ukuba azitshintshwanga.
9. Kulindeleke ukuba abafundi bathobele ezi zikhokelo zilandelayo xa bebhala izincoko zabo:
9.1 IMbali nge-SADC neeNjongo zayo: Abafundi bafanele ukubonisa ulwazi ngokusekwa nenjongo yokwakhiwa kwe-SADC, ubume bobulungu bayo ngoku, iinjongo zayo, nenkalo yezentlalo noqoqosho ye-ajenda yayo yentlanganisela yamazwe engingqi. (15 amanqaku)
9.2 Kufuneka abafundi kweli nqanaba babonise ulwazi lwabo ngokubaluleka kweNdebe yeZizwe zase-Afrika ka-2010 neNdebe yeHlabathi ye-FIFA ka-2010 kuphuhliso lwezentlalo noqoqosho lwabantu abakwiNgingqi ye-SADC. (15 amanqaku)
9.3 Indlela amacandelo ahlukeneyo amakasebenzisane ngayo ukuqinisekisa ukuba ezi ziganeko zinegalelo kwimpilo entle yabantu bengingqi le: Kulindeleke ukuba abafundi baxoxe ngendlela oorhulumente be-SADC, oosomashishini noluntu ngokubanzi abafanele ukubonisa ngayo intsebenziswano ukuqinisekisa ukuba iNdebe yeziZwe zaseAfrika ka-2010 e-Angola neNdebe yeHlabathi ye-FIFA ka-2010 eMzantsi Afrika ziba yinzuzo kwiinginginya zabantu bale ngingqi. (30 amanqaku)
9.4 Kufuneka abafundi babonise ngokucacileyo amanyathelo afanele ukuthathwa kumanqanaba kazwelonke nawengingqi ngoorhulumente be-SADC, zii-arhente ezingekho phantsi korhulumente namanye amacandelo, ukwenzela ukuba ezi ziganeko zibini zesoka zibe yimpumelelo eya kuba yinzuzo enkulu kubemi bengingqi ye-SADC. (30 amanqaku)
9.5 Kufuneka abafundi bacacise gca indlela la manyathelo angasentla anokuphunyezwa ngayo ukugaya ngamoya-mnye intatho-nxaxheba epheleleyo yabantu bale ngingqi kunye namaziko abo ukuqinisekisa ngokuhlangeneyo impumelelo yeNdebe yeZizwe zaseAfrika ka-2010 neNdebe yeHlabathi ye-FIFA ka-2010 ngokunxulumene nokuphuculwa komgangatho wentlalo yabantu bengingqi ye-SADC. (20 amanqaku)
10. Izincoko mazithunyelwe, ungadlulanga owesi-3 Apreli 2009, ukulungiselela ukhetho lokugqibela lwephondo, kulo: 
Mrs Hazel E Goliath
Senior Curriculum Planner: English
Western Cape Education Department
Room 838 
Private Bag X9114
Cape Town 8000
Ifoni:  021 467 2579
Ifeksi: 021 467 2258
I-imeyili:  hkanes@pgwc.gov.za
11. Iya kuthakazelelwa into yokuba lo mba ungafumana ingqwalaselo yakho ngokukhawuleza kakhulu. Kucelwa ubakhuthaze abafundi ukuba bathathe inxaxheba!


ISAYINWE: NGU-SM NAICKER
INTLOKO: YESEBE LEMFUNDO
UMHLA: 2009:03:09